Lamentaciones 3 - Bible in Tzotzil de Chamula

Yoxibal muc'ul ic'al me'inal

¹ Ca'ioj jtuc c'u s'elan ti vocol laj jta ti laj syales talel yoc sc'ob Dios ta jtojol ta scapemal sjole.

² Ic'uneb ta j'ech'el ti osil banomil bu laj yic'un ech'ele. Mi jutebuc xojobin ti be bu lixanav yu'une.

³ Yu'un jujuliquel xlic xcaj no'ox laj syales ti yoc sc'ob ta jtojole.

⁴ Ta anil no'ox liyijub yu'un, sot'olib ti jnuculile. Laj slilinbun ta j'ech'el ti jbaquiltaque.

⁵ Jun to moc s'elan joyolun ta vocol yu'un, ti mu x'ech' xjelav ta j'ech'el ti laj jta ti vocol yu'une.

⁶ Laj yac'un ech'el ta ic'al osil jech c'u cha'al c'ot ta stojolic ta vo'ne ti buch'u laj chamuc xae.

⁷ Laj sbajun ta jun ta moc ti mu jutebuc loq'uebal yu'une. Laj sts'otun ta alal carina taq'uin.

⁸ Manchuc mi xi'avet ta sc'anel ti jpojele, mu'yuc laj xchiquintabun jc'op ti xivocolete.

⁹ Laj smacbun jbe ta jun pac'bil ton bu ta xi'ech'e; yan be bu laj jtam ech'el yu'un.

¹⁰ Co'ol s'elan jcot león nac'al ta jta ta xca'i, mi jech c'u cha'al cot oso ti naca xa mu laj sbalun ta ti'ele.

¹¹ Laj sq'uejbunun ech'el ta be, laj syayijesun ta jot'el, xilaj o xa xchi'uc laj ca'i.

¹² Lic snit ta xach'el ti syolobe, lic'ot ta xchanob c'ob xchi'uc ti sni' syolobe.

¹³ Ti sni' syolob Dios laj sjip talele, ts'unul c'ot sjunul ta jtojol.

¹⁴ Scotol ti jvinquileltaque xlabajic xa ta jtojol. Scotol c'ac'al un, cacal ta ye sti' ti jlabanel yu'unique.

¹⁵ Mu x'ech' ti vocol laj slaman ta jba ti Diose. Mu ts'icbaj xchopolal ti c'usi vul ta jtojol yu'une.

¹⁶ Laj xchec'bun ta lum ti quee, jlo'oj pucuc licom yu'un.

¹⁷ Nom c'ot ma' ti mu'yuc c'usi jna'e, ch'ay sc'oplal ti xpatet co'ntone.

¹⁸ C'ot ta nopel cu'un ti ch'ab xi sc'oplal ta j'ech'el ti jpatoj co'nton ta stojol ti Diose.

¹⁹ Mu xch'ay xca'i ma' ti at-o'ntone, ti jtuc xa no'ox laj ca'ie, ti mu x'ech' xjelave, ti spajeb xa no'ox laj jta ti jvocole.

²⁰ C'alal ta jnopilan ti va'i s'elan taje, ta stsic' co'nton yu'un.

²¹ Ti mu xch'ay ta co'ntone, jtos ti xi s'elan jpatuc co'nton ta stojole:

²² ja' ti mu'yuc spajeb syail xc'uxul yo'nton ti Diose, ti mu'yuc lajem sc'oplal ti yutsilal slequilale.

²³ Naca ach' ti c'usi ta xc'ot ta pasel yu'un jujun c'ac'ale. Mu'yuc c'usi stac' jco'oltastic ti slequil yutsilale.

²⁴ Xichi laj calbe jbae: Mu'yuc xa yan un, ja' no'ox ti Diose, jech o xal jpatoj co'nton ta stojol.

²⁵ Ti Diose, lec yo'nton xchi'uc ti buch'u spatoj yo'ntonic ta stojole, ti buch'utic ja' yich'ob c'opique.

²⁶ Xloc' venta ti ts'ijilotic ta smalael coltavanuc ti Diose.

²⁷ Xloc' venta ti buch'u ta squeremal no'ox ochesatuc ta be yu'un ti Diose.

²⁸ Tsots sc'oplal ch'an xi'uc ts'ijluc ti buch'uuc no'ox c'alal ta x'ac'bat yicats yu'un ti Diose.

²⁹ Sbic'tajesuc sba, sts'uts' xa banomil, xu' to nan spatoj yo'nton.

³⁰ Ya'binojuc xa no'ox sba ta xt'ajat ta majele. Ech' jelavuc no'ox yu'un ti c'u spimiluc ti c'usi albatuque.

³¹ Ma'uc j'ech'el jipbil tenbil ta scomesat yu'un ti Diose.

³² Ac'o mi ta xac' vocol, sna' xc'uxubinvan xtoc, yu'un mu'yuc spajeb syail xc'uxul yo'nton.

³³ Le' une, ma'uc ma' ti xmuyubaj xa ta sq'uelbe svocol ta at-o'nton ti jnaclejetique.

