Jueces 6 - Bible in Tzotzil de Chamula

Ta xtae ta iq'uel yu'un Dios ti Gedeone

¹ Ja'uc ti israeletic une chopol lic spasic ta sba ta sat ti Diose. Yu'un vucub (7) jabil sjalil aq'ueic ta yoc ta sc'ob madianitaetic yu'un ti Diose.

² Ti jech tsatsajem yilbajinelic yu'un madianitaetic ti israeletique, ti ta x'ac'batic xi'el yu'une, jech o xal laj smeltsanic snac'obbailic ta vitsetic, ta nail ch'enetic, xchi'uc ti bu xa vocoltic ta xvinajique.

³ Ti c'usiuc no'ox ta sts'unic ti israeletique, ta xtal pojbaticuc yu'un ti madianitaetique, ti amalecitaetique, xchi'uc ti jnaclejetic ti oyic ta sloq'ueb c'ac'ale.

⁴ Xc'uletic no'ox ta slaman sbaic ta yosilal ti Israele, ti mu'yuc c'usi ta xictaic comel ti c'usitic ts'unbile. Ta xc'ot c'alal to yosilal ti Gazae. Mu'yuc c'usi ta x'ictabatic comel ti c'usi ta stun ta slajesic ti israeletique. Mi ja'uc ta x'ictabatic comel ti chije, ti vacaxe, ti burroe.

⁵ Yu'un lot'ajtic no'ox yu'unic ti yaxibal naique. Xc'ulet no'ox yu'un ti chon bolometic ta soquesel ti jteclume. Mu'yuc c'usi ta xictaic comel jutebuc. Mu no'ox albajuc yepal ti scamelloic ta xtale, co'ol s'elan junuc j'ilbajinvanej c'ulub ti xc'ulet ta j'ech'ele.

⁶ Ta scoj ti madianitaetique, ep svocolic ta me'unal mu'natil ti israeletic une. C'ot ta pasel ti lic sc'anic scoltaelic ta stojol ti Diose.

⁷ C'alal laj sc'anic spojel scoltaelic yu'un Dios ti israeletic ta scoj ti madianitaetique,

⁸ tacbatic talel jun j'alc'op ti xi albatic yu'une: “Xi ta xal ti Ajvalil Dios yu'un ti Israele: ‘Laj jloq'uesoxuc talel ta Egipto ti bu to ox tiq'uiloxuc ta mosovile.

⁹ Ma'uc no'ox ti laj jpojoxuc laj jcoltaoxuc loq'uel ta yoc ta sc'ob ti egipcioetique, yu'un laj jpojoxuc jcoltaoxuc ta yoc ta sc'ob ti buch'u ta xayilbajinoxuque. Ti ta aba ta asatic laj jten loq'uel ti stuquique. Laj cac'boxuc avu'ninic ti sbanomilique.

¹⁰ Yu'un laj ono'ox calboxuc ava'iic ti vu'un ti Ajvalilune, ti Diosun avu'unique, ti mu xaxi'ic yu'un sdiosic ti amorreoetic li' ta banomil ti bu nacaloxuc avi tanae. Ja' no'ox un, mi ja'uc laj avich'beicun ta muc'.’ ”

¹¹ Va'i un, vul ta loq'uel yaj'ánjel ti Diose. Vul chotluc ta yolon tulan ti oy ta Ofrae, yu'un ti Joás snitilul ti Abiezere. Ja'uc ti Gedeone, xnich'on ti Joase, ta nac'al ta sjic'a strigo ta yavil ti bu ta xich' pits'el ti uva sventa ti vinoe, yo' jech mu x'ile yu'un ti madianitaetique.

¹² Ti yaj'ánjel Diose xi laj yal ti laj yac' sba iluc ta stojole: —¡Ti tsatsal vinicot xava'i abae, ti mu xana' xaxi'e, li' xchi'inojot ti Diose!

¹³ Ti Gedeone xi laj staq'ue: —Ati jsoques la avo'nton tanae, yojtot, ati li'uc la xchi'inojuncutic ti Diose, ¿c'u la cha'al ti vi s'elan ta xc'ot ta jtojolcutic scotol le' un cha'e? ¿Bu bat scotol ti c'usitic ch'ayal ta xc'ot o'ntonal yu'un ti muc'tic ta spas ti Diose, ti c'alal laj yalic ti jmolmuc'totcutic ti ja' laj sloq'uesuncutic talel ti Dios ti oyuncutic ta Egipto ti xiique? Yu'un ta xquilcutic ti laj xa stenuncutic comel ti Diose. Laj xa yac'uncutic ta yoc ta sc'ob ti madianitaetique.

