Jueces 16 - Bible in Tzotzil de Chamula

Ti Sansone oy ta Gaza

¹ Oy jun c'ac'al, ti Sansone bat ta jteclum Gaza. Ti bu taje, laj yil jun ants ti sna' sbolomalin sbae. Och batel ta sna yo' ta x'ech' yu'un ti ac'ubal xchi'uque.

² C'alal laj ya'iic ti jnaclejetic ta Gaza ti oy ta jteclum ti Sansone, sjunul c'ac'al xvoletic batel ti laj stsob sbaic ta spa'iel ta sti' ti jteclume. Ja'uc ti ta ac'ubaltique, bat vayicuc, yu'un laj snopic ti c'alal mi sacubel ti osile, ta smilic.

³ Ja'uc ti Sansone, jun yo'nton puch'ul sta o'lol ac'ubal. Ti jech ora taje, lic ti Sansone. Laj spits loq'uel sti' smocal ti jteclume xchi'uc ti yoyal sc'atlomte'al ti smey xcuchoj batele. Scotol bat yac' ta toyol jol vits ta yeloval ti Hebrone.

Ti Sansone ta xlo'laat yu'un ti Dalilae

⁴ Ts'acal to un, ti Sansone ic'bil c'ot yo'nton yu'un jun ants ti sbiinoj Dalila ti nacal ta stenlejal Soreque.

⁵ Ti banquilaletic yu'un ti filisteoetique xi c'ot yalic ti c'alal bat sq'uelic ti Dalilae: —Lo'labo yo'nton ti Sansone. T'uno ta jac'bel ca'itic bu ta xlic talel ti yipal ti mu albajuc xu' yu'une. Jac'bo ca'itic c'usi ta utel ti tsalbil ta xc'ote yo' jech xu' ta jchuccutic ti mu ja'uc xa ta xcol batele. Ta sventa ti avabtel taje, ta xacac'becutic buluchib ciento (1,100) ta sep plata taq'uin ti jujununcutique.

⁶ Va'i un, ti antse xi laj yalbe ti Sansone: —Avocoluc, albun ca'i bu ta xlic talel ti avipal ti mu albajuc xu' avu'un ta j'ech'ele. ¿Mi oy c'usi ta chuquelot o ti mu xa xu' ta xacolta abae?

⁷ Xi tac'bat yu'un ti Sansone: —Mi ta xischuquicun ta vucbej (7) yaq'uil yolob ti yox toe, ta xch'ay ti yipal cu'une. Ta xic'ot jech c'u cha'al ti yan viniquetic ti mu'yuc c'usi xu' yu'unique.

⁸ Ti banquilaletic yu'un ti filisteoetique laj yich'beic batel vucbej ach' yaq'uil yolob ti Dalilae. Va'i un, ja' laj xchuc o Sansón ti Dalilae.

⁹ Jech ti stuc une scaj-nac'oj xa ono'ox ochel jun chibuc viniquetic ti ta yut na ti xi lic avanuque: —¡Sansón, q'uelo aba yu'un ti filisteoetique! Ja'uc ti Sansone, co'ol to s'elan jun c'aq'uemal balbil poc' laj ya'i ti laj stuch' ti xchucobile. Mi ja'uc laj sna'ic ti filisteoetic ti bu ta xlic talel ti mu albajuc ti yipal yu'une.

¹⁰ Xi albat yu'un ti Dalilae: —¡Laj xa alo'laun! ¡Laj xa ajutilanbun c'op ta j'ech'el! Avi tana une, avocoluc, albun ca'i c'u s'elan ta chuquelot.

¹¹ Xi tac'bat yu'un ti Sansone: —Mi ta xischuquicun ta ach' ch'ojon ti mu'yuc to tunesbile, ta xch'ay ti yipal cu'une. Ta xic'ot jech c'u cha'al ti yan viniquetic ti mu'yuc c'usi xu' yu'unique.

