Jueces 17 - Bible in Tzotzil de Chamula

Ti ch'ulna ta stunes stuc ti Micaíae.

¹ Ta vitstic ti ta yosil ti Efraine, nacal jun vinic ti sbiinoj Micaíae,

² ti xi laj yalbe ti sme'e: —Ti buluchib ciento (1,100) ta sep plata taq'uin ti laj aval ti ch'aye, ti laj abis ta cotol chaval sc'oplal ti j'eleq'ue, vu'un bac' coc jc'ob ta yelc'anel. Avie, ta jsutesbot, yu'un laj ca'i ti avac'ojbe xa sventain Dios yo' ta xich' meltsanel dios ti bonbil ta platae. Va'i un, ti me'ile xi tsots laj yale: —¡Ac'o sva'an sba ta atojol ti Diose, col!

³ Ta melel le'e, cac'oj xa ta ventainel ta stojol ti Dios ta sventa ti colote, yo' ta xich' loc'tael loc'obbail dios ti bonbil lec ta plata taq'uine. Avi tana une, ta jsutesbot ec un.

⁴ C'alal laj xa yac'be sutel taq'uin sme' ti Micaiae, jech ti me'ile bat yac' lajunvinic (200) ta sep plata taq'uin ta stojol jun j'unijesej-taq'uin yo' ta smeltsan ta loc'tael jun loc'obbail dios ti bonbil ta plata taq'uine. Ti mi laj une, ta xbat yac' ta sna Micaías ti mi meltsaj xae.

⁵ Ti bu sna ti Micaíase, chapal lec ti bu xlic xcaj ti nijanob chimanobbaile. Laj yac' ta meltsanel luchbil jayal saquil c'u'il, xchi'uc yajdiostac. Lic sva'an ta pale jun ta scotol ti xnich'nabe.

⁶ Ti jech ora vo'ne taje, ja' ta spasic ti c'usi lec ta xa'iic ta jujune. Yu'un mu'yuc to ox banquilal ajvalil yu'unic ti Israele.

⁷ Ti ta jteclum Belene, oy jun jcotcovil querem snitilul ti Judae, ti liquem talel ta stojol ti levitaetique.

⁸ Ti quereme loc' batel ta Belén. Bat sa'ilan ti bu xu' ta xnaquie. Laj xani ech'el ti vitstic ta yosilal ti Efraine, ti c'ot ta sna ti Micaíae.

⁹ —¿Bu lalic talel le' une? —xi jac'bat yu'un ti Micaíae. —Lilic talel ta Belén —xi laj stac' ti quereme—. Ja' jun levitaun ti ta jsa'olan ti bu xu' ta xinaquie.

¹⁰ Xi albat yu'un ti Micaíae: —Coman li' ta jtojole yo' jech ta xa'och ta cajpale. Ta jbisot ta jtot. Ta jtojot lajunsep (10) plata taq'uin ta jun jabil. Ta xcac'bot ac'u' xchi'uc ave'el.

¹¹ Ti levitae lec laj ya'i. Laj xch'un, com nacluc ta sna ti Micaíae, ti bise jech c'u cha'al junuc xnich'one.

¹² Jech ti Micaíae laj stic' ta yajpale, com nacluc ti bu taje.

¹³ Laj snop ti Micaíae, ti j'ech'el laj sva'an sba ti Dios ta stojole, yu'un ja' levita ti ochem ta paleal yu'une.