Jueces 3 - Bible in Tzotzil de Chamula

Ti jteclumetic ti comic tey ta Canaane

¹ Li'e, ja' sc'oplal ti jteclumetic ti oy ta banomil ti mu'yuc xtijatic ta c'op yu'un ti Diose yo' jech ta xq'uelbat yo'ntonic ti israeletic ti mu'yuc to ox voq'uemic ti c'alal laj yich' u'ninel ti jteclum Canaane.

² Mu'yuc xtijatic ta c'op yu'un ti Diose, sventa yo' ta xchanic yaq'uel leto ti buch'u mu'yuc yilojic jutebuc ti ac'-letoe.

³ Yu'un mu'yuc xtijatic ta c'op ti vo'ob banquilaletic yu'un ti filisteoetique, scotol ti cananeoetique, ti sidonioetique, xchi'uc ti heveoetic ti nacalic ta svitsal Líbano ti ta xlic batel ta vits Baal-hermone, ti c'ot c'alal to ti bu ta x'ech' sts'ac ti Hamate.

⁴ Ti jech comic taje, yo' jech ta xq'uelbat yo'ntonic ti israeletic ti vinajuc mi ta xch'unbat ti smantaltac ti ac'batic comel ta sventa Moisés ti smolmuc'totique.

⁵ Jech o xal un, ti israeletique jmoj lic naquiicuc xchi'uc ti cananeoetique, ti hititaetique, ti amorreoetique, ti ferezeoetique, ti heveoetique, xchi'uc ti jebuseoetique.

⁶ Ti squerem stsebic ti israeletic une lic yajnilin smalalin sbaic xchi'uc squerem stsebic ti lumetic taje, ti lic yich'beic ta muc' ti diosetic yu'unique.

Ti Otoniele laj stic' sba ta spojel ti israeletic ti oyic ta yoc ta sc'ob ti Cusan-risataime

⁷ Ti c'usitic laj spasic ti israeletique, chopol laj yil ta sba ta sat ti Diose. Yu'un tenbil c'ot ta o'ntonal yu'unic. Lic yac'beic yipal ta yich'el ta muc' ti yalel toyol sloc'obbail ti Baale xchi'uc ti Astartee.

⁸ Jech o xal ilin ti Dios ta stojolique. Lic tic'aticuc ochel ta yoc ta sc'ob ti Cusan-risataime, ajvalil yu'un ti Mesapotamia lume. Yu'un vaxaquib jabil sjalil, tunesatic ti pasbilic ta mantal ti israeletic yu'un ti Cusan-risataime,

⁹ ja' to ti c'uxi xvocoletic liquel ta stojol Dios ti oyuc buch'u ta sva'an talel ta spojelique. C'ot ta pasel ti vul ta loq'uel ti jpojvanej yu'une. Ti jpojvanej ti vul ta loq'uel yu'une, ja' ti Otoniele, xnich'on ti Quenaze, xc'ox its'in ti Caleb ti xi c'ot ta pasele:

¹⁰ Ti Otoniele, vul ta stojol xcuxlejal ti Diose. Laj xchapan sbaic lec yu'un ti israeletique. Loc' batel ta ac'-leto ti tsalbil c'ot ta sventa Dios ti Cusan-risataim yu'une.

¹¹ Ti jech c'ot ta pasel taje, cha'vinic (40) jabil sjalil ti lamajem ti c'op ta banomil taje. C'alal chamem xa ox ti Otoniele,

Ti Aode ta stic' sba ta spojel ti israeletic ti oyic ta yoc ta sc'ob ti Moabe

¹² ti israeletique lic no'ox spasic chopol yan velta ta sba ta sat ti Diose. Jech o xal ti Eglone, ajvalil yu'un ti moabitaetique, ac'bat yip yu'un Dios ti jelavem xu' yu'une, ti peq'uel c'ot ti israeletique.

¹³ Ti Eglón une laj svol sc'opic xchi'uc ti amonitaetique, ti amalecitaetique, ti lic stsaquic ta leto ti Israele, ti laj yu'ninic ti jteclum yu'un ti xantique.

¹⁴ Vaxaclajuneb (18) jabil sjalil ti pasbilic ta mantal ti israeletic yu'un ti Eglone.

¹⁵ C'alal xvocoletic liquel ta stojol ti Diose, laj stac talel ti oy buch'u tal sva'an sba ta spojelique. Ti jpovanej tal taje, ta ts'et c'ob sna' xc'abalij, ti sbiinoj Aode, xnich'on ti Gerae, snitilul ti Benjamine. Oy jun c'ac'al, ti israeletique laj staquic batel ta yaq'uel patanil ti Aod ta stojol ti Eglone.