¹² Va'i un, ti Dalila une laj stam jun chibuc ach' ch'ojon, ti laj xchuc o lec xchi'uque, ti xi lic avanuque: —¡Sansón, q'uelo aba yu'un ti filisteoetique! Taj xtoc une, scaj-nac'oj xa ono'ox ochel jun chibuc viniquetic ta sna. Ti Sansón une, co'ol no'ox s'elan jich'il no laj ya'i ti laj xtuch' ti ch'ojone.

¹³ Ti Dalilae xi laj yalbe ti Sansone: —¡Laj alo'laun! ¡Laj ajutilanbun no'ox xtoc! ¡Albun ca'i c'u s'elan ta chuquelot! Xi laj stac' ti Sansone: —Ti c'usi sc'an ta xapase, ta xatsac ta yomel ta pech'el ta snaul jolobil ti vucyom stsotsil jole, ti ta xatsac lec ta chuquel ta pajob-te' ti pajal lec ta banomile. Ja' to jech ta xch'ay ti yipal cu'une. Ta xic'ot jech c'u cha'al ti yan viniquetic ti mu'yuc c'usi xu' yu'unique. Va'i un, ti Dalila une lic yac' vayuc ti Sansone. Lic scapbe ta yomel ta pech'el ta snaul jolobil ti vucyom stsotsil sjole.

¹⁴ Laj taj une, lic spaj lec ta banomil ti pajob-te'e, ti xi lic avanuque: —¡Sansón, q'uelo aba yu'un ti filisteoetique! Ja'uc ti Sansón une, ta jech to yepal va'i liquel ta anil, ti toj bulel c'ot yu'un ti pajob te' ti ja' tey chucul ti yombil lec ta pech'el ta snaul jolobil ti stsotsil sjole.

¹⁵ Xi albat yu'un ti ants une: —¡Jutc'opot ta j'ech'el! ¿C'usi xavut ta xavalbun ti ac'upilune? Yoxibal xa velta laj alo'laun. Mi ja'uc avalojbun bu ta xlic talel ti avip ti ech'em xu' avu'une.

¹⁶ Ti jech ono'ox xvulvun ta j'ech'el ti Dalilae, ti ja' ya'yej o ta sjaq'uilanel jujuliquele, ta'lo ya'i ti Sansone, ti sc'anuc xa chamuc ya'ie.

¹⁷ Va'i un, c'ot ta pasel ti lic sjam ye sti' ti xi laj yalbe ya'i ti Dalila ti c'usi mucul to ox yu'une: —Mu'yuc buch'u sloc'oj ta j'ech'el ti stsotsil jole. Yu'un ti c'alal mu'yuc to ox ta xivoq'ue, t'ujbilun ono'ox yu'un ti Dios ti oy sc'oplal nazareoune. Ti mi ta xc'ot ta pasel ti ta sloc'beicun ti stsotsil jole, ta xch'ay ti yipal cu'une. Ta xic'ot jech c'u cha'al ti yan viniquetic ti mu'yuc c'usi xu' yu'unique.

¹⁸ C'alal laj ya'i lec ti Dalila ti jambat lec ti c'usi mucul to oxe, xi laj stac batel mantal ta stojol ti banquilaletic yu'un ti filisteoetique: —¡Avi tana une, la'ic xa un! Ti Sansone laj svinajesbun ti c'usi mucul yu'une. Va'i un, ti stuquic une yich'ojic xa batel taq'uin ti c'alal bat sq'uelique.

¹⁹ Ti Dalilae cajal xa sjol yu'un ta sba yo' xq'uechoj laj yotesbe svayel ti Sansone. Laj yic' talel jun vinic yo' jech ta sloc'be ti vucub xpech'benal stsotsil sjole. Laj taj une, lic yilbe svocol.

²⁰ Xi x'avet xa lic yalbee: —¡Sansón, q'uelo aba yu'un ti filisteoetique! Ja'uc ti Sansone julav, snopoj to ti yac'touc ti xu' ta scolta sba jech c'u cha'al ta spas to ox talele. Mu ja'uc sna' ti tenat xa comel yu'un ti Diose.

