Jueces 9 - Bible in Tzotzil de Chamula

Ti Abimeleque

¹ Ti Abimeleque, xnich'on ti Jerobaale, bat ta Siquem, ti xi laj yal ti c'alal bat sc'oponan ti yuts' yalaltac ta sventa ti sme'e:

² —Ta sventa ti mu yanucotique, ta jc'anboxuc vocol ta atojolic ti albeic ya'i ti jnaclejetic ta Siqueme, ti ja' lec ti jun no'ox vinic ti c'otuc ta ajvalil yu'unique. Altic no'ox ti c'otem ta ajvalil yu'unic ti lajuneb xchanvinic (70) ta vo' xnich'nab ti Jerobaale.

³ Ti jech mu yanicuc xchi'uc ti Abimeleque, lec laj ya'iic. Laj xch'unbeic ti sc'ope. Bat yac'beic sna' ti jnaclejetic ta Siqueme yo' jech ta snaban sbaic ta stojol.

⁴ Ma'uc no'ox ti jech laj spasic taje, yu'un laj stamic loq'uel lajuneb xchanvinc (70) ta sep plata taq'uin ti oy ta xch'ulna ti Baal-berite, laj yac'beic yich' ti Abimeleque. Ta sventa ti taq'uin taje, laj stoj o jun chib jmilvanejetic yo' jech ta sts'acliic ti Abimeleque. Jmoj xvoletic xchi'uc ti viniquetic taje,

⁵ c'otic ta Ofra ti bu to ox naqui ti Jerobaal ti ja' stote. Ta jbej no'ox ba ton laj smil scotol ti lajuneb xchanvinic (70) ta vo' xchi'iltac ta voq'uele. Ja' xa no'ox col ti Jotam ti cuch yu'un ta snaq'uel sbae, ti ja' xa xc'ox nich'on ti Jerobaale.

⁶ Ts'acal to un, scotol ti jnaclejetic ta Siqueme xchi'uc ti Bet-miloe, jmoj bat stsob sbaic ta tsoblej ta sts'el tulan ti bu oy ti ch'ul ton ta Siqueme, ti lic sva'anic ta ajvalil yu'unic ti Abimeleque.

⁷ C'alal laj ya'i ti Jotame, muy batel ta jol vits Guerizim, ti xi tsots avan talele yo' jech ta xa'iic scotolic: “¡A'yibeicun ava'iic lec, jnaclejetic ta Siquem! ¡Ja' jech ti Dios eque ta sts'etan sni' xchiquin ta atojolic!

⁸ “Oy bu jun velta, ti te'etique ta sc'anic ti oyuc ajvalil yu'unique. Laj sc'anbeic ti c'otuc ta ajvalil yu'unic ti Olivo te'e.

⁹ Ja'uc ti Olivo te'e, albatic yu'un ti mo'oje. Yu'un mi ta xc'ot ta ajvalil yu'un ti te'etique, tsots sc'oplal ta xicta sba ta yaq'uel ti aceitee, ti c'alal oy sc'oplal ta stunes ti viniquetique xchi'uc ti Diose.

¹⁰ “Va'i un, ti te'etique laj sc'anbeic ti c'otuc ta ajvalil yu'unic ti icux te'e.

¹¹ Ja'uc ti icux te'e, albatic yu'un ti mo'oje. Yu'un mi ta xc'ot ta ajvalil yu'un ti te'etique, tsots sc'oplal ta xicta sba ta yaq'uel ti sat ti jun smuile, ti jun xchi'il ta lajesele.

¹² “Va'i un, ti te'etique laj sc'anbeic ti c'otuc ta ajvalil yu'unic ti jpets uvae.

¹³ Ja'uc ti jpets uvae, albatic yu'un ti mo'oje. Yu'un mi ta xc'ot ta ajvalil yu'un ti te'etique, tsots sc'oplal ta xicta sba ta yaq'uel ti sat ti ta xtun ta vinoe, c'alal ja' ta xac'be smuyubajel yo'ntonic ti jnaclejetique xchi'uc ti Diose.

¹⁴ “Ta slajeb xa un, ti te'etique laj sc'anbeic ti c'otuc ta ajvalil yu'unic ti ch'ix te'e.

