Jueces 20 - Bible in Tzotzil de Chamula

Lic sjolic ti israeletic yu'un ti oy buch'u mile ta Gabaae

¹ Va'i un, scotol ti israeletique, co'ol s'elan jun no'ox vinic, lic stsob sbaic ta sba ta sat Dios ti ta Mizpae, ti liquic talel ta Dane, ti ta Beersebae, ti ta Galaade.

² Scotolic ti banquilaletic yu'un ta jujuvoc' snitilultac ti Israele, xvoletic no'ox liquel. Laj stsob sba chanib ciento ta mil (400,000) soldadoetic ti ta yoc ta xanavic batel steclumal ti Diose.

³ Ja'uc snitilultac ti Benjamine, laj ya'iic ti laj stsob sbaic ta Mizpa ti jayvoc' snitilultac ti Israele. Jech ti israeletique laj sjac'beic ti levita ti c'u s'elan c'ot ta pasel ti oy buch'u chame.

⁴ Ti levita, smalal ti animae, xi lic yale: —Lic'ot xchi'uc cajnil ta Gabaa ti ja' snitilul ti Benjamine yo' jech ta x'ech' cu'uncutic ti ac'ubale.

⁵ Ti jech ac'ubal taje, tal sjoyibtaic pat xocon na ti jnaclejetic teye, ti oy ta yo'ntonic ta xismilicun ox ya'iic ti bu jch'amunoj ti nae. C'ot ta pasel yu'unic ti laj yilbajinbeicun ti cajnile, ti cham yu'unic ta yilbajinele.

⁶ Va'i un, laj jcuch batel ti animae. Lic jbic'tal bojilan. Ti jujuxete, laj jtac batel ta scotol ti jteclume yo' jech ta xc'ot ta sni' ta xchiquinic scotol Israel ti spajebal o ti c'usi chopol laj spasique.

⁷ Avi tana une, ti vo'oxuc israeloxuque, oy ta abaic ta snopel ta xchapanel ti c'usi sc'an pasele.

⁸ Co'ol s'elan jun no'ox vinic, va'i scotolic, ti xi laj yalique: —Mi junuc cu'uncutic ti oy buch'u ta sut batel ta yaxibal na, mi ta sna.

⁹ Ti c'usi sc'an ta jpastique, la' jq'ueltic buch'u ta xc'ot yorail ti xbat stsac ta leto ti Gabaae.

¹⁰ Ti jujun ta lajlajunvo' viniquetic ti ta scotol ti jujuvoc' nitiluletique, ta sbainic ta sa'bel sve'el ti j'ac'-letoetique. Ja'uc ti yane xbat yac'beic stoj ti Gabaa ti oy c'usi mu lecuc laj spas ta stojol ti Israele.

¹¹ Co'ol s'elan jun no'ox vinic, laj stsob sba scotolic ti israeletique yo' jech xbat stsaquic ta leto ti yajval jteclume.

¹² Laj staquic batel jun chib j'al-mantal j'ich'-c'opetic ti xi bat yalbeic ta sbejel yosilal ti snitilultac ti Benjamine: “¿C'usi sta o ti jlom avu'unic ti mu no'ox albajuc ti c'usi chopol laj spase?

¹³ Ac'o talel ta coc ta jc'obcutic ti buch'utic mu'yuc xch'ulel ti c'usi ta spasic ta Gabaae yo' jech ta xich' milel, yo' jech mu x'epaj ti mulil ta stojol ti Israele.” Ja'uc snitilultac ti Benjamine mu'yuc xch'unbeic sc'op ti xchi'ilic ta israelale.

¹⁴ Snitilultac ti Benjamine c'ajomal no'ox laj stsob scotol xchi'iltac ta jteclume. Laj svol sbaic ta Gabaa yo' ta stsaquic ta leto ti yan israeletique.

¹⁵ Ti soldadoetic ti laj xchapan sbaic ta steclumaltac ti Benjamine, loc' ta chapel vaquib xcha'vinic ta mil (26,000) ti mu'yuc laj stsaquic ta chapel ti vucub ciento (700) ta vo' viniquetic ti laj st'ujic ta Gabaae.

¹⁶ Ti ta scotol ti va'i yepal ti viniquetique, oy vucub ciento (700) ta vo' ti lec xtojobic ta sjimel jimich' ta sts'et c'obique. Ac'o mi jbej ta sat jolil, mu jutebuc stselbuj yu'unique, lec ta sc'ojbeic ti tone.

¹⁷ Ja'uc ti yan israeletique laj stsobic chanib ciento mil (400,000) ta vo' j'ac'-letoetic ti mu sna' xi'ique.

