San Juan 11 - Bible in Tzotzil de Chamula

Cham ti Lazaroe

¹ Oy jun vinic ip ta xa'i, ti Lázaro sbie. Tey nacal ta Betania, steclumalic ti Mariae xchi'uc ti Martae, ti xchi'il sbaic ta voq'uele.

² Ti María taje, ja' ti buch'u laj smalbe muil poxil ta yoc ti Cajvaltique, ti laj staquintas ta stsotsil sjole, xchi'uc ja' yixlel ti Lázaro ti ip ta xa'ie.

³ Jech un, ti cha'vo' antsetique laj staic ta iq'uel ti Jesús ti xi laj yalbeique: —Cajval, ti buch'u lec xavil abaic xchi'uque, ip ta xa'i.

⁴ Xi laj yal ti Jesús c'alal laj ya'ie: —Ti jech ip ta xa'ie, mu xcham o xchi'uc. Ja' ta xc'ot ta pasel yo' ta svinajes yutsilal slequilal ti Dios ta stojole, xchi'uc ta svinajesel yutsilal slequilal Xnich'onun ti Diose.

⁵ Ti Jesuse, manchuc mi c'ux ta xa'i ta yo'nton ti Martae, ti Mariae, ti Lazaroe,

⁶ ti bu oye, com to chib c'ac'al c'alal albat ti ip ta xa'i ti Lazaroe.

⁷ Xi laj yalbe yajchanc'optac ti Jesuse: —Batic no'ox xtoc ta Judea.

⁸ Xi laj yalic ti yajchanc'optaque: —Jchanubtasvanej, ti bu taje, ach' to no'ox jutuc mu laj smilot ta ton ti israeletique. ¿Mi ta xabat ava'i xtoc?

⁹ Xi laj yal ti Jesús ta stojol ti yajchanc'optaque: —¿Mi ma'uc melel ti yich'oj lajcheb (12) ora ti jun c'ac'ale? Mi ta xijxanav ta c'ac'altique, mu jbosi cacantic, yu'un sac jaman ti banomile.

¹⁰ Ja'uc mi ta xijxanav ta ac'ubaltique, ta jbosi cacantic yu'un mu'yuc sac jaman ti banomile.

¹¹ Vay xa ti Lázaro ti lec xquil jbatic xchi'uque. Ja'uc le'e, ta xbat jtij ti jech vay xae.

¹² Xi laj staq'uic ti yajchanc'optaque: —Cajval, mi vayeme, ja' svinajeb ti ta xlecube.

¹³ Taje, ja' ta xal ti Jesús ti cham xa ti Lazaroe. Ti yajchanc'optaque xac'toicuc ti bats'i vayel no'oxe.

¹⁴ Va'i un, ti Jesuse xi laj yalbe ta jamal ti yajchanc'optaque: —Cham xa ma' ti Lázaro une.

¹⁵ Ta sventa ti vo'oxuque, ximuyubaj xa ti mu'yuc tey oyune yo' ta xc'ot ta pasel ta atojolic ti ich'bil ta muc' ta xic'ot avu'unique. Ja'uc le'e, batic, ba jq'ueltic.

¹⁶ Va'i un, ti Tomase, ti sbiinoj vache, xi laj yalbe ti yan jchanc'opetique: —Batic ec yo' jmoj chamcutic xchi'uc ti Jesuse.

Sbainoj cha'cuxiel xchi'uc cuxlejal ti Jesuse

¹⁷ C'alal c'ot ti Jesuse, xchanibal xa ox c'ac'al smuclej ti Lazaroe.

¹⁸ Nopol xil sbaic xchi'uc Jerusalén ti Betaniae, x'ech' jutuc ta o'lol reva snamal.

¹⁹ Yepal no'ox ti israeletic bat svu'lanic yo' ta spatbeic yo'nton ti Martae, ti Mariae ti jech cham ti xchi'ilic ta voq'uele.

²⁰ C'alal laj ya'i ti Marta ta xa xvul ti Jesuse, loc' batel, ba snup talel ta be. Ja'uc ti Mariae com ta na.

²¹ Ti Martae xi laj yalbe ti Jesuse: —Cajval, ti li'uc oyucote, mu'yuc xcham ti jchi'il ta voq'uel jechuque.

²² Avi tana li'e, ta jna' ti c'usi ta xac'anbe ti Diose, ta xac'bot scotol.

²³ Xi laj yal ti Jesuse: —Ti achi'il ta voq'uele, ta xcha'cuxi talel.

²⁴ Xi laj yal ti Martae: —Ta jna' ti ta xcha'cuxie ja' to c'alal mi ta xcha'cuxiic ti animaetic ta slajebal c'ac'ale.

