Jueces 8 - Bible in Tzotzil de Chamula

Ti ajvaliletic yu'un ti madianitaetique ochic ta c'abal yu'un ti Gedeone

¹ Snitilultac ti Efraine ilinic. Laj svul sbaic xchi'uc ti Gedeone ti mu'yuc xtaeic ta iq'uel yu'un ti c'alal bat stsaquic ta leto ti madianitaetique.

² Ja'uc ti stuc une xi laj staq'ue: —¿Mi mu xavilic ti vo'oxuque ti xjelav to ti c'usi laj apasique, ti ja' mu sta ti vu'une? Yu'un ti c'usi juteb laj apasique xjelav to tun ta j'ech'el, ja' mu sta ti c'u yepal laj jpascutique.

³ Ti Orebe xchi'uc ti Zeebe, ja' ti banquilaletic yu'un ti madianitaetique, ja' laj yac'boxuc ta avoc ta ac'obic ti Diose. ¿C'usi laj jpas ti stac' ta jco'oltas o xchi'uc ti c'usi laj apasique? C'alal laj ya'iic snitilultac ti Efraín ti va'i s'elan sc'op ti Gedeone, lamaj ti sc'ac'al yo'ntonic ta stojole.

⁴ Ja'uc ti Gedeone xchi'uc ti vo'lajunvinic (300) ta vo' ti svinictaque, c'otic ta uc'um Jordán. Ech' xtuch'ic ac'o mi mu x'ech' ti lubel ta xa'iic ta snutsel ti yajcontraique.

⁵ Ti ta Sucote, xi laj yal ti Gedeón ti laj sc'anbe ti jnaclejetic teye: —Avocolicuc, ac'beic jutebuc sve'elic ti buch'utic li' jchi'uc talele, ja' ti mu x'ech' ta xa'iic ti lubele. Yu'un loq'uemuncutic ta slubiel ta be ta snutsel ti ajvaliletic yu'un ti madianitaetique, ja' ti Zebae xchi'uc ti Zalmunae.

⁶ Ja'uc ti banquilaletic ta Sucote xi laj staq'uique: —¿Mi yu'un li' xa achucojic talel ti Zebae xchi'uc ti Zalmunae yo' jech ta jmalq'uincutic ti avinictaque?

⁷ Xi tac'batic yu'un ti Gedeone: —C'alal mi laj xa ox yac'bun ta coc ta jc'ob Dios ti Zebae xchi'uc ti Zalmunae, ta xisut talel. Ta jyayijes ta jot'el ti abec'talic ta ch'ix te' ti ta xch'i ta sbajtical banomile.

⁸ Loc' batel ti bu taje, c'ot ta Penuel. Jech c'ot sc'an jech c'u cha'al laj sc'an ta Sucote. Jech tac'bat sutel yu'un ti jnaclejetic ta Penuel jech c'u cha'al tac'batic yu'un ti jnaclejetic ta Sucote.

⁹ Xi tac'batic yu'un ti Gedeone: —¡C'alal mi tsalvanemun xa lisut talele, ta jip yalel ta lum ti natil luchlebal le'e!

¹⁰ Ja'uc ti Zebae xchi'uc ti Zalmunae oyic xa ta Carcor xchi'uc nan vo'lajunmiluc (15,000) ta vo' ti svinictaque, ti ja' xa jech yepal com ti svinictac ti liquemic talel ta sloq'ueb c'ac'ale. Yu'un chamic vacvinic ta mil (120.000) ta scotolic.

¹¹ Ti Gedeón eque xvolet batel ta be ti ta x'ech' sjoy ta sbajtical banomil ta sloq'ueb c'ac'al yu'un ti Nobae xchi'uc ti Jogbehae. Ch'ayal yo'ntonic c'ot stsac ta leto ti bu vololic ta lamleje.

¹² Ja'uc ti Zebae xchi'uc ti Zalmunae, ta anil jatavic loq'uel, ti nutsbilic batel ti taeic ta tsaquel yu'un ti Gedeone. Bat xch'ulelic ta xi'el scotol ti soldadoetic yu'une.

¹³ C'alal sut talel ta ac'-leto ti Gedeón tey ta sbelel Herese,

¹⁴ laj sloc'obin ta be jun querem vinic ti liquem talel ta Sucote. Laj xchechilan ta j'ech'el ti jamuc ye sti' ta yalele. Xcholet laj stsacbe ech'el sbiic ti vuclajuneb xchanvinic (77) ta vo' banquilaletique, xchi'uc ti moletic ti oy ta Sucot ti laj yac' ech'el ti querem vinic ta stojol ti Gedeone

¹⁵ Va'i un, ti Gedeone bat ta Sucot, ti xi c'ot yalbe ti jnaclejetic ta lum taje: —¿Mi xana'ic to ti laj quich'cutic na'leel ta scoj ti mu'yuc to ox ochem ta coc ta jc'obcutic ti Zebae xchi'uc ti Zalmunae? ¿Mi xana'ic to ti laj ajalanbeic pan ti jvinictac ti c'alal mu x'ech' ta xa'iic ti lubel ti laj avalic ti mu'yuc quic'ojcutic talel ti cajchucbolalcutique? ¡Li' oy avie!

¹⁶ Va'i un, ti Gedeone laj stsac ti ch'ix te'e, xchi'uc ti ch'ix ti ta xch'i ta sbajtical banomile, ti ja' laj stsits o xchi'uc ti moletic ta Sucote.

¹⁷ Ja' jech xtoc laj sjip yalel ta lum ti natil luchlebal ta Penuele. Laj smil ti jnaclejetic yu'un ti jteclum taje.