¹⁶ Ja'uc ti Aod une laj smeltsan jun espada ti cha'jot ye yich'oje, ti oy nan o'loluc metro ti snatile, ti xchuquinoj batel ta yolon sc'u' ta sbats'i c'obe.

¹⁷ Va'i un, laj yich' batel ti patanil ta stojol ti jubem vinic Eglone.

¹⁸ C'alal laj xa ox yac' comel ti patanil ta stojol ti Eglone, loq'uic batel xchi'uc ti buch'utic xchi'uc batel ti Aode.

¹⁹ Ja'uc ti c'alal c'ot ti bu va'al ti loc'tabil dios ta nopol Gilgale, lic xpux sutel yoc ti Aode, ti xi c'ot yalbe ti Eglone: —Ja' ta melel, Jcuch abtel, quich'oj talel mantal ta atojol ti ta mucul sc'an ta xcalbote. Jech ti ajvalile laj yalbe mantal ti ac'o xch'ac sbaic jliqueluc ti yajtuneltaque, ti loq'uicuc batel ta stojole.

²⁰ C'alal com xa stuquic ti Aode xchi'uc ti Eglón ta xchotleb ta yut sna sventa corixmae, nopaj batel ti xi laj yalbe ya'ie: —Ti mantal quich'oj talel ta atojole, Jcuch abtel, ja' ta sventa ti Diose. C'alal jech laj ya'i ti Eglón taje, va'i ta anil ti bu chotole.

²¹ Ja'uc ti Aod ti ta ts'et c'ob sna' xc'abalije, laj snit loq'uel ti yespada ta sts'et c'ob ti xchuquinoj ta jot sbats'i xocone. Laj spajbe ta xch'ut ti Eglone.

²² Ta sjunul yip laj spajbe ti ma'uc no'ox och ti yee, och batel xchi'uc sjunul ti yacane. Jech ti Aode mu'yuc xa laj sloq'ues ti espadae. Mu xvinaj, mucul com ti espada ta xch'ut ta scoj ti jubem ti Eglone. Mu ja'uc xa laj snit loq'uel ti Aode.

²³ Ts'acal to un, ti Aode laj smac ti ti' nae. Laj sc'atanbe jelavel ti taq'uin sventa smacobile. Lic viluc loq'uel ta ventana.

²⁴ C'alal loq'uem xa batel ti Aode, talic ti yajtuneltac ti ajvalile. C'alal laj yilic ti bajal ti ti' nae, laj snopic ti laj sbaj sba ta yut ti corixmail na yo' ta xpaxyaje.

²⁵ Ta ts'acal to un, ti c'alal jal xa laj smalaic ta jmec ti mu'yuc ta xloc' talel ti ajvalile, lic svul yo'ntonic. Va'i un, laj stsaquic ti yavie. C'alal laj sjamique, telel xa ta lum ti yajvalic laj staique.

²⁶ C'alal xch'ayetic to ti stuquique, ti Aode jatav xa ox batel. C'alal jelav batel ti bu va'ajtic ti loc'obbail ta Gilgale, bat snac' sba ta jteclum Seirat.

²⁷ C'alal c'ot ta yosilal ti israeletique, lic yoq'uisan xulub chij ta vits yu'un ti Efraine yo' jech ta stsob talel ti israeletique. Scotolic yalic talel ti ta vitse, ti ja' jba'be batel yu'unic ti Aode.

²⁸ Ti Aode laj yal ti ac'o ts'acliatuc batele, yu'un ac'bat yu'un Dios ta stsalel ti yajcontraique, ja' ti amonitaetique. Va'i un, ts'acalic batel. Laj yu'ninic ti banomil ti oy ta slomlej uc'um Jordane. Mu'yuc buch'u junuc ta xaq'uic ochuc batel.

²⁹ Ti jech c'ac'al taje, laj smilic jutuc van mu lajunmiluc (10,000) ta vo' moabitaetic ti scotolic banquilal soldado xa'i sbaique, ti tsots yo'ntonique. Mi ja'uc junuc ti oy buch'u cuxul col batel yu'unique.

³⁰ Ja' jech c'ot ta pasel ti laj stsalic moabitaetic ti israeletique. Ts'acal to un, jalij chanvinic (80) jabil ti mu'yuc c'op ta banomil ti bu taje.

Ti Samgare ta stic' sba ta spojel ti israeletic ti oyic ta yoc ta sc'ob ti filisteoetique

³¹ Ti xchibal jpojvanej ti lic sva'an sbae, ja' ti Samgar xnich'on ti Anate. Ta sbaquil no'ox yolon ye vacax, laj smil o vaquib ciento (600) ta vo' ti filisteoetique. Ja' jech laj spoj Israel ti Samgare.