Jueces 11 - Bible in Tzotzil de Chamula

Ti tsatsal vinic Jeftee

¹ Ti Jeftee, ja' jun banquilal j'ac'-leto ti mu sna' xi'e, ti nacal ta yosilal Galaade, ti ja' yol jun ants ti sna' sbolomalin sbae, ti laj sta ta jun vinic ti sbiinoj Galaade.

² Ti jech laj yilbe sat yan xnich'nab ti Galaad yu'un ti sbats'i ajnile, ti c'alal muq'uibic une, laj stenic loq'uel ta sna ti Jeftee. Laj yalbeic ya'i ti mu xu' ta xich' ti rextoil yu'un ti stote, ta scoj ti yol yan antse.

³ Va'i un, ti Jeftee jatav loq'uel ta stojol ti xchi'iltac ta voq'uele. Bat nacluc ta yosilal Tob, ti bu lic stsob epal ch'ajil pucujil viniquetique, ti jmoj bu yalel muyelic ta xanobal xchi'uque.

⁴ Ech' xa ox c'uc sjaliluc un, ti amonitaetique bat stsaquic ta leto ti israeletique.

⁵ Ja'uc ti banquilaletic ta Galaade laj staic ta iq'uel ti Jefté ti oy ta yosilal Tobe,

⁶ ti xi laj yalbeique: —La', sutan talel, ta jc'ancutic ti ta xa'och ta banquilal ta stsaquel ta leto ti amonitaetique.

⁷ Xi tac'batic yu'un ti Jeftee: —¿Mi mu xana'ic ti laj avac'beicun ti jvocole? ¿Mi mu xana'ic ti jun aveic laj ataquicun loq'uel ta sna ti jtote? ¿C'u cha'al ja' to ta xtal asa'icun ti c'alal mu xnel ta xava'iic ti avocolique?

⁸ —Jech xaval ava'uc ti ja' to tal jsa'otcutic ti c'alal mu x'ech' ta xca'icutic ti vocole —xi laj yal ti stuquique—. Avi tana li' une, ta jc'ancutic ti xtal achi'inuncutic ta stsaquel ta leto ti amonitaetique, ti ta xac'ot ta banquilal yu'un scotol ti jnaclejetic ta Galaade.

⁹ —Mi jech oy avo'ntonic ta xac'anic ti ta xisut talel yo' ta jtsac ta leto ti amonitaetique, mi laj sva'an sba Dios ti tsalbil ta xc'otic cu'une, ta xic'ot ta banquilal avu'unic unbi —xi laj stac' ti Jeftee.

¹⁰ —Ja' rextico cu'untic ti Diose, ti ta jbel sc'oplal ta xc'ot ta pasel cu'untic ti va'i s'elan laj avale —xi laj staq'uic ti banquilaletique.

¹¹ Va'i un, ti Jeftee, jmoj batic xchi'uquic. Jech ti jteclum une lic sva'anic ta banquilal jpojvanej yu'unic. Ti Jefté ti c'alal oy ta Mizpae, lic xcha'alilan ta sba ta sat Dios ti c'usi laj yal ta ba'yele.

¹² Ts'acal to un, laj stac batel jun chib j'al-mantal j'ich'-c'opetic ta stojol ti ajvalil yu'un ti amonitaetique yo' xi ta sjac'bee: “¿C'usi la jmul ta xaq'uelbun avalojic ti jech ta xtal atsac ta leto ti jlumale?”

¹³ Ti ajvalil yu'un ti amonitaetique xi laj stac'be sutel ti j'al-mantal j'ich'-c'opetic yu'un ti Jeftee: “Ti c'alal laloq'uic talel ta Egipto ti vo'oxuc israeloxuque, laj apojbun jbanomilcutic ti lic talel ta uc'um Arnone, ti c'ot c'alal to uc'um Jaboque, xchi'uc ta Jordane. Avi ta une, ta lec no'ox, sutesbuncutic mi xac'ane.”

¹⁴ Ti Jeftee, yan to velta, laj stac batel j'al-mantal j'ich'-c'opetic ta stojol ti ajvalil yu'un ti amonitaetique,

¹⁵ ti xi ta xal ti c'op ti laj stac batele: “Ja' jech stac'obil yu'un ti Jefté jech c'u cha'al li'e: Ti vu'un israeluncutique mu'yuc jpojojbecutic sbanomilic ti moabitaetique, ti amonitaetique.

