Jueces 19 - Bible in Tzotzil de Chamula

Laj yic' yan ants ti levitae

¹ Ti yorail ta vo'ne taje, ti c'alal ch'abal ajvalil yu'un ti Israele, ta vitstic ti oy ta yosilal ti Efraine, oy jun levita vinic ti nom to nacal ti stuque. Laj yic' yan ants ti nacal ta Belén ti oy ta Judae.

² Ja'uc le' une, lic yut sbaic xchi'uc ti smalale. Bat nacluc xchi'uc stot ta Belén. C'alal ech' xa ox chanib u sc'otel ti antse,

³ jech ti levitae bat sa' ta slajesbel yo'nton yo' jech ta xcha'ic' sbaic yan velta. Laj yic' batel jun smosov xchi'uc cha'cot sburro. Ich'bil ta muc' c'ot ti vinic yu'un ti ants ta sna ti stote.

⁴ Xmuyubaj xa ti totile laj yic' ochel ta yut sna. Laj yalbe ya'i ti xu' ta xcom ta stojolique. Jech ti levita xchi'uc ti smosove comic oxib c'ac'al ta sna stot ti yajnile, ti lic ve'icuc uch'ubajicuque, ti x'ech' xjelav no'ox yu'unic ta xa'iic ti ac'ubale.

⁵ Ta sacubel osil ta xchanibal c'ac'ale, sob xa liquic yo' ta stam batel sbeic. C'alal ta xa xloq'uic batele, stot ti tsebe xi laj yalbe ti sni'e: —Ve'an batel, ac'o mi c'ajomal jutebuc uni pan ti c'alal mu to ta xaloc' batele yo' oy lec yipal avu'un.

⁶ Va'i un, xchibalic lic chotiicuc ta ve'el uch' vo'. Laj sc'an stot ti tsebe ti junuc to yo'ntonic ech'uc yu'unic ti jun ac'ubale.

⁷ Ac'o mi jun xa yo'nton ta xbat ti levitae, ti xvulvun ono'ox liquel ta spajtsanvan ti smuni'e, laj to spajes sba.

⁸ Ta yo'obal xa c'ac'al un, sob xa lic ti levitae yo' ta stam batel ti sbee. Yan to velta xtoc, stot ti tsebe laj sc'anbe vocol ti ac'o ve'uc batel jutebuc ti c'alal mu to xloc' batele yo' jech noj lec xch'ut. Tey lic ve'icuc ti jech yich'oj o mal c'ac'al yu'unique.

⁹ C'alal lic xchapan sba ti levitae yo' jech ta xbat xchi'uc ti yajnile xchi'uc ti smosove, albat yu'un ti smuni' ti toy xa ti c'ac'ale, ti mal xa batel ti c'ac'ale. Laj yalbe ti junuc to yo'ntonic ech'uc ti ac'ubal xchi'uque, ti ja'uc to loq'uicuc batel sob ta yoc'omale.

¹⁰ Ti levita vinic une, mi ja'uc laj xch'un pajesel ti ta to x'ech' yu'un ti ac'ubale. Laj stam batel sbeic xchi'uc ti yajnile, ti smosove, xchi'uc ti cha'cot sburro ti lapbil xa ti yavartoe. C'alal c'otic ta yeloval Jebuse, ti Jerusalén xcaltique,

¹¹ ti mosovile xi laj yalbe ti levitae: —¿Mi lec van xava'i ti li' ta x'ech' cu'untic ac'ubal ta steclumalic ti jebuseoetique? Xi laj stac' ti levitae:

¹² —Mu stac' xijbat ta junuc jteclum mi ma'uc ti israeletic teye. Ja' lec batic ta Gabaa.

¹³ Ja' lec cac'betic ech'el yipal yo' ta x'ech' cu'untic ac'ubal ta Gabaa, mi mo'oje, ta Ramá.

¹⁴ Ja' yu'un un, laj stam batel sbeic. C'alal xch'ayet xa ti c'ac'ale, c'otic ta Gabaa, steclumal snitilul ti Benjamine.

¹⁵ Laj sq'uejbun sbaic ta be, ochic batel ta Gabaa yo' jech ta x'ech' yu'unic ti ac'ubale. Ti levitae bat chotluc ta chotlebal ta yamaq'uil ti jteclume, yu'un mu'yuc buch'u ta xac' ta ch'om ti snaic yo' ta xcux ti yo'ntonique.