¹⁵ Albatic yu'un ti ch'ix te'e, ti lec ta xa'i ti ta xc'ot ta ajvalil yu'unique. Ti mi ja' jech yo'ntonic melel ta xc'ot ta ajvalil yu'unique, ti scotolicuc ac'o yac' sbaic ta yolon squeovale. Yan ti mi mu sc'anic ti ta xc'ot ta ajvalil yu'unique, ta xloc' talel c'oc' ta stojol, ti ta sbal ta chiq'uel ta c'oc' ti ch'ut te'etic ti oy ta Líbanoe.

¹⁶ “Avi une, xichi ta jac'boxuc ca'itique: ¿Mi ta stuq'uil avo'ntonic nopbil lec avu'unic ti ja' ta xc'ot ta ajvalil ti Abimeleque? ¿Mi laj avaq'uic ta ilel slequil yutsil avo'ntonic ta stojol ti Jerobaal xchi'uc ti xnich'nabe jech c'u cha'al laj spas ta atojolique?

¹⁷ Yu'un ti jtote, jutuc mu laj yac' sba ta milel ti c'alal laj spas leto ta apojelic ta yoc ta sc'ob ti madianitaetique.

¹⁸ Ja'uc ti vo'oxuc une laliquic ta scontrainel xnich'nab ti jtote, ti ta jbej no'ox ba ton laj amilic scotol ti lajuneb xchanvinic (70) ta vo' ti xnich'nabe. Mu no'ox jutucuc ti c'usi ta xapasique. Yu'un laj xa ava'anic ta ajvalil ti Abimeleque, xnich'on ta yan yajnil ti Jerobaal ta sventa ti avuts' avalal abaique.

¹⁹ Xichi ta xcalboxuc ava'iic tana li' une: Mi ta melel ja' yutsil slequilal avo'ntonic ta xc'uxubinel ti Jerobaal xchi'uc xnich'nab ti jech laj apasique, jmojuc junuc ajolic xchi'uc ti Abimeleque, jun sjol yo'nton ta atojolic ti stuque.

²⁰ Yan ti mi mu jechuque, ¡tiluc junuc c'oc' yu'un ti Abimeleque yo' jech ta stubbe sc'oplal scotol ti jnaclejetic ta Siqueme xchi'uc ti ta Bet-miloe! Jech xtoc loc'uc talel jun c'oc' ta Siquem ta Bet-milo ta stojol ti tubatuc ti sc'oplal eque.”

²¹ C'alal laj yo'nton ta yalel ti va'i s'elan taje, ti Jotame jatav batel ti bat nacluc ta Beere, yu'un ta xi' yu'un ti Abimelec ti ja' xchi'il ta voq'uele.

²² Oxib jabil sjalil laj spas ta mantal israeletic ti Abimeleque.

²³ Ja'uc ti Dios une laj stic'be pucuj ta sjol ta yo'nton ti Abimeleque xchi'uc ti jnaclejetic ta Siqueme yo' jech ta xlic scontrain sbaic.

²⁴ Ja' jech stojol laj yich' ti Abimeleque ti mal yu'un xch'ich'el ti laj yac' ta milel ti lajuneb xchanvinic (70) ta vo' xnich'nab ti Jerobaale, ti ac'bat stojic ec ti jnaclejetic ta Siqueme, ti lec ya'iic coltavanique.

²⁵ Ti jnaclejetic ta Siqueme, oy viniquetic snac'ojan sbaic yu'unic ta te'tic ti ta xelc'anic scotol ti jxanviletic ta x'ech'ic ta bee. Jech ti Abimeleque laj ya'i scotol ti va'i s'elan taje.

²⁶ Oy jun c'ac'al, ti Gáal xnich'on ti Ebede, talic ta Siquem xchi'uc ti xchi'iltac ta voq'uele. Ti jnaclejetic ta Siqueme laj yac' sjolic ta stojol.

²⁷ Va'i un, oy jun c'ac'al ti loq'uic batel ta stsobel uva ta osiltic ti lic smeltsanic vino xchi'uquique. Lic spasic jun muc' ta q'uin, ti ta xve'ic ta x'uch'obajic ta xch'ulna ti diosetic yu'unique, ti sbiseluc xa ta cotol chaval yu'unic ti Abimeleque.