²¹ Va'i un, mu ta sc'obuc ya'iic ti tsac x'ute yu'un ti filisteoetique. Laj spitsbeic sbec' sat. Yic'ojic batel ta Gazae, ti bu laj xchuquic ta c'anal carina taq'uine. Lic yaq'uic abtejuc ta sjoyoyinel ti sjuch'obil trigo ta chuquinabe.

²² Manchuc mi jech un, ti stsotsil sjole lic puluc talel yan velta.

Ta xcham ti Sansone

²³ Ti banquilaletic yu'un ti filisteoetique lic stsob sbaic yo' ta spasic q'uin ti cuch xa yu'unic ta stsalele. Lic smilbeic smoton ti dios Dagone, ti xi lic q'uejinicuque: “Ti dios cu'untique laj xa yac'botic ta coc ta jc'obtic ti cajcontratic Sansone.”

²⁴ C'alal jech laj yilic ti jnaclejetique, lic sq'uejintaic, smuyubtaic ti sdiosic ti xi laj yalique: “Ti dios cu'untique laj yac'botic ta coc ta jc'obtic ti cajcontratic Sansone, ti buch'u laj soques ti ts'unubil ta cosiltique, ti laj smilan ti jvinquileltique.”

²⁵ Mu xa c'usi jech o ta xa'iic ti xmuyubajique, ti laj sc'anic ti ac'o loq'uesbaticuc talel ti Sansone yo' jech ta x'elovajic xchi'uquique. Va'i un, loq'uesbatic talel ya'uquic un ti ta chuquinabe. Lic yixtolanic ta labanel, ti laj sva'anic ta o'lol ti bu oy chib muc' ta yoyal nae.

²⁶ Va'i un, ti Sansone xi laj yalbe ya'i jun querem ti nitbun batel ti sc'obe: —Ba va'anun ti bu xu' ta xc'ot jc'ob ta spiquel ti muc' ta oy ti yic'oj ti ch'ulnae. Yu'un ta jc'an ta jquican jba ca'i ti bu oye.

²⁷ Scotol ti banquilaletic yu'un ti filisteoetique, oyic ta ch'ulna ti noj ta viniquetic ta antsetique. Oy nan oxmiluc (3,000) ta vo' oyic ti ta xcha'cojale, ti yac'oj batel satic ta sq'uelel ti c'u s'elan ta slabanic Sansón ti yane.

²⁸ Va'i un, ti Sansone xi yal ti avan ta stojol ti Diose: “Avocoluc, Dios, vulesun xa ta avo'nton j'ech'eluc. Ac'bun xa ti quipe yo' jech ta jpacbeic sutel ya'i ta j'ech'el ti filisteoetic ti laj spitsbeicun loq'uel ti xchibal sbec' jsate.”

²⁹ Ta jech yepal un, lic sa'ilan xic'leb xchibal sc'ob ti xchibal muc' ta oy ti bu xcuchoj scotol ti ch'ulnae. Jech lic xic'an lec ti sc'ob ta jujujote.

³⁰ Xi lic avanuque: “¡Jmoj chamcun xchi'uc ti filisteoetique!” Va'i un, ta sjunul yip, laj xuj batel. Ti ch'ulnae jin yal talel ta sbaic ti filisteoetique, ta sbaic xtoc ti c'u yepal oyique. X'ech' to yepal milvan comel ti Sansón c'alal chame, ja' mu sta milvan c'alal cuxul to oxe.

³¹ Laj taj une, tal poyatuc loq'uel yu'un ti xchi'iltac ta voq'uele, xchi'uc scotol yuts' yalaltac ti Sansone. Bat smuquic ta o'lol yu'unic ti Zora xchi'uc ti Estaole, ta smuquinal ti Manoa ti ja' stote. Jtob (20) jabil sjalil c'ot ta jpojvanej yu'un Israel ti Sansone.