¹⁴ Q'uelat batel yu'un ti yaj'ánjel Diose, ti xi albate: —Tuneso ti yipal ti oy avu'une yo' jech ta xapoj ti israeletic ti oy ta yoc ta sc'ob ti madianitaetique. Yu'un vu'un ta jtacot batel.

¹⁵ Ja'uc ti Gedeone xi laj xcha'taq'ue: —Ati jsoques la avo'nton yan velta xtoque, yojtot. Ja'uc le' une, ¿c'usi ta xcut ta jpoj ti Israele? Yu'un ti jchop jnitilultaque, slajebal xa ti toj me'un mu'nat ta stojol snitilultac ti Manasese, xchi'uc slajebalun xa c'ox its'inalun ta sna ti jtote.

¹⁶ Xi tac'bat yu'un ti yaj'ánjel Diose: —Xu' avu'un, yu'un ta jchi'inot. Co'ol no'ox s'elan jun vinic ta xava'i ta stsutsesel scotol ti madianitaetique.

¹⁷ Va'i un, xi laj stac' ti Gedeone: —Ti mi jech ta xc'ot ta jtojol avu'un ti va'i s'elan taj une, ac'bun quil senyail ti ta melel vo'ot laj ac'oponune.

¹⁸ Avocoluc un, li' to malaune. Mu to xasut batel ja' to ti mi lisut talel xchi'uc ti matanal ti loc' ayan ta co'nton ta yac'belote. —Li' ta jmalaot ja' to mi latale —xi laj stac' ti yaj'ánjel Diose.

¹⁹ Jech ti Gedeone bat, lic xchapan ta meltsanel jcot ch'in tentsun, xchi'uc jtob (20) litro juch'bil ninal trigo. Lic smeltsan pan ti ch'abal yich'oj ti spajubtasobile. Laj taj une, laj xch'am ech'el ta moch ti beq'uete, xchi'uc xchechoj ech'el ta bin ti scaltoale. Scotol laj yich' batel ti bu teq'uel ti tulane.

²⁰ Albat mantal yu'un ti yaj'ánjel Diose ti ac'o scajan ta ba ton ti beq'uete, xchi'uc ti pan ti ch'abal yich'oj ti spajubtasobile, ti ac'o smal ta sba ti scaltoale. C'alal jech laj spas ti Gedeón jech c'u cha'al albat ti mantale,

²¹ jech ti yaj'ánjel Diose laj sye' batel ti xvaxtone. Tijil c'ot yo' bu oy ti beq'uete xchi'uc ti pan ti ch'abal yich'oj ti spajubtasobile. Til talel c'oc' ta ton. Laj xchic' scotol ti beq'uete, ti pane. Ta jech yepal, ti yaj'ánjel Diose sac ch'ay batel ta sat.

²² Ti jech laj yil ti Gedeón ti ja' yaj'ánjel Diose, xi lic yale: —¡Mu xa ono'ox cha'beluc un, Cajval, mu xa cha'bel un, Cajval! ¡Yu'un laj xa quilbe jba jsatcutic xchi'uc ti yaj'ánjel Diose!

²³ Ja'uc le' une, xi tac'bat yu'un ti Diose: —Mu xaxi', yu'un mi ja'uc ta xacham. Tsaco ich'o ti slamajemal yutsilal ti co'ntone.

²⁴ Va'i un, ti Gedeone lic smeltsan jun altar ti bu taje, sventa yich'obil ta muc' ti Diose, ti laj yac'be sbiin “Ti Diose, ja' jlamajesej c'op”. Avi tana ti altar taje, yoquel to xvinaj ta Ofra ta steclumal snitilultac ti Abiezere.

²⁵ Ta yac'ubalil no'ox taje, xi albat yu'un Dios ti Gedeone: —Nito talel jcotuc tot vacax yu'un ti atote. Nito talel xtoc jcot tot vacax ti yich'oj vucub jabile. Jinesbo yaltar ti Baal ti ja' yu'un ti atote. Ja' jech xtoc, jipo yalel ta lum ti bisbil ta cuxul te' ti teq'uel ta sts'el yaltar ti Baale.

²⁶ Va'i un, ti bu stac' jutuc ta yac'ol ti lican ch'entic ta vits taje, meltsano junuc altar sventa ti Ajvalil Dios avu'une. Nito talel ti jcot tot vacaxe, chic'bun ta jventa, ti ja' ta si'ilin avu'un ti bisbil ta cuxul te' ti laj alomese.