¹⁸ Laj taj une, xi lic sjac'be ti Zebae xchi'uc ti Zalmunae: —¿C'u s'elan sat ti viniquetic ti laj amilic ta Tabore? Ti stuquique xi laj staq'uique: —Xco'olaj asatic yilel. Yu'un ti jujunique co'ol s'elan xnich'on ajvaliletic yilel.

¹⁹ Va'i un, ti Gedeone xi x'avet xa liquele: —¡Ja' jchi'iltac ta voq'uel! ¡Laj amilic ti bats'i jchi'iltac ta voq'uele! Ti jech cuxul ti Dios ta j'ech'ele, ti manchucuc laj amilique, mu'yuc ta xamiloxuc tana ti jechuc eque.

²⁰ Ta jech yepal, xi laj spas ta mantal ti Jeter ti sbanquilal nich'one: —¡Va'lan batel, milo ya'iic le'e! Ti jech querem vinic to ti Jetere, mu'yuc xnicaj sc'ob ta snitel loq'uel ti yespadae.

²¹ Va'i un, ti Zeba xchi'uc ti Zalmunae xi laj yalbeic ti Gedeone: —¡Miluncutic ti vo'ot une! ¡Yu'un mi tsatsal vinic xava'i abae, quere, toj yalel yu'un ti yoc sc'obe, ma'uc no'ox ti ye xvulvune! Jech ti Gedeone va'i batel, laj smil. Laj yu'nin ti c'usitic jun yutsiquil yuinoj scamello ti Zebae xchi'uc ti Zalmunae.

²² Va'i un, ti israeletique xi laj yalbeique: —Ti jech laj xa apojuncutic ta yoc ta sc'obic ti madianitaetique, ta jc'ancutic ti ta xa'ochic ta ajvalil cu'uncutic xchi'uc ti anitilultaque.

²³ Ja'uc ti Gedeone xi laj staq'ue: —Mi ja'uc ti vu'une, mi ja'uc ti jnich'nabe, ti ta xi'ochcutic ta ajvalilal avu'unique. Yu'un ja' ac'o spasoxuc ta mantal ti Dios avu'unique.

²⁴ Ti c'usi no'ox ta jc'anboxuque, ac'beicun talel ti xotajtic oro ti c'u yepal laj ataic talele. Ti xotajtic oroe, toj c'upil sba xa'iic ta stunesel ti jcontrainvanej soldadoetic ti liquemic talel ta sbajtical banomile.

²⁵ Ja'uc ti israeletique lic sq'uiic mochibal c'u'il ta banomil. Lic sbusanic ta sba ti ixtolal c'abal ti c'u yepal laj staique, ti xi laj yalbeic ti Gedeone: —Li' oye.

²⁶ Ti laj stsob sba ta scotol ti ixtolal c'abal ti meltsanbil ta oro ti loc' ta chapele, jutuc mu laj sta balunlajuneb (19) kilo ti yalale. Mu'yuc tsacbil ta chapel ti c'usitic nichimtic sbae, ti c'upil sbae, xchi'uc ti yax'elan xela c'u'il ti yich'ojic batel ti ajvalil madianitaetique, mi ja'uc ti c'usitic jun yutsiquil yuinoj batel ti scamelloique.

²⁷ Ta sventa ti oro taje, ti Gedeone laj yac'be o ta xnichimal ti jayal saquil c'u'il ti laj yac' ta meltsanele, ti lic yac' ta Ofra ta slumal stuque. Lic yanijuc yo'ntonic scotol israeletic ta stojol Dios ta scoj ti laj yich' nichimtasel ti jayal saquil c'u'ile. Lic joybijuc ta spets'al ti Gedeón xchi'uc ti yalab xnich'nabe.

²⁸ Ja' jech c'ot ta pasel ti pasbilic ta mantal c'ot ti madianitaetic yu'un ti israeletique, ti j'ech'el mi ja'uc xa oy bu laj stoy sbaique. Cha'vinic (40) jabil sjalil lamajem ti c'op ta jteclum c'alal cuxul to ox ti Gedeone.

Cham ti Gedeone

²⁹ Ja'uc ti Jerobaale, ti Gedeón sbie, bat nacluc ta sna stuc.

³⁰ Laj yilbe sat lajuneb xchanvinic (70) ta vo' xnich'nab, yu'un mu albajuc yepal ti yajniltaque.

³¹ Ti ants ti oy yu'un ta Siqueme, laj yilbe sat jcot squerem ti laj yac'be sbi Abimeleque.

³² Lec xa mol talel cham ti Gedeone. Bat smuquic ta muquinal ti bu mucul ti Joás ti ja' stote, ta jteclum Ofra ti ja' slumalic ti jchop snitilulil ti Abiezere.

³³ Ta ts'acal to un, ti c'alal chamem xa ox ti Gedeone, jech ti israeletique lic xch'ac sbaic ta stojol ti Diose yo' jech lic snijan xchiman sbaic ta yich'el ta muc' ti ep ta tos sloc'obbailtac ti Baale. C'ot ta t'ujel yu'unic ta xrioxinel ti Baal-berite.

³⁴ Laj sten loq'uel ta yo'ntonic ti Ajvalil Dios yu'unique, ti pojatic yu'un ti c'alal joyobtabilic yu'un ti yajcontraique.

³⁵ Yu'un mu'yuc c'usi bal o laj ya'iic ti oy c'usi lec pasbatic yu'un xnich'nabtac ti Jerobaale, ja' ti Gedeón sbie.