¹⁶ Ac'ubaltic xa un, ech' jun mol ti sut talel ta yabtel ta yosile. Ti mol taje, co'ol s'elan junuc jcotcovil ti nacal ta vitstic ti oy ta yosilal ti Efraine. Yu'un ti jnaclejetic ti oy ta Gabaae, ja' snitilultac ti Benjamine.

¹⁷ C'alal laj yil ti chotol ta yamaq'uil ti jteclum jun j'ech'el-bee, ti mole xi laj sjac'bee: —¿Bu lalic talel? ¿Bu ta xabat?

¹⁸ Ti levitae xi laj staq'ue: —J'ech'el-beun no'ox. Liliccutic talel ta Belén ti oy ta Judae. Ta xibatcutic ti bu slajeb xa nom ti vitstic yu'un ti Efraín ti bu nacalune. Li'ay ta Belén. Ta xa xisut batel ta jna avi tana une. Mu'yuc buch'u ta xiyac'bun ta ch'om sna ti ta jcux ti co'ntone.

¹⁹ Oy sve'el, sc'ajben ti jburrotaque, oy pan xchi'uc vino cu'uncutic, ti lec xcaltique, ta jve'cutic xchi'uc ti cajnile, ti jmosove. Mu'yuc yan ma' ti oy c'usi sc'ane.

²⁰ Xi tac'batic yu'un ti mole: —Lec ti jech latalique. Ta jbain scotol ti c'usi ta xtun avu'une. Mu lecuc ta xca'i ti li' ta sacub avu'unic ta yamaq'uil ti jteclume.

²¹ Jech ti mole ic'van batel ta sna. C'alal yacal ta xpocbat yacanic ti jxanviletique, ti c'alal yacal xa ta xve'ic ta xuch'ic vo'e, jech ti yajval nae bat yac'be sve'el ti burroetique.

²² C'alal jun yo'ntonic ti mu'yuc c'usi sna'ique, oy jun chib chopol viniquetic ta jteclum ti tal sjoy sbaic ta spat xocon ti nae, ti xi laj yalbeic ti mol ti yajval na ti c'alal spujilanic xa ta majel ti ti' nae: —¡Loq'ueso talel ti vinic ti tal svu'lanote! ¡Yu'un ta jc'an ta jchi'in ca'icutic ta vayel!

²³ Ti yajval nae xi xvocolet xa laj yale: —¡Avocolicuc, jchi'iltac, mu jechuc xapasic! ¡Mu xa'ilbajinvanic! Yu'un ti vinic li'e naca no'ox cajch'om na.

²⁴ A'yio ava'iic, li' oy jun cantsil nich'on ti tojol tseb toe, xchi'uc xtoc li' oy yajnil ti vinique. Ta jloq'uesboxuc talel yo' jech ta xapasic ta stojol ti c'usi lec ta xava'iique. Ch'an utic, mu xapasbeic c'usi chopol ma' ti vinic li'e.

²⁵ Ti stuquique mu xa'iic pajesel yu'un ti mole. Ti levita une laj sten loq'uel ti yajnile. Ti viniquetic taj une, sjunul ac'ubal, laj yutilanic, laj yilbajinic, ja' to ti c'uxi sacube. Va'i un, laj yictaic comel.

²⁶ C'alal sac jaman xa talel ti osile, sut batel ti ants ta sna ti mol ti bu comem ti smalale. Toj chamel c'ot ti yal ta lum ta ti' nae.

²⁷ C'alal lic ti smalale, laj sjam ti ti' nae yo' jech ta stam batel ti sbee, ja' to laj yil ti nujul ta yoc ti' na ti yajnil ti cajal sc'ob ta yoc smarcoal ti ti' nae.

²⁸ Va'i un, xi laj yalbee: —Lican, batic. Mi ja'uc xa tac'av ti antse. Ti stuque laj scajan batel ta sba sburro ti animae. Laj stam batel sbe c'alal to sna.

²⁹ C'alal c'ote, laj stsac jun cuchilu. Lic spas ta lajcha'xet' sbec'tal ti sts'acal-ajnile, ti laj spuc batel ta sjunul steclumal ti Israele.

³⁰ Scotol ti buch'u ta xilique, xi ta xalique: —Mu'yuc xquiltic o ti jech chc'ot ta pasel ti c'u xa sjalil sloq'uelic talel ta Egipto ti israeletique. Sc'an nopel lec c'usi sc'an pasel xchi'uc le'e, capaluc sc'an ti mu teyuc no'ox jq'ueloj jbatic yu'une.