²⁷ Va'i un, ti Gedeone laj yic' talel lajunvo' (10) yajtuneltac ti lic spas scotol jech c'u cha'al albat yu'un ti Diose. Ja' no'ox un, ma'uc ta c'ac'altic ti jech laj spas taj une. Yu'un ta ac'ubaltic laj spasilan ta scoj xi'el yu'un yuts' yalal ti stote, xchi'uc ti viniquetic ta jteclume.

²⁸ Va'i un, sob xa ta yoc'omal un ti c'alal lic ti jnaclejetic ta jteclume, ja' to laj yilic ti jinesbil xa yaltar ti Baale, ti ts'etbil xa ti cuxul te' ti sbisojic ti nopol teq'uel ta sts'el ti altare. Ma'uc no'ox taje, yu'un laj yilic ti laj yich' chiq'uel ta matanal jcot tot vacax ta sba ti jun ach' altare.

²⁹ Xi xa lic sjac'olanbe sbaic ta jujun tale: “¿Buch'u xa ono'ox ti jech laj spas le'e?” C'alal ech' xa yo'ntonic ta sa'olanel ta sjac'olanele, laj ya'iic ti ja' laj spas ti Gedeone, xnich'on ti Joase. Batic ta stojol ti Joase, ti xi laj yalbeique:

³⁰ —Loq'uesbuncutic talel ti anich'one, yu'un ta jmilcutic. Yu'un laj xa sjinesbe yaltar ti Baale. Laj xa sts'et ti cuxul te' ti teq'uel ta sts'el ti altare.

³¹ Ja'uc ti Joase xi laj stac'be ti c'u yepal joyolic ta sts'ele: —¿Mi yu'un ta xava'an abaic ta spojel ti Baale, ti ta xaliquesic leto yu'une? ¡Yu'un ti buch'u ta sva'an sba ta spojel ti Baale, chamem ta sacub ti c'alal mu to ta sacub talel ti osile! Yan mi ja' Dios ti Baale, ch'an utic, ac'o spoj sba stuc, ipaluc ti ja' yu'un stuc ti altar ti jinesbate.

³² Ja' o lic biinuc talel yu'unic Jerobaal ti Gedeone, ti xi lic yalilanique: “Ac'o spoj sba stuc ti Baale.” Yu'un ti Gedeone laj sjinesbe yaltar ti Baale.

³³ Va'i un, scotol ti madianitaetique, ti amalecitaetique, xchi'uc ti jnaclejetic ti oyic ta stuq'uil sloq'ueb c'ac'ale, laj svol sbaic ta jmoj ti ech' xtuch'ic ti uc'um Jordane. C'ot slaman sbaic ta stenlej yu'un Jezreel.

³⁴ Ja'uc ti Gedeone lic ventainatuc yu'un xcuxlejal ti Diose. Lic yoq'uisan xulub chij yo' ta stsob sbaic talel yu'un snitilultac ti Abiezere.

³⁵ Ja' jech xtoc laj stac batel j'al-mantaletic yo' ta xic' talel scotol snitilultac ti Manasese yo' jech ta stsob sbaic xchi'uc. Ja' jech xtoc laj stac batel j'al-mantaletic ta stojol ti Asere, ti Zabulone, xchi'uc ti Neftalie yo' jech ta stsob sbaic ta jmoj xchi'uc.

³⁶ Jech ti Gedeone xi lic yalbe ti Diose: “Mi ta melel ti vu'un ta xatunesun ta jpojvanej yu'un ti Israel jech c'u cha'al avaloje,

³⁷ va'i unbi, ti bu ta xich' majel ti trigoe, ta jlich'an jlicuc nuculil chij ti putsul ta stsotsile. Mi ta melel t'uxijem ta job ac'ubal ti tsots ta jta ta sob ic'lumane, ti ja' taquin ti banomile, jech ta jna' ti ta xitun ta spojel ti Israel jech c'u cha'al avaloje.”

³⁸ Jech ono'ox c'ot ta pasel ti va'i s'elan taj une. C'alal sob xa lic ti Gedeone, laj spits' ti nuculil chij ti lich'il ta job ac'ubal ti putsul ta tsotse. Loc' jun taza ya'lel ti job ac'ubale.

³⁹ Manchuc mi jech un, xi lic yalilan ti Gedeone: “Mu xa'ilin ta jtojol ti xivulvun no'ox liquele. Ja'uc le' une, ta jc'an ta xavac'bun to quil junuc velta senyail. Avi tana une, ti taquin comuc ti tsotse, ti ja' t'uxluc ta job ac'ubal ti banomile.”

⁴⁰ Ti jech ac'ubal taje, jech laj spas ti Diose. Yu'un ti c'alal sacub ta yoc'omale, ti tsotse, taquin. Ja'uc ti banomile, ja' t'uxijem ta job ac'ubal.