Jueces 2 - Bible in Tzotzil de Chamula

Ti yaj'ánjel Dios ti laj yac' sba iluc ta Boquime

¹ Ti yaj'ánjel Diose loc' batel ta Gilgal, bat ta Boquim, ti xi laj yalbe ya'iic ti israeletique: “Laj jloq'uesoxuc talel ta Egipto. Laj quic'oxuc talel ta banomil li'e, ti calojbe ono'ox ya'iic sc'oplal ti amolmuc'totic ti xichie: ‘Mu xch'ay ta be cu'un ti jtrate ti laj cac' ta atojolique.

² Yavil ti mi mu xapas atrateic xchi'uc ti jnaclejetic li' ta banomile, ti mi c'ajomal no'ox ta xlic alilinbeic ti altaretic yu'unique.’ Ja'uc le' une, mu'yuc xach'unbeicun. ¡Mu cha'beluc unbi, q'uelo avilic ti c'u s'elan laj apasic une!

³ Jech o xal un, xi ta xcalboxuc ava'iic tana li' une: Mu'yuc ta jten loq'uel ta atojolic ti jteclume. Yu'un ta xata avocolic xchi'uc ti ja' apets'alique, ti mu stac' a'yeluc c'usi ta xavut abaic xchi'uc ti sdiosique.”

⁴ C'alal laj yo'nton ta c'opojel ti yaj'ánjel Diose, scotol ti israeletique lic sjambeic snuq'uilal ta oq'uel.

⁵ Jech o xal ti bu taje, laj yac'beic sbiin Boquim. Lic yaq'uic matanal ta stojol ti Diose.

Cham ti Josuee

⁶ C'alal laj yo'nton ta lo'il ti Josuee, laj xch'ac sbaic xchi'uc ti israeletique. Ta jujun tal batic ta yosilic ti bu c'ot ta yorail yu'unique.

⁷ C'alal cuxul to ox ti Josuee, c'alal cuxul to ox com ti moletic ti buch'utic jmoj xvoletic xchi'uc ti Josuee, ti laj yilic scotol ti ep ta tos ti ch'ayal ta xc'ot o'ntonal yu'un ti Dios sventa spojelique, jech ti israeletique, jun yo'ntonic ta spasic ti c'u s'elan yich'el ta muc' ti Diose.

⁸ C'alal cham ti Josuee, yich'oj xa ox lajuneb svacvinic (110) jabil.

⁹ Laj smuquic ta sbanomil stuc, ta Timnat-sera, ti oy ta yolon ti yolon xocon sloq'ueb c'ac'al yu'un ti vits Gaas ta vitstic yu'un ti Efraine.

¹⁰ Chamic scotol xtoc ti israeletic ti buch'utic jmoj xanavic xchi'uc ti Josuee. Ja'uc ti buch'u jts'acal jch'iel jc'opojeletique, mi ja'uc xa ta staic ta na'el ti Diose. Mi ja'uc sna'beic sc'oplal ti yabtel ti laj stic' sba ta spojel ti israeletique.

Ti israeletique ta svalopatinic comel ti Diose

¹¹ Ti c'usitic lic yesilanic ta spasel ti israeletique, chopol laj yil ta sba ta sat ti Diose. Yu'un lic snijan xchiman sbaic ta yich'el ta muc' ti yalel toyol sloc'obbail ti Baale.

¹² Laj yictaic comel ti Ajvalil Dios yu'un ti smolmuc'totic ti loq'uesatic talel ta Egiptoe. Lic snaban sbaic ta yich'el ta muc' ti diosetic yu'un ti jnaclejetic ti joyol ta spat ta xoconique. Lic sliquesbeic sc'ac'al yo'nton ti Dios ti jech taj une.

¹³ Laj stenic comel ta yich'el ta muc' ti Diose. Ochic ta yich'el ta muc' ti Baale, xchi'uc ti yalel toyol sloc'obbail ti Astartee.

¹⁴ Jech o xal ti Diose lic ilinuc ta stojol ti israeletique. C'ot ta pasel yu'un ti pojbatic yu'un j'eleq'uetic ti c'usi oy yu'unique. Sq'ueloj xa no'ox sbaic ti xvolet talel ti scontraic ti oy ta spat ta xoconique. Mi ja'uc xa c'usi xut sba ta spoj sbaic ti tsacbilic ta letoe.

¹⁵ C'alal jujun velta xbat tsacvanicuc ta letoe, ta xlic contrainaticuc yu'un ti Diose. Mi ja'uc oy c'usi lec ta xc'ot ta loq'uel yu'unic ti c'alal jech ono'ox albilic yu'une. Ac'o mi staojic lec svocolic yu'un Dios ti israeletique,

¹⁶ ti Diose laj taluc yu'un jtsobvanejetic yo' ta xpojatic ti ilbaj x'utatic yu'un ti j'ilbajinvanejetique.

¹⁷ Ja'uc ti israeletic une mu'yuc laj yich'ic ta muc' ti jtsobvanejetic yu'unique. C'ajomal no'ox yanijem sjol yo'ntonic ta stojol ti Diose, ti lic yesinic ta yich'el ta muc' ti yan diosetique. Ja'uc ti smolmuc'totique laj xch'unbeic smantaltac ti Diose. Yan ti israeletique mu'yuc laj sts'acliic ta spasel ti c'u s'elan ech'ique.

¹⁸ Ti ta jujun velta ti ta stac talel jtsobvanej ti Diose, ta xcoltaatic yu'un. Ti c'u sjalil ta xcuxi ti jtsobvaneje, ta stic' sba ta spojel ti israeletic yu'un ti yajcontraic ti jelavem xu' yu'unique, yu'un ta xc'uxubaj yo'nton. Ta xa'i ti x'ajlajetic yu'un yipal ti svocolique.

¹⁹ Ja'uc le' une, c'alal ta xcham ti jtsobvaneje, ta xlic soques sbaic, ti x'ech' to xjelav ti c'usi chopol ta spasique, ja' mu to sta ti stot sme'ique, ti xnijiletic xchimiletic ta xich'ic ta muc' ta xac' sbaic ta tunel yu'un ti yan diosetique. Mi ja'uc ictabaj ta xa'iic ta spasel ti c'usi chopole. C'ajomal no'ox yac'ojbeic yipal ti mu xa'ibeic xchiquinale.

²⁰ Jech o xal un, ti Diose ta j'ech'el lic sc'ac'al yo'nton ta stojol ti israeletique, ti xi laj yalbe ya'iique: “Ti jteclum li'e, mu xaq'uic ta venta ti jtrate ti laj jpas ta stojol ti smolmuc'totique. Mi ja'uc sc'an xiyich'icun ta muc'.

²¹ Ja' yu'un un cha'e, mu'yuc ta jten loq'uel mi jchopuc ti jteclumetic ti oy ta stojolique, ti mu'yuc ono'ox laj sten loq'uel ti Josué ti c'alal cuxul to oxe.”

²² Ti va'i s'elan taje, ta sc'an ta sq'uel ya'i ti Diose mi ta xlic ts'acliatuc yu'un ti Israel jech c'u cha'al laj spasic ti smolmuc'totic ta ba'yele, mi mo'oj.

²³ Jech o xal un, ti Diose mu'yuc laj sten loq'uel ta ora ti muc'tiquil lumetic ti mu'yuc laj yac' comel ta sc'ob ti Josuee. Yu'un c'ajomal no'ox laj yac' ye sti' ti comicuc ta nacleje.