²⁵ Xi laj yal ti Jesuse: —Vu'un jbainoj ti cha'cuxiele xchi'uc ti cuxlejale. Ti buch'u ta xch'un ti c'usi ta xcale, manchuc mi ta xcham, ta xcha'cuxi.

²⁶ Ti buch'u cuxul avi tana li'e, ti ta xch'un ti c'usi ta xcale, mu xchamic. ¿Mi ta xc'ot ta avo'nton xana' taje?

²⁷ Xi laj yal ti Martae: —Jech, Cajval, ta xc'ot ta co'nton ti vo'ot ti Cristoe, Xnich'onot ti Diose, ti oy sc'oplal ta ono'ox xatal ta banomile.

Ti Jesuse ta x'oc' ta muquinal ti bu mucul ti Lazaroe

²⁸ Ti jech laj yal taj une, ti Martae bat yic' talel ti María ti ja' xchi'il ta voq'uele, ti xi laj yalbe ya'i ta mucule: —Li' xa oy ti Jchanubtasvaneje, ta xastaot ta iq'uel.

²⁹ Va' xi batel ta anil ti María ti c'alal jech laj ya'ie. Bat sq'uel ti Jesuse.

³⁰ Yu'un mu'yuc ochem batel ta jteclum ti Jesuse, tey to oy ti bu laj snup ta be ti Martae.

³¹ C'alal laj yilic ti va' xi loq'uel ta anil ti Mariae, ti israeletic ti oyic ta na ta spatel ti o'ntonale, tijil batic, yu'un laj snopic ti ta xbat oc'uc ta muquinale.

³² C'alal c'ot ti María bu oy ti Jesuse, laj squejan sba ta yoc ti xi laj yalbee: —Cajval, ti li'uc oyucote mu'yuc xcham ti jchi'il ta voq'uel jechuque.

³³ Ti Jesuse, mu xnel, mu x'ech' laj ya'i sme'unalil c'alal laj yil ti ta x'oc' ti Mariae xchi'uc ti israeletic ti ts'acalic batele.

³⁴ Xi laj sjac' ti Jesuse: —¿Bu laj amuquic un? Xi laj yalbeique: —Cajval, la' jq'ueltic avil.

³⁵ Oc' ti Jesuse.

³⁶ Xi laj yalic ti israeletic une: —Q'uel avil, mu tuch'baj ta yo'nton xa'i sbaic.

³⁷ Xi ta xalbe sbaic ti jlome: —Ti vinic le'e, ja' ti buch'u laj sjambe sat ti ma'sate, ¿mi mu'yuc xa ono'ox c'usi laj yut jutebuc yo' mu'yuc xcham ti Lazaroe?

Xcha'cuxi ti Lazaroe

³⁸ Ti Jesuse mu x'ech' ta xa'i xtoc ti me'unale, nopaj batel ta muquinal. Ti muquinale co'ol s'elan jun pujul yut ch'en ti macbil sti' ta jun muc' ta tone.

³⁹ Xi laj yal ti Jesuse: —Loq'uesic ti smac sti'e. Xi laj yal ti Marta ti ja' xchi'il ta voq'uel ti animae: —Tu xa van, Cajval, yu'un oy xa xchanibal c'ac'al ti chame.

⁴⁰ Xi laj yal ti Jesuse: —Mi ta xc'ot ta avo'ntone, ta xavilbe yutsilal slequilal Dios, ¿mi mu xacutot?

⁴¹ Laj sloq'uesbeic ti smac sti'e. Ti Jesuse laj stoy muyel sat ta vinajel ti xi laj yale: —Tot, colaval xacutot, yu'un laj ava'ibun ti jc'ope.

⁴² Jna' ti ta ono'ox xava'ibun ti jc'ope. Jech ta xcal un, yo' ta xc'ot ta sventa slequilal yutsilal ti jnaclejetic li' oyique, yo' ta xc'ot ta yo'ntonic ta xch'unel ti vo'ot laj atacun talele.

⁴³ C'alal jech laj yal taje, xi laj yal ti tsots avane: —Lázaro, loc'an talel teye.

⁴⁴ Ti animae, ts'otol ta poc' yoc sc'ob loc' talel, xchi'uc pixil ta poc' ti sate. Ti Jesuse xi laj yale: —Jitunic ti sts'ote, ac'o batuc.

Laj snopic ti ta stsaquic ti Jesuse

⁴⁵ Ti israeletic ti buch'utic xchi'inojic batel ti Mariae, c'alal laj yilic ti laj xcha'cuxes anima ti Jesuse, yepal no'ox c'ot ta yo'ntonic ta xch'unel ti ja' Jcoltavanej ti Jesuse.

⁴⁶ Ja'uc le' une, oy jlom bat yalbeic ya'i ti fariseoetic ti laj yilic ti oy c'usi laj spas ti Jesuse.

⁴⁷ Ti fariseoetique xchi'uc ti