¹⁶ Yu'un ti c'alal liloc'cutic talel ta Egiptoe, ech' jtuch'cutic ti sbajtical banomile. Lijelavcutic ta Tsajal Nab. Lic'otcutic c'alal to Cades.

¹⁷ Va'i un, laj jtaccutic batel jun chib j'al-mantal j'ich'-c'opetic ta stojol ti ajvalil ta Edome. Laj jc'anbecutic ti ac'o yac' ye sti' ti jelavcuncutic ech'el ta yosilalique. Mu'yuc laj yac' ye sti' ti ta xijelavcutic ech'ele. Ja' jech xtoc laj jc'anbecutic ti ajvalil yu'un ti Moabe. Mu ja'uc laj yac' ye sti' ta xi'ech'cutic. Jech o xal licomcutic ta Cades.

¹⁸ Ts'acal to un, lic jtam batel jbecutic ta sbajtical banomil. Xijoyetcutic ech'el ta sti'il sts'actac ti Edome xchi'uc ti Moabe ja' to ti c'uxi lic'otcutic ta stuq'uil yelov sloq'ueb c'ac'al yu'un ti Moabe. C'ot jlaman jbacutic ti bu taje, ta jot uc'um yu'un ti Arnone. Mu ja'uc ech' jtuch'cutic, yu'un ja' xa tey ta xlic ech'el sts'aquilal sbanomil ti Moabe.

¹⁹ Va'i un, laj jtaccutic batel jun chib j'al-mantal j'ich'-c'opetic ta stojol ti Sehón ajvalil yu'un ti amorreoetic ta Esbone. Laj jc'anbecutic ti ac'o yac' ye sti' ti xijelavcutic ta sbanomil ti jech ta xibatcutic ta cosilalcutique.

²⁰ Ja'uc ti Sehón une mu'yuc xc'ot ta yo'nton, mu'yuc li'ech'cuncutic yu'un ta yosilal. C'ajomal no'ox lic stsob scotol ti svinictaque. Bat slaman sbaic ta Jahas. Lic stsacuncutic ta leto.

²¹ Ja'uc ti Ajvalil Dios yu'un ti Israele, ti ja' slumaluncutique, laj jtsalcutic yu'un ti Sehón ta letovajel xchi'uc scotol ti svinictaque. Laj cu'ninbecutic ti c'u sjamlej yosilal ti amorreoetic ti xi s'elan c'ot ta pasel ti bu taje:

²² Laj cu'ninbecutic scotol sbanomilic ti amorreoetique, ti lic ta uc'um Arnone, ti ech' ta Jaboque, xchi'uc xtoc ti lic ta sbajtical banomile, ti c'ot c'alal to ta uc'um Jordane.

²³ Avi tana une, ti c'usi laj spoj ti Dios ta stojol ti amorreoetic ti laj yac'buncutique, ¿mi yu'un ta xapojbuncutic ava'i tana ec un?

²⁴ Ti c'usi ta xac'bot ti Quemos ti ja' dios avu'une, ta xava'i ti c'ot xa arextoe, ¿mi mu jechuc un? Ja' jech ti vu'uncutique, c'ot ta jrextocutic ta xca'icutic ti laj yac'buncutic ti Diose.

²⁵ ¿Mi yu'un ta xava'i ti jelavem to ac'oplale, ti ja' mu sta sc'oplal ti Balac xnich'on ti Zipor ajvalil yu'un ti Moabe? Ja'uc le' une, mu'yuc xtal stsacuncutic ta leto.

²⁶ Yu'un oy xa ta vo'lajunvinic (300) jabil jnaclejcutic ta Esbon, ti ta Aroere, xchi'uc ta bic'tal lumetic ti joyol ta spat ta xocon scotol ti jteclumetic ti oy ta sti'il uc'um Arnone. ¿C'u cha'al ja' to lic xi ajolic ta sa'bel sc'oplal ti banomiletic taje, ti c'alal mu'yuc c'usi ava'yejic ti va'i sjalil talele?