²⁸ Xi ta xalolan ti Gaale: “¿Buch'u la ta sbis sba yaloj ti Abimelec taje? Ja' no'ox jun xnich'on ti Jerobaale, mu yanuc. Ti Zebul xtoque, ja' jun yajcoltaobba. ¿C'u j'elantic ta xiyil ti ochemotic ta mosovil yu'unic li' ta Siqueme? Ac'o smosovinotic ti Hamor ti buch'u laj sliques ti jnaclejetic li' ta Siqueme, ma'ucuc ti Abimeleque.

²⁹ ¡Quere, ti vu'unucun banquilalun avu'unique, ta jliquel no'ox ta jch'aybe sc'oplal ma' ti Abimelec jechuque!” Ma'uc no'ox taje, yu'un xi lic yalilane: “¡La' un, Abimelec, tsobo talel ti avinictaque, la' tsacvanan ta leto un!”

³⁰ Ti Zebule, ti its'inal ajvalil yu'un ti jteclume, ti c'alal laj ya'i ti va'i s'elan ta xalolan ti Gaale, lic socuc sjol,

³¹ ti xi s'elan xcholet laj stacbe batel mantal ta stojol ti Abimelec ti oy ta Arumae: “Ti Gáal xnich'on ti Ebede talic xchi'uc xchi'iltac ta voq'uel li' ta Siqueme, ti syaquilic xa ta soquesbeic yo'nton ti jnaclejetic li' ta jteclume yo' ta scontrainot.

³² Ja' yu'un un, la'ic no'ox ta ac'ubaltic xchi'uc ti avinictaque, nac'o abaic ta osiltic.

³³ C'alal ta xtoy talel ti c'ac'al ta yoc'omale, ba tsaco ta leto ti jnaclejetic ta jteclume. C'alal ta xtal stsacoxuc ta leto xchi'uc svinictac ti Gaale, paso ta stojolic ti c'usi lec ta xava'ie.”

³⁴ Ja' yu'un un cha'e, ti Abimeleque xchi'uc scotol ti svinictaque, loq'uic batel ta ac'ubaltic. Bat snac' sbaic ta sjoylej ti Siqueme, ti chanvoc' to xch'acoj sbaic ech'ele.

³⁵ C'alal loc' batel ta ti' moc yu'un jteclum ti Gaale, jech ti Abimelec xchi'uc ti svinictaque xc'uletic loq'uel talel ti bu nac'ajtique.

³⁶ C'alal jech laj yil ti Gaale, xi laj yalbe ti Zebule: —¡Q'uelo avil ti le' ta vitse, xlametic no'ox yalel tal epal soldadoetic! —Mu'yuc chquile —xi laj stac' ti Zebule—. Squeoval no'ox vits ti co'ol xa s'elan ti oy buch'u xlamet ta xyal talel ta xavile.

³⁷ Ja'uc ti Gaale xi lic yalilane: —¡Ja' jech xtoc ti ta stselej ti sbiinoj ‘Xmixic' banomil’ yu'unique, xc'uletic no'ox talel epal soldadoetic ta xyalic talel! ¡Xlamet talel jvoc' ta sbelel Tulan yu'un ti jt'unvanejetique!

³⁸ —¡C'opojan to ca'itic un, ti mu ch'an xi'uc ta betbunel ti avee! —xi laj yal ti Zebule—. Yu'un laj avalilan, “¿Buch'u ya'yiel ti Abimelec ti ochemotic ta mosovil yu'une?” ti xachie! Li' xa vololic ti viniquetic ti mu'yuc stu laj ava'ie. ¡Loc'an batel un cha'e, ba tsaco ta leto un.

³⁹ Ti Gaale jba'be ech'el yu'un ti jnaclejetic ta Siquem ta stsaquel ta leto ti Abimeleque.

⁴⁰ Ja'uc le' une, nutsat yu'un ti Abimeleque, ti jatav ti Gaale. Ti ta sti' smocal ti jteclume, ep buch'u xchamic.

⁴¹ Ti Abimeleque com ta Aruma. Ja'uc ti Zebule laj sten loq'uel ti Gaale xchi'uc ti xchi'iltac ta voq'uel ta Siqueme.

