Jueces 14 - Bible in Tzotzil de Chamula

Nupij ts'aquij ti Sansone

¹ Oy jun c'ac'al, ti Sansone yal batel ta jteclum Timnat. C'ot ta sat jun filistea ants.

² C'alal sut talel ta snae, xi vul yalbe ya'i ti stot sme'e: —Avocolicuc, ta jc'an xachapanbeicun scotol ti c'usitic ta xtune yo' jech ta xinupi ta xits'aqui xchi'uc jun filistea ants ti c'ot ta jsat ta Timnate.

³ Xi albat yu'un ti stot sme'e: —¿C'u cha'al chbat asa' talel avajnil ta stojol ti filisteoetic ti yan ti c'usi ta snijan xchiman sbaic ta yich'el ta muq'ue? ¿Mi yu'un mu'yuc xa antsetic ta stojol ti cuts' calaltique, xchi'uc ta stojol scotol ti israeletique? Xi laj stac' ti Sansone: —Yu'un ti tsebe, ja' snup jch'ulel canima ti ta jc'an ti c'otuc ta pasel avu'unic ti ta xba ajac'beicun talele.

⁴ Ti stot sme'e, mi ja'uc sna'ic ti ja' nopbil yu'un ti Dios ti jech ta xc'ot ta pasele, ti yacal ta sa'be sc'oplal ti c'u s'elan ta stsaqueic ta leto ti filisteoetique. Yu'un ti jech c'ac'al taje, ja' o ilbajinbilic ti israeletique.

⁵ Ja' yu'un un cha'e, ti Sansone xchi'uc ti stot sme'e batic ta Timnat. Ja'uc ti Sansone, ti c'alal och batel ta yut uvatic yu'un ti jteclume, ta jech to yepal, snupoj c'ot ta be jun león ti staoj xa talel scotlej ti xloquet no'ox talel snuc' tal lubiatuque.

⁶ Va'i un, ti xcuxlejal Diose vul ta stojol ti Sansone, ti mu ta sc'obuc laj ya'i laj slilin ta milel ti leone, ti co'ol no'ox s'elan jun uni nene' tentsun laj ya'ie. Mi ja'uc oy c'usi laj yalbe ya'i ti stot sme' ti va'i s'elan c'ot ta pasele.

⁷ Ts'acal to un, bat sc'opon ti tseb ti ja' snup xch'ulel ta xile.

⁸ Laj taj une, ech' xa ox jayibuc c'ac'al un ti c'alal ja' o xa yorail ta xic' sbaic xchi'uc ti tsebe, laj sq'uejbun sba ech'el ta be yo' jech xbat sq'uel ti chamem leone. Laj yil ti xvolvun xa xchanul ajapom xchi'uc xpechequil yav ti ajapome.

⁹ Laj st'ol loq'uel ti xpechequil ajapome, ti slo'ilan xa batele. C'alal laj sta ta be ti stot sme'e, laj yac'be ti ajapome. Laj slo'ic ec. Mu ja'uc laj yal ti laj st'ol loq'uel ta xch'ut jun chamem leone.

¹⁰ Stot ti Sansone ba svu'lan ti tsebe. Lic spas jun q'uin ti Sansone jech c'u cha'al liquem stalel ta spasic ti querem tsebetique.

¹¹ Ja'uc ti filisteoetic ti oy xi'el ta xa'iic yu'une, laj stsob batel lajuneb xcha'vinic (30) ta vo' xchi'ilic ti jmoj xvoletique.

¹² Ti lajuneb xcha'vinic ta vo' taje, xi albatic yu'un ti Sansone: —Ta xcac'boxuc at'unic jun tajimol lo'il. Ti mi t'un xa ox avu'unic smelol ta yucubal c'ac'al sjalil ti q'uine, ta xcac'boxuc jujulic axela-mochib-c'u'ic, xchi'uc jujuchop aq'uelob-q'uin-c'u'ic ti jujunoxuque.

¹³ Yan mi mu'yuc xt'un avu'unique, ta xavac'beicun jujulic ti xela mochib c'u'ile, xchi'uc ti jujuchop q'uelob q'uin c'u'il ti jujunoxuque. Xi laj staq'uic ti stuquique: —Albuncutic c'usi ti tajimol lo'il ti sc'an t'unele. Li' ts'etel jchiquincutic ta ya'yiel jcotolcutique.

¹⁴ Ti Sansone xi xcholet lic yal ti tajimol lo'il ti sc'an t'unele: “Ti ta jti'vaneje, loc' talel ve'lil ta stojol. Ti tsots xa'i sbae, jun yutsil xchi'il loc' talel ta stojol.” Yoxibal xa ox c'ac'al yech'el un, jech ti stuquique yoquel mu xt'un yu'unic smelol ti tajimol lo'ile.

¹⁵ Ta xchanibal c'ac'al un, xi laj yalbeic yajnil ti Sansone: —Lo'labo yo'nton yo' jech ta sjam ye ta sjambel smelol ti tajimol lo'il ti ta jt'uncutic yu'un ti amalale. Ti mi mu jechuque, ta xajchic'otcutic ta c'oc', xchi'uc scotol ti c'u yepal oy ta sna ti atote. ¡Yu'un ti vo'oxuc yilele, ta xvinaj ti laj avic'uncutic talel li'e yo' jech ta xapojbuncutic batel ti c'usi oy cu'uncutique!

¹⁶ Va'i un, ti tsebe bat ti bu oy ti Sansone, ti x'oc'olet xa xi c'ot yalbee: —Ma'uc ac'upilun jna'. Sc'a'epalun asat jna'. Yu'un laj xa avac'be st'un tajimol lo'il ti jvinquileltaque, ti mu ja'uc avalojbun ca'i c'usi ti smelole. Xi tac'bat yu'un ti Sansone: —Mu xcalbot ava'i unbi, yu'un c'alal ta jtot jme' mu'yuc calojbe ya'i.

¹⁷ Ti stuc une x'oc'olet o ta stojol sta ti vucub c'ac'al ti ja' jech sjalil ti q'uin ta x'ech'e. Laj slo'labe ti yo'nton ta j'ech'ele, ti c'ot ta pasel ti c'alal sta ti yucubal c'ac'ale, lic yalbe ya'i ta jamal ti c'usi ta xich' t'unbel ti smelole. Va'i un, ti stuque toj jelavel yu'un ti bat yalbe ya'i ti svinquileltaque.

¹⁸ C'alal mu to ta xch'ay batel ti c'ac'al ta yucubal c'ac'ale, ti filisteoetique xi bat yalbeic ya'i ti Sansone: “Mu'yuc xa yan ti c'usi x'ech' xchi'ile, ja' no'ox ti ajapome. Mu'yuc xa yan ti x'ech to stsatsale, ja' no'ox ti leone.” Xi tac'batic yu'un ti Sansone: “Ja' no'ox ti laj ajots'ol-jac'beic ti sme' cuni chije, ti t'un avu'unic smelol ti tajimol lo'ile.”

¹⁹ Ti jech taj une, ta jech yepal tal u'ninatuc yu'un xcuxlejal ti Diose. Bat ta Ascalón ti Sansone. Laj smil lajuneb xcha'vinic (30) ta vo' viniquetic ti bu taje. Ja' laj stojan o yil ta sventa ti t'unbat smelol ti tajimol lo'il ti c'u'iletic ti laj sloc'anbe talele. Ts'acal to un, capem xa sjol sut batel ta sna ti stote.

²⁰ Ja'uc ti yajnile, aq'ue ech'el ta yoc ta sc'ob ti buch'u lec xil sbaic xchi'uc ti Sansone.