²⁷ Yu'un mu'yuc c'usi chopol jpasoj ta atojol. Yu'un vo'ot xasa'sun liquel ta spasel ti c'usi chopole ti jech ta xtal atsacuncutic ta letoe. Yu'un ja' jchapanvanej ti Diose. Ja' ta xchapan ti israeletique xchi'uc ti amonitaetique.”

²⁸ Manchuc mi jech laj ya'i scotol ti ajvalil yu'un ti amonitaetic taje, mu'yuc tsacbat ta muc' sc'op ti Jeftee.

Ti Jeftee ta xac' strate

²⁹ Va'i un, vul ta stojol Jefté xcuxlejal ti Diose. Lic xani yosilal ti Galaade xchi'uc yosilal ti Manasese. Ech' batel ta Mizpa ti oy ta Galaade yo' jech ta stubbe sc'oplal ti amonitaetic ta yosilalique.

³⁰ Jech ti Jeftee xi s'elan laj yal ti laj yac' strate ta stojol ti Diose: “Mi tsalbil ta xc'ot cu'un ti amonitaetic ta aventae,

³¹ ti buch'u ba'yel ta xloc' talel ta jnae, ti ta xtal snupun ta be c'alal mi lisut talel ta ac'-letoe, ja' me ta xcac'bot ta amoton unbi.”

³² Ti Jeftee och batel ta yu'ninbel yosil ti amonitaetique, ti laj stsac ta letoe. Tsalvanem c'ot ta sventa ti Diose.

³³ Ep laj smilan yajcontra ti Jeftee. Laj yu'ninan jtob (20) ta chop jteclum ti c'ot c'alal to Aroere, ta Minite, xchi'uc ta Abel-queramime. Ti jech taj une, laj stsalic amonitaetic ti israeletique.

³⁴ C'alal sut batel ta sna ti Jefté ta Mizpae, x'ac'otaj xa loq'uel talel xchi'uc xchij-chij taq'uin, tal nupatuc ta be yu'un ti c'ajomal yo jun stseb ti Jeftee. Mu'yuc xa yan ti yantsil nich'one. C'ajomal xa no'ox stuc oy, yu'un mu'yuc xa yan ti xnich'one.

³⁵ Ti c'alal laj yile, laj xch'i' ta jatel ti sc'u'e, svinajeb ti mu xa c'usi x'ech' o ta xa'i ti svocole, ti xi laj yalbee: —¡Mu xa ono'ox cha'bel un, cantsil nich'on! ¡Mu x'ech' ti jvocol ta xca'i avu'une, ti c'alal vo'ot lamal c'ot ta jtojol ti jvocol avu'une! Yu'un laj xa jtic' jba ta yalel jtrate ta stojol ti Diose, ti tsots sc'oplal ta xc'ot ta pasel cu'un avi tana une.

³⁶ Xi laj stac' ti stuque: —Jechuc, tot, paso ta jtojolal ti c'u s'elan laj avac' atrate ta stojol ti Diose, ipaluc ti c'ot xa ta pasel ti tsal avu'un ti avajcontra amonitaetic ta sventae.

³⁷ Manchuc mi jech un, ta jc'anbot vocol ti c'uxubajuc avo'nton ti ta xavac' ave ati' ta xiloc' ta xanobal chibuc u xchi'uc jchi'iltac ta vitstic, ta yoq'uitael jba ti mu'yuc to malijemun ta xicham xilaje.

³⁸ Ti Jeftee laj yac' ye sti' ti chib ue. Ti jech yorail taje, lic xanavuc ta vitstic xchi'uc ti xchi'iltaque, ta yoq'uitael sba ti mu'yuc malijem xcham xlaje.

³⁹ C'alal ech' ti va'i sjalil taje, sut talel ti bu oy ti stote. C'ot ta pasel yu'un ti stuc ti yac'oj strate ta stojol ti Diose. Ti yantsil nich'on ti Jeftee, mu'yuc tabil ta junuc vinic ti c'alal chame.

⁴⁰ Jech o xal un, stalel o comem yu'unic ti israeletique, ti jujun jabile, scotol ti tsebetique, ac'o yoq'uitaic chanibuc c'ac'al sna'el yantsil nich'on ti Jeftee.