Jueces 5 - Bible in Tzotzil de Chamula

Sq'uejimolic ti Déborae xchi'uc ti Baraque

¹ Ti jech c'ac'al taje, xi s'elan q'uejinic liquel ti Déborae xchi'uc ti Barac xnich'on ti Abinóame:

² “Acotolicuc lequil c'optaic ti Diose, yu'un oy to viniquetic li' ta Israele ti chapalic ta ac'-letoe, yu'un li' ta scotol ti jteclume, oy to viniquetic ti xchapanoj sbaic ti ic'bilic ta ac'-letoe.

³ A'yibeicun me ava'iic lec, banquilal ajvaliletic, ts'etanbun ani' achiquinic, ajvaliletic. Ta jq'uejinta ti Ajvalile, ta jq'uejinta ti Dios yu'un ti Israele.

⁴ “Dios, c'alal laloc' talel ta Seire, c'alal lac'ot ta yosilal ti Edome, nic ti banomile, c'uy ti vinajele, xchajet no'ox talel vo' yu'un ti toque.

⁵ Ti vo'ote, Ajvalil, Dios yu'un ti Israele, nic avu'un ti vitsetique, c'uy avu'un ti Sinaie.

⁶ C'alal yorail ochem ta pas mantal ti Samgare, xnich'on ti Anate, c'alal ja' o tiq'uil ta spas mantal ti Jaele, jech ti jxanviletique laj yictaic comel xaniel ti muc'tiquil beetique, ja' laj stamic batel ta xaniel ti chopol bic'tal beetique.

⁷ Ti bic'tal lumetic ta Israele sts'ijlajan com scotol. Ja' yu'un un, ja' o yorail lic jva'an jba ti vu'un Déboraun ti lic'ot ta me'il yu'un ti Israele.

⁸ “C'alal xyaquet ti leto ta sti'tac ti jteclume, mu ta vocoluc ti oy buch'u laj sa' yan sdiosique. Ja'uc le' une, mu xvinaj mi junuc macobbail, mi junuc lanza ta stojol ti cha'vinic ta mil (40,000) ti israeletique.

⁹ “Xvulvun jol co'nton yu'un ti banquilal jtsobvanejetic yu'un ti Israele ti laj xch'unic iq'uel ti jteclum ta ac'-letoe. Acotolicuc, lequil c'optaic ti Ajvalil Diose.

¹⁰ “Xi s'elan alic ti vo'oxuc ti xacajetic ta sac pojan me' burroe, ti vo'oxuc xachotetic ta lequil chotlebale, xchi'uc xtoc ti vo'oxuc ti xanviloxuque:

¹¹ Ti ta yuch'ob vo' ti chije, ti c'alal ta xava'iic ta xbac' ti set set taq'uine, albeic sc'oplal ti tsalvan xa ti Diose, ti tsalbil xa c'ot ti bic'tal lumetic ta Israele.

¹² “Mu teyuc no'ox xach'ayet un, Débora, mu teyuc no'ox xach'ayet, mu teyuc no'ox xach'ayet, lic q'uejinta o junuc q'uejimol. Jech ti vo'ote, Barac xnich'onot ti Abinóame, va'lan. lican, ic'o batel ti avajchucbolaltaque.

¹³ “Va'i un, yalic talel ti israeletique, tal stsaquic ta leto ti tsatsaquil viniquetique. Jchi'inoj yalel talel ti yajsoldadotac ti Diose yo' ta spasic leto xchi'uc ti j'ac'-leto viniquetique.

¹⁴ Oy jun chib svinictac ti Efraine yalic batel ta stenlejal, nabal talel ta spatic svinictac ti Benjamine. Snitilultac ti Maquire yalic talel ti banquilaletic yu'unique; snitilultac ti Zabulone yalic talel ti ajvalil yu'unique.

¹⁵ Ti banquilaletic yu'un ti Isacare xchi'inojic batel ti Déborae. Ti Isacare c'ot ta scoltaobba ti Baraque, ti nabal batel ta spat c'alal to stenlejale. “Ti jvoc' yu'un ti Rubene, oy muc'tiquil viniquetic ti chapalic ta ac'-letoe.

¹⁶ ¿C'u cha'al ti lapal comic une, ti xchiquin no'ox xa'iic ta xic' talel xchij ti j'il-chijetique? Yu'un ti jvoc' svinictac ti Rubene oy muc'tiquil viniquetic ti toj ven xi'ique.