Tsacatic ta leto snitilultac ti Benjamine

¹⁸ Ti israeletique batic ta Betel. Ti bu taje, lic sjac'beic Dios buch'u jvoc'ucal nitilulil ti ba'yel ta sliques stsaquel ta leto snitilultac ti Benjamine. Ti Diose laj yal ti ja' ba'yel ta xbat tsacvanicuc ta leto snitilultac ti Judae.

¹⁹ Ja' yu'un un, ti israeletique sob xa liquic, bat slaman sbaic ta yeloval Gabaa.

²⁰ Laj svol sbaic batel ta scontrainel snitilultac ti Benjamine, ti vololic ta yeloval Gabaa ti chapalic xa lec ta ac'-letoe.

²¹ Ja'uc snitilultac ti Benjamine loq'uic talel ti ta jteclume, ti laj smilic chib xcha'vinic ta mil (22,000) israeletic ti jech c'ac'al taje.

^22-23 Yu'un ti jvoc' israeletique muyic batel ta Betel, ti yich'ojic ic'ub ta yoq'uitael sbaic ta stojol ti Diose, ti xi lic sjac' sbaique: “¿Mi ta jtsac jbacutic ta letovajel xchi'uc snitilultac ti Benjamín ti jvinquilel jbacutic xchi'uque?” Xi albatic yu'un ti Diose: “Muyanic batel ta stsaquel ta leto ya'iic.”

²⁴ Jech o xal ti israeletique nopajic batel ta sts'el ti bu lamalic snitilultac ti Benjamín ta xchibal c'ac'ale.

²⁵ Tal tsacvanicuc ta leto ta xchibal velta snitilultac ti Benjamín ta Gabaae. Laj smilic vaxaclajunmil (18,000) ta vo' soldado israeletic.

²⁶ Va'i un, scotol ti soldado israeletique xchi'uc scotol ti jteclume, yan to velta, sutic batel ta yoq'uitael sbaic ta stojol ti Diose. Sjunul c'ac'al mu'yuc ve'el yu'unic. Laj yac'beic chic'bil matanal xchi'uc milbil matanal sventa lajesobil o'ntonal yu'un ti Diose.

^27-28 Yu'un ti tey ta Betele, oy ta stojol israeletic xcaxail strate ti Dios ti jech c'ac'al ta vo'ne taje. Yu'un ja' o yacal ta x'abtej ti Finees xnich'on ti Aarón ta stojolal ti trate ti jech c'ac'al ta vo'ne taje. Jech o xal ti israeletique lic sjac'beic ti Diose, ti xi laj yalique: “¿Mi ta to xbat jtsac jbacutic ta leto xchi'uc snitilultac ti Benjamín ti jvinquilel jbacutic xchi'uque? ¿Mi tey no'ox c'alal ti net'bil ta xicomcutique?” Xi albatic yu'un ti Diose: “Ba tsaquic ta leto ya'iic. Ta xc'ot ta pasel cu'un ti tsalbil ta xc'ot avu'unic ti oc'ome.”

²⁹ Va'i un, oy jlom soldado israeletic bat snac' sbaic ta joyob ta spat xocon ti Gabaae.

³⁰ Ja'uc ti yan xtoque xvoletic batel ta yoxibal c'ac'al ta stsaquel ta leto snitilultac ti Benjamine, ti laj sjil sbaic ti co'ol xa s'elan ta stsacvanic ta leto yilel ta yeloval Gabaa jech c'u cha'al laj spasic ta xchibal veltae.

³¹ Yan to no'ox velta xtoc un, snitilultac ti Benjamine loq'uic batel ta jteclum, ti namajic batel ta stsaquel ta leto ti israeletique. Laj staic ta milel lajuneb xcha'vinic (30) ta vo' israeletic ta osiltic ta sbelel Betel ti ta xlic batel ta Gabaae.

³² Laj snopic ti yan to velta jatav xa yu'unic ti israeletic ti tsalbil xa c'ot yu'unic jech c'u cha'al laj spasic chib veltae. Ac'o mi jech s'elan laj spasic yilel ti israeletic une, yu'un ja' ta sbalinic ti ta xnamajic loq'uel ta jteclum ti jech nutsbil ta xbatic ta be yu'un ti yajcontraique.

³³ Ta jech no'ox yepal un, loq'uic talel ta anil israeletic ti bu jililic xchapanoj sbaic ta tsacvanej ta leto ta Baal-tamare. Ja'uc ti buch'utic nac'ajtic ta osiltic ta sjoyobtael ti Gabaae, loq'uic talel ta anil ti bu nac'ajtique.

