Levítico 12 - Bible in Tzotzil de Chamula

Ti antse ta xac' sba ta poquel ta tusel c'alal mi ech' xa ox svoq'uel ti yole

¹ Ti Diose xi laj yalbe ti Moisés ti c'alal laj sc'opon talele:

² “Xi xcholet xavalbe ya'i ti israeletic jech c'u cha'al li'e: C'alal mi laj xchi'in yol jun ants ti ja' querem ta svoq'uese, vucub c'ac'al sjalil ti mu'yuc slequil ta x'ilate, yu'un jech c'otem ta stojol jech c'u cha'al c'alal yorail ta xil ti xchamele.

³ Jech ti uni quereme, ta xich' circuncisión ti c'alal yich'oj xa xvaxaquibal c'ac'al svoq'uele.

⁴ Ac'o mi jech un, ja'uc ti me'ile ta to xchabi sba batel ta slecubtasel sba oxlajuneb xcha'vinic (33) c'ac'al, ja' to ti mi lecube. Mu xu' ta spic ta stsaquel ti c'usitic ti ts'uiltasbile. Mi ja'uc xu' ta x'och ta Axibalna ti mi mu'yuc to ta sts'aqui sc'ac'alil ti c'u sjalil ta xc'ot ta lecubele.

⁵ Yan ti mi ja' tseb ta svoq'uese, ja' chib xemuna ti mu'yuc slequil ta x'ilate, yu'un c'otem ta stojol jech c'u cha'al c'alal yorail ta xil ti xchamele. Ta to xchabi sba batel ta slecubtasel sba vaquib xchanvinic (66) c'ac'al, ja' to ti mi c'ot ta lecubele.

⁶ “C'alal ta sta sc'ac'alil ti c'u sjalil ta xchabi sbae, c'usiuc no'ox ololal, mi querem, mi tseb, jech ti me'ile, ac'o yic' batel jcotuc tot chij ti yich'oj jun jabil ta ochebal sti' ti Axibalna ti bu nupel ta bee yo' jech ta xich' chiq'uel. Jech xtoc, ac'o yic' batel jcotuc paloma, mi mo'oje, ja'uc jc'otuc tortola ti ta xich' svocol ta sventa xch'ayobil ti mulil colo'ile ti ta xac'be ta yoc ta sc'ob ti palee.

⁷ Va'i un, ti palee ta xac' jelavel ta stojol ti Diose yo' jech ta sc'anbe ti ac'o ch'aybatuc smul scolo' ti antse. Ja' jech mesbil tusbil ta xc'ot yu'un ti xmalmun ti ya'lele.” Li'e, ja' bijubtasel yu'un c'alal mi ta xvoc' mi jun querem, mi ja' jun tseb:

⁸ Ti mi mu stabe stojol jcot chij ti ta xac' ti me'ile, xu' ta xac' jcot tortola, mi mo'oje, xu' ta xac' cha'cot ch'iom paloma. Jcot ta xac' ti ta xich' chiq'uele. Ti jcot xtoque, ta xich' svocol ta milel ta scoj ti mulile. Jech ti pale une ta sc'an ti ac'o ch'aybatuc ti smul scolo'e, ja' to jech mesbil tusbil ta xc'ot ti antse.