Jueces 13 - Bible in Tzotzil de Chamula

Svoq'uebal ti Sansone

¹ Ja'uc ti israeletic une lic xcha'pasic chopol ta sba ta sat ti Diose. X'ech' cha'vinic (40) jabil sjalil aq'ueic comel ta yoc ta sc'ob filisteoetic yu'un Dios ti israeletique.

² Oy jun vinic sbiinoj Manoa ti ja' snitilul ti Dan ti oy ta Zorae. Ti yajnile, ja' jun machero ants, ti mu ja'uc oy yalab ta j'ech'ele.

³ Ja'uc ti yaj'ánjel Diose xi laj yalbe ti c'alal laj yac' sba iluc ta stojole: “Ti vo'ote mu'yuc aviloj o alajel ta j'ech'el. Avi tana li' une, ta xlic achi'in avol, ti ja' jun querem ta xavile.

⁴ Mu xavuch' ti vinoe, mi ja'uc jtosuc uch'bolal ti pasem xa ta j'ech'ele. Mi ja'uc xatun xalajes ve'liletic ti albil sc'oplal ti mu stac' lajesele.

⁵ Yu'un oy sc'oplal ti jun aquerem ta xa'ac'bate, ti mu'yuc ta xich' loc'bel ti stsotsil sjole. Yu'un ti querem taje, ti c'alal mu to ta xvoq'ue, t'ujbil xa ta yajtunel ti Diose, ti ja' jun nazareo ta xc'ote yo' jech ta xlic sva'an sba ta spojel ti israeletic ti ilbajinbilic yu'un ti filisteoetique.”

⁶ Ti antse xi laj yal ti c'alal bat chapbe ya'i ti smalale: “Ti bu oyune, tal jun svinic Dios, ti ch'ayal c'ot co'nton yu'un ta j'ech'ele. Yu'un co'ol s'elan yaj'ánjel ti Dios stuque. Mu ja'uc laj jac'be ti buch'ue, mi ja'uc ti stuc laj yalbune.

⁷ Ti c'usi no'ox laj yalbune, ta la xlic jchi'in col, ti li' la ta xlic batel avi tanae, ti mu'yuc ta xcuch' ti vinoe, ti c'usi pasem ta j'ech'ele, ti ve'lil ti albil sc'oplal ti mu stac' lajesele. Yu'un ti olol ti c'alal mu to la ta xvoq'ue, t'ujbil xa la ta yajtunel Dios ti stalel o la ti nazareo xcham xlaje.”

⁸ Va'i un, ti Manoae xi laj yal ti c'alal laj sta ta c'oponel ti Diose: “Avocoluc, Ch'ul Dios, abolajan, tacbun talel yan velta ta jtojolcutic ti vinic taje yo' jech ta xiyalbuncutic c'usi sc'an pasel ta stojol ti olol ti c'alal ta xvoq'ue.”

⁹ Ti Manoae, tacbat talel sc'op yu'un ti Diose. Laj yac' sba iluc ti yaj'ánjel yan velta ta stojol ti ants ti c'alal ja' o oy ta osiltique. Yu'un ja' o mu'yuc tey oy ti Manoae.

¹⁰ Bat ta anil ti ants ti xi laj yalbe ya'ie: —¿Mi laj ava'i? ti vinic ti laj quil ta yan c'ac'ale, laj xa quil no'ox xtoc.

¹¹ Va'i un, ti Manoae va'i batel ta anil ti jmoj batic xchi'uc yajnil ti bu com ti vinique, ti xi c'ot yalbe ya'ie: —¿Mi vo'ot ti laj achi'in ta lo'il ti cajnil ti ech' yan c'ac'ale? Xi laj stac' ti vinic taje: —Vu'un unbi.

¹² Va'i un, ti Manoae xi laj yale: —C'alal mi c'ot ta pasel ti va'i s'elan laj avale, ¿c'u s'elan ta jts'itescutic batel ti olole? ¿C'usi sc'an ta jpascutic ta stojol?