⁴² Ta yoc'omal un, ti c'alal laj ya'ibe sc'oplal ti Abimelec ti ta xloq'uic batel ta osiltic ti jnaclejetic ta Siqueme,

⁴³ lic spas ta oxch'ac ti svinictaque. Laj snac' sbaic ta osiltic. C'alal laj yilic ta xloq'uic batel ta jteclum ti jnaclejetic ta Siqueme, loq'uic talel ta anil ti bu nac'ajtique. Lic stsaquic ta leto.

⁴⁴ Jech ti stuque xchi'uc ti jvoc' xchi'iltaque, xbitic no'ox batel ta sjamel sti' smocal ti jteclume. Ja'uc ti cha'voc' xchi'iltaque sts'otetic ta stsaquel ta leto, ta smilel ti buch'utic tanijemic ta osiltique.

⁴⁵ Mal c'ac'al yu'un ta ac'-leto ti Abimelec ta Siqueme ja' to ti c'uxi laj yu'nine. Va'i un, lic slilin ti jteclume. Laj smilbe scotol ti jnaclejetic yu'une, ti mu'yuc c'usi lec laj sta ti jteclume.

⁴⁶ C'alal laj ya'iic ti jnaclejetic ta Migdal-siquem ti va'i s'elan laj spas ti Abimeleque, bat snac' sbaic ta ch'ulna yu'un ti El-berit ti lec bajale.

⁴⁷ C'alal laj ya'i ti Abimelec ti tsobol scotolic snac'oj sbaic ti bu taje,

⁴⁸ xvoletic batel xchi'uc scotol ti svinictac ta vits Salmone. Laj sboj ta eq'uel jun c'ob te' ti laj scajan ech'el ta snequebe. Laj yalbe ya'i scotol ti svinictaque ti ac'o jech spasic ta anil jech c'u cha'al laj spas ti stuque.

⁴⁹ Scotolic laj sbojic jujun c'ob te' yu'unic. Xvoletic batel ta spat ti Abimelec c'alal to ch'ulna ti lec bajale. C'ot sbusanic scotol ti c'ob te'etique, laj stsanbeic sc'ac'al. Ja' jech laj smilic scotol ti jnaclejetic ta Migdal-siqueme. Oy nan jmiluc (1,000) ta vo' viniquetic xchi'uc ti antsetique.

⁵⁰ Ts'acal to un, ti Abimeleque laj stam batel sbe c'alal to ta Tebes. Laj xchapan sba ta stsaquel ta letoe, laj yu'nin.

⁵¹ Ta o'lol yu'un ti jteclum taje, oy jun natil luchlebal ti bu laj snac' sbaic scotol ti jnaclejetic yu'une, c'alal ta vinic ta antsetic. Laj smaquic lec ti ti' nae. Muyic batel c'alal to ta sjol.

⁵² Ja'uc ti Abimeleque c'ot c'alal to sti' ti natil luchlebale. Ta xa ox sjumbe sc'ac'al,

⁵³ ja' o jun ants laj sjip yalel jun stanal mulino ti tuc' c'ot ta sjol ti c'alal baj yalele. Toj voq'uel c'ot sjol yu'un ti Abimeleque.

⁵⁴ Ti Abimeleque laj sta ta iq'uel ta anil ti yajcuch-abtejebale, ti xi laj yalbee: “Loq'ueso ta ora ti avespadae, milun, yu'un mu jc'an ti ta x'ale jc'oplal ti laj smilun jun antse.” Va'i un, ti yajcuch-abtejebale laj xenbe ti espadae, ja' jech c'ot chamuc.

⁵⁵ C'alal laj yilic ti israeletic ti cham xa ti Abimeleque, sut batel ta snaic.

⁵⁶ Ja' jech tojbat yu'un Dios ti Abimelec ti spajebal xa o chopol ti c'usi laj spas ta stojol stote, ti laj smil ti lajuneb xchanvinic (70) ta vo' ti xchi'iltac ta voq'uele.

⁵⁷ Yu'un tojbatic yu'un Dios ti jnaclejetic ta Siquem scotol ti c'u yepal ac'vanic ta milele. Ja' jech xtoc c'ot ta pasel ti lamal c'ot ta sbaic ti biseic ta cotol chaval yu'un ti Jotame, xnich'on ti Jerobaale.