Jueces 12 - Bible in Tzotzil de Chamula

Ti Jeftee ta xcontrainat yu'un snitilultac ti Efraine

¹ Ti viniquetic snitilultac ti Efraine laj stsob sbaic. Laj xtuch'ic jelavel ti uc'um Jordán ta stuq'uil Zafone, ti xi laj yalbeic ya'i ti Jeftee: —¿C'u cha'al laj apas aba ta mantal atuc, ti bat atsac ta leto ti amonitaetique, ti mu'yuc xavalbuncutic ti jmoj ta xijbate? ¡Avi tana une, ta jchic'cutic ti anae, bajal ta xac'ac' ta yut ec!

² Ja'uc ti Jeftee xi laj staq'ue: —Ti vu'un xchi'uc ti jvinictaque laj jtsaccutic ta leto xchi'uc ti amonitaetique. Laj jtaoxuc ta iq'uel. Mi ja'uc tal apojuncutic.

³ Ti jech laj quil ti mu'yuc xatalic ta jpojelcutique, laj jten ti jcuxleje, ti lic jtsac ta leto ti amonitaetique. Tsalbil c'otic cu'un ta sventa ti Diose. ¿C'u cha'al ja' to lec xava'iic ta xtal atsaquicun ta c'op un?

⁴ Va'i un, ti Jeftee laj stsob scotol ti viniquetic ta Galaade. Lic stsac ta leto snitilultac ti Efraine. Tsalbil c'otic yu'un. Yu'un snitilultac ti Efraine ta xalbeic sbaic ti ja' la jlom snitilultac ti Efraine xchi'uc ti Manasese, ti laj sjipic comel ti Efraín ti nacal ta Galaade.

⁵ C'alal laj sventainic galaadetic ti spul-puliltac ech'ebal yu'un ti Jordane, mi oy buch'u ta sc'an ta xjelav ti jatvil ta x'ech' batel teye, ti stuquique ta sjac'beic mi ja' snitilultac ti Efraine. Mi ta staq'uic ti ma'uque,

⁶ ta sc'anbeic ti ac'o yal “Shibolete”. Ja'uc le' une, mi “Shibolet” ta xloc' ta yeique, ta scoj ti mu x'al yu'un ti c'ope, stsac x'utatic ta milel ta spul-pulil uc'um yu'un ti Jordane. Ti jech ora taj une, chamic chib yoxvinic ta mil (42,000) viniquetic snitilultac ti Efraine.

⁷ Ti Jeftee, vaquib jabil sjalil, c'ot ta banquilal jpojvanej yu'un ti israeletique. Ti c'alal chame, bat smuquic ta Galaad ta steclumal stuc ti bu voq'ue.

Ti oxib jpojvanejetic yu'un ti israeletique

⁸ C'alal cham xa ox ti Jeftee, c'ot ta jpojvanej yu'unic ti israeletic ti Ibsane, ti liquem tal ta Belene.

⁹ Laj yil lajuneb xcha'vinic (30) ta vo' squeremtac xchi'uc lajuneb xcha'vinic (30) ta vo' stsebetic, ti laj yac' ye sti' ti scotolic xu' ta sa' yajnil smalalic ta yantic oe. Vucub (7) jabil sjalil laj spoj Israel ti Ibsane.

¹⁰ Ti c'alal chame, bat smuquic ta Belén.

¹¹ C'alal cham xa ox ti Ibsane, lajuneb (10) jabil sjalil laj sva'an sba ta spojel israeletic ti Elón snitilul ti Zabulone.

¹² C'alal chame, bat smuquic ta Ajalon, ta yosilal ti snitilultaque.

¹³ C'alal cham xa ox ti Elone, lic sva'an sba ta spojel israeletic ti Abdón xnich'on ti Hilel ti oy ta Piratone.

¹⁴ Vaxaquib (8) jabil sjalil laj spoj ti israeletique. Ti Abdone laj yilbe sat cha'vinic (40) ta vo' squeremetic xchi'uc lajuneb xcha'vinic (30) ta vo' smamobtac ti xcajetic no'ox ta sburroic jujunique.

¹⁵ C'alal chame, laj smuquic ta Piratón ta yosilal ti Efraine, ta vitstic yu'un ti Amaleque.