¹⁷ “Ti jvoc' yu'un ti Galaade xjoyet com ta jot uc'um Jordán. Ti jvoc' yu'un ti Dan xtoque com ti bu cotajtic ti barcoe. Ti jvoc' yu'un ti Asere com ta q'uixin osil ti oy ta sti'il nabe; mu'yuc stots batel ti bu oye.

¹⁸ Ja'uc snitilultac ti Zabulone, ti Neftalie, ti nacalic ta vitstique, laj sjip laj sten ti xcuxlejalique.

¹⁹ “Va'i un, ti ajvaliletique talic ta Taanac, c'otic ta sts'el vo'etic yu'un ti Meguidoe. Ti ajvaliletic yu'un ti cananeotique nopbil talel lec yu'unic ti ac'-letoe, ja'uc le' une, mu'yuc laj staic ech'el ti platae, ti ja' sc'ulejalique.

²⁰ Ta vinajel to, ti oy ta toyole, xvic'lajet no'ox liquel ti c'analetique, lic stsaquic ta leto ti Sisarae.

²¹ Scotolic ti j'ac'-letoetique, beq'ueic ech'el yu'un ti uc'ume, ti vo'neal uc'ume, yuc'umal ti Cisone. Ti vo'ote ta xapech'be ta teq'uel snuc' ti tsatsaquil viniquetique.

²² “Ta yobibil, ta yobibil ta x'anilaj ti pisetel ca'etique. Xc'ojlajet no'ox ti svoye.

²³ Xi laj yal ti yaj'ánjel Diose: ‘C'otuc tsots bac vocol ta stojol ti Meroze xchi'uc ti jnaclejetic yu'une.’ Yu'un mu'yuc laj sbis sbaic ta tsatsal viniquetic ta scoltael ti Diose.

²⁴ “Yu'un stucuc no'ox junuc yutsil c'otuc sc'oplal ti ants Jaele, ja' ti yajnil Heber ti quenita vinique. Stucuc no'ox junuc yutsil c'otuc sc'oplal ti ants ta scotol ti yan antsetic ti oyic ta axibal nae.

²⁵ Laj sc'an vo' ti Sisarae, chu' vacax ac'bat yuch' yu'un ti Jaele. Ac'bat talel tatal chu' vacax ta jun muc' ta lequil taza.

²⁶ Va'i un, laj stam talel jun pajob-te' ta sts'et c'ob. Tsots laj smaj yalel ta smajobil pajob te' ti oy ta sbats'i c'obe; tsots laj sc'ojbe yalel ta sjol ti Sisarae, voc' sjol, toj jelavel ta jot ti pajob te'e.

²⁷ Ti Sisarae xbalomaj xa ta yoc ti Jaele; sjip sten sba ta lum yu'un ti xc'uxule, ti bu yal ta lume, puch'ul com.

²⁸ “Oy xa ta at-o'nton sme' ti Sisarae, ti xi ta xal ti ta sq'uel loq'uel ti ventanae: ‘¿C'u cha'al jalij ti scarretae? ¿C'u cha'al jalij ta jmec ti scarreta sventa ac'ob-letoe?’

²⁹ Tac'bat yu'un jlom antsetic ti xac' sjolic ta snopele, ja' yu'un un, xi ta xalolanbe sba ti stuque:

³⁰ ‘Ta jbel sc'oplal, ja' nan ta xch'acolanbe sbaic ti c'u s'elan laj spasic canal ta ac'-letoe. Ja' nan ta xch'acbe sbaic jun tojol tseb, mi chib, ti jujun j'ac'-letoetique. Ja'uc ta sventa ti Sisarae, ja' nan ta xch'acbe sbaic ti ep ta tos ti yich'oj sbontac ti poq'uetic ti xi s'elan oye: ti luchbil ep ta tos ti snoale, mi jlic, mi cha'lic ta xich'ic ti jujune, ti ta xich' lich'anbel ta snequeb ti jtsalvaneje.’

³¹ “¡Jechuc yich' tsutsesbel sc'oplal ti avajcontrae, Dios. Yan ti buch'u c'ux ta xaya'iote, xojobinuc ti yutsilalique jech c'u cha'al xtixixet no'ox xojobal ti c'ac'al ta j'ech'ele!” C'alal ech' taj une, cha'vinic (40) jabil ch'abal c'op ta banomil ti bu taje.