³⁴ Ti mu'yuc xc'uxul o'ntonal ti naca yilbajinel ti jchuqueletic yu'un ti jteclume,

³⁵ ti ta sba ta sat ti Buch'u oy ta toyol ti naca xich' no'ox pasbel c'usi chopol ti buch'uuc no'oxe,

³⁶ ti naca xich' no'ox soquesel ti oy sc'oplal ti lequil chapanele, taje, yaloj ti Dios ti j'ech'el mu lecuc ta xile.

³⁷ C'alal oy c'usi sc'oplal ta x'ale, c'alal oy c'usi ta xc'ot ta pasele, yu'un laj yac' ye sti' ti Diose.

³⁸ Jech c'u cha'al ti c'usi lec ta xvule, ti c'usi chopol ta xvul ta loq'uele, ja' jech c'ot ta nopel yu'un ti Buch'u oy ta toyole.

³⁹ Ti stalel ono'ox jsa'mulil ti vinique, ¿c'u cha'al xvulvun xa xchi'uc svocol ti li' cuxul ta banomile?

⁴⁰ Tsots sc'oplal jvulestic jch'uleltic c'u j'elantic xchi'uc ti jtaleltique, jnaban jbatic ta stojol ti Diose.

⁴¹ C'opoj ti'incutic batel ta stojol Dios ti oy ta vinajele, calbetic ya'i c'u s'elan ta snop ti jol co'ntontique.

⁴² Jsa'muliluncutic, toyobbauncutic li'ech'cutic ta atojol. Ti vo'ot une mu'yuc laj ach'aybuncutic.

⁴³ Lamal c'ot ta jtojolcutic ti sc'ac'al avo'ntone, laj avilbajinuncutic. J'ech'el laj atub ti jc'oplalcutique.

⁴⁴ Laj avol aba ta toc yo' jech mu xava'i ta xchiquintael ti xivocoletcutique.

⁴⁵ Laj avac' c'otcuncutic ta jun c'a'ep ta sba ta sat scotol ti jnaclejetique.

⁴⁶ Scotol ti cajcontracutique xbet'bun no'ox yeic ta jtojolcutic.

⁴⁷ Ti lamal vul ta jtojolcutique, naca jsibtaselcutic, jpets'alcutic, jtsutseselcutic, jipelcutic ta lum.

⁴⁸ Co'ol s'elan jun uc'um xmal no'ox ti ya'lel jsat ti lilij ti cuni teclumal ti mu tuch'baj ta co'ntone.

⁴⁹ Xmalmun ya'lel jsat yu'un oq'uel, mu'yuc xcuxet ti banomil

⁵⁰ mi mu xac' talel sat ti Dios ti oy ta vinajele.

⁵¹ Ti c'usi c'ot ta stojol ti tsebetic yu'un ti jteclumale, xtuch' xa co'nton yu'un yipal ti jsat ta oq'uele.

⁵² Ta yilal no'ox yo'ntonic ti cajcontrataque, xmich'oj lic'ot jech c'u cha'al junuc mut.

⁵³ Cuxul laj sjipicun ochel ta jun joc', mac xutbeic sti' ta jun muc' ta ton.

⁵⁴ Limut'ij junul ta vo' ti xichi laj jnope: “Mu xa cha'bel un, li' xa lic'ot ta tsutsele.”

⁵⁵ Ti vu'un une, Dios, xichi lic'opoj liti'in ta atojol ti tiq'uilun ta natil joq'ue:

⁵⁶ Chiquintao ti jc'op jti'inel une, mu xavicta aba ta ya'yiel ti jc'opojel jti'inele.

⁵⁷ Ti yorail ta xajtaot ta c'oponel ta ti'inele, ta xava'ibun ti jc'opojele, xachi ta xavalbune: “Mu xaxi'.”

⁵⁸ Ta xatic' aba ta jpojel, Dios, ti yacalun ta jvocole, ta xava'an aba ta jpojel yo' ta xicuxi.

⁵⁹ Aviloj ta aba ta asat, Dios, ta jeche' no'ox ta xquich' ti jvocole. Va'ano aba cu'un un.

⁶⁰ Chajal ta aba ta asat ti jbel ta xquich' yu'unique, ti chapal lec yu'unic scotol ti c'usi ta xispasbeicune.

⁶¹ A'yio ava'i, Dios, c'u s'elan ta xisti'oltaic, xchi'uc scotol ti c'u s'elan chapal xa yu'unic ti c'usi ta xispasbeicune,

⁶² ti mu ts'icbaj ta bet'lajetel yeic ti jcontrataque, ti ja' xa sbeelinoj o yeic ta jtojole.

⁶³ Q'uelo avil, scotol ti c'usi ta spasique, c'otemun ta j'ac'-labal yu'unic.

⁶⁴ Dios, ac'bo stojic ti c'u s'elan xtun o ta xich'ic ti vi s'elan ta spasique.

⁶⁵ Pucujibicuc ta j'ech'el avu'un, lamluc c'otuc ta stojolic ti bac vocol avu'une.

⁶⁶ Dios, ilbo ya'i svocolic ta sc'ac'al avo'nton, c'otuc ta tubbel sc'oplalic avu'un li' ta banomile.