³⁴ Laj stsaquic ta leto ti yajval lume. Lajunmil (10,000) ta vo' banquilal j'ac'-leto yu'un israeletic ti laj stsaquic ta leto ti Gabaae. Toj tsots laj stsac sbaic ta leto, ti mu ja'uc sna'ic snitilultac ti Benjamín ti yorail xa tsalbil ta xc'otique.

³⁵ Ti israeletique, ac'bat yipic yu'un Dios ta stsalel snitilultac ti Benjamine. Ti israeletique laj smilic vo'ob xcha'vinic ta mil (25,000) soldadoetic yu'un snitilultac Benjamín ti jech c'ac'al taje.

³⁶ Va'i un, snitilultac ti Benjamine laj yilic ti tsalbil xa c'otique. Ta naca sta loq'uic ech'el ti yan israeletic ti ta x'ac'batic yu'un snitilultac ti Benjamine, ja' ti c'otem ta yo'ntonic ta xu'ninic Gabaa ti viniquetic ti nacal comique.

³⁷ Ti viniquetic taje, ch'ayal yo'ntonic c'ot stsaquic ta leto ti Gabaae, ti laj smilic ta espada scotol ti jnaclejetic ta jteclume.

³⁸ Ti nac'al comic ta stsaquel ta leto ti jteclume, xchapoj lec sc'opic xchi'uc ti jvoc' israeletique, ti tometuc no'ox muyel ch'ail yu'unic ta yaq'uel iluc svinajeb ti och xa ta yoc ta sc'obic ti jteclume.

³⁹ C'alal yorail ta xilic xtomet ta xmuy ch'ail ti israeletic ti co'ol xa s'elan jatvilic batel yilele, ta jech to yepal, lic xpux talel yoquic ta stsaquel ta leto snitilultac ti Benjamine. Snitilultac ti Benjamine laj to staic ta milel lajuneb xcha'vinic (30) ta vo' israeletic ti laj spat yo'ntonic ti yac'toicuc ti cuch xa yu'unic yan velta jech c'u cha'al letovajic ta ba'yele.

⁴⁰ Ja'uc le' une, ja' o xa xtomet liquel xch'ailal ti jteclume. C'alal laj sq'uel sutel svalopatic snitilultac ti Benjamine, laj yilic ti c'alal to vinajel xtomet ta xmuy xch'ailal ti jteclume.

⁴¹ Mu'yuc xa xi'el lic tsacvanicuc ta leto ti israeletique. Snitilultac ti Benjamine lic xi'icuc ti c'alal laj yilic ti c'ot xa ta stojol ti ta stsutsic ta j'ech'ele.

⁴² Jatvil xa loq'uic batel ta stojol ti israeletic ti stamojic batel sbelel ti sbajtical banomile. Mi ja'uc xa colic, yu'un macbil ta be ta xc'ot yu'un ti buch'u ta xloq'uic talel ta jteclume, ti milatique.

⁴³ Snitilultac ti Benjamine, joyibtabilic c'otic yu'un ti israeletique, ti nutsbilic batique, ti lubibil c'otic ta be ta Menuhá ti oy ta yeloval sloq'uel c'ac'al yu'un ti Guibeae.

⁴⁴ Ja' jech c'otic ta chamel vaxaclajunebmil (18,000) ta vo' soldadoetic snitilultac ti Benjamine.

⁴⁵ Ti yan xtoque xvoletic sutic talel ta spatic, ti jatvil loq'uic talel ta sbajtical banomil ti ta stuq'uil lican ch'entic yu'un ti Rimone. Lajic ta milel vo'mil (5,000) ta vo' ta be. Ja'uc ti israeletique ochem yipal yu'unic ta snutsel ti yane, ti laj yilbeic svocol ta milel yan cha'mil (2,000) ta vo' viniquetique.

⁴⁶ Ti ta scotol ti lajic ta milel ti jech c'ac'al taje, vo'ob xcha'vinic ta mil (25,000) banquilal soldadoetic snitilultac ti Benjamine.

⁴⁷ Ja'uc le' une, vaquib ciento (600) ta vo' snitilultac Benjamín ti laj stambeic batel jatobal ta sbajtical banomile. Comic chanib u ta lican ch'entic yu'un ti Rimone.

⁴⁸ Ja'uc ti israeletique lic stsaquic ta leto no'ox xtoc ti jlom snitilultac ti Benjamine. Laj smilic ta cuchilu ti jnaclejetic ta jujun jteclume, ti naca smilic no'ox batel ti chon bolometique, ti c'usiuc no'ox ta staic batel ti bu x'ech'ique. Laj stsanbeic sc'ac'al ti jteclumetique.