¹³ Ti yaj'ánjel Diose xi laj staq'ue: —C'otuc ta pasel yu'un scotol ti avajnile jech c'u cha'al laj calbe ya'i ti xichie:

¹⁴ Mu xuch' ti pasem uch'bolale, mu slajes ti c'usi ta naca uva loq'uesbile, mi ja'uc ti c'usi naca q'uixin uch'bolale. Mu slajes ti c'usi albil sc'oplal ti mu stac' lajesele. Ja'uc no'ox, ac'o spas ti c'u s'elan laj calbe ya'ie.

^15-16 Va'i un, ti Manoae xi laj yalbe ti yaj'ánjel Diose: —Yojtot, ta to xajpajesot uni jliqueluc. Ta xlic jchapan jcotuc uni tentsun jlajestic. Ti jech laj yal ti Manoa ti va'i s'elan taje, yu'un mi ja'uc jutebuc sna' ti buch'u taje, ti ja' yaj'ánjel ti Diose. Ti yaj'ánjel Diose xi laj stac'be ti Manoae: —Ac'o mi ta xapajesun uni jliqueluc, yu'un mu ono'ox jlajes ma' ti avot ta xavac'bune. Ti mi oy ta avo'nton ta xavac' matanale, ac'bo ti Diose.

¹⁷ Va'i un, ti Manoae xi laj yalbe ti ánjele: —Ja'uc le' un cha'e, albun ca'icutic, ¿c'usi abi? yo' jech ta xajtojbecutic ta vocol c'alal mi c'ot ta pasel ti va'i s'elan laj avalbuncutique.

¹⁸ Xi laj stac' ti ánjele: —¿C'usi stu avu'un ta xajac'bun ti jbie? Toj c'upil elom sba ti vocol ta a'yiele.

¹⁹ Ti Manoae laj yich' batel ti tentsune xchi'uc ti matanal sat ts'unubal ti jchop o ta trigoe. Laj yac' ta jun ba ton. Lic xchic' ta matanal ta stojol ti Diose. Ja'uc ti Diose xi s'elan elom laj yac'be yil ta sba ta sat ti Manoa xchi'uc ti yajnil ti ch'ayal c'ot o'ntonal yu'unique:

²⁰ C'alal xloclij liquel ti c'oc' ta altare, ti Manoa xchi'uc ti yajnile laj yilic ti ta o'lol leb c'oq'ue, muy batel ta vinajel ti yaj'ánjel Diose. Va'i un, snupilanic xa banomil laj spatan sbaic ta lumtic.

²¹ Ti Manoa une, c'ot ta yo'nton, ti vinic taje, ja' yaj'ánjel ti Diose. Yu'un ta j'ech'el mu'yuc xa laj yac' sba iluc yan velta ta stojol ti Manoae, mi ja'uc ta stojol ti yajnile.

²² Xi laj yalbe ti yajnile: —Ta jbel sc'oplal ta xijchamotic ma' li' une, yu'un laj quiltic ti Diose.

²³ Ja'uc ti antse xi laj staq'ue: —Ti yu'unuc ta sc'an ta smilotique, mu'yuc laj yich' laj stsac ti chic'bil matanale xchi'uc ti yan matanale, mi ja'uc laj quiltic ti vi s'elan le'e, mi ja'uc laj yalbotic scotol ti va'i s'elan taje.

²⁴ C'ot ti yorail ti lic ayanuc yol ti antse. Laj yac'be sbiin Sansón. Yantic no'ox xch'i batel ti olole, yu'un sva'anoj sba stuc ti Dios ta stojole.

²⁵ Oy jun c'ac'al, ti Sansone, ti c'alal vololic ta axibal na yu'un ti Dan ta o'lol yu'un ti Zora xchi'uc ti Estaole, lic vinajuc ti yich'ojbe xcuxlejal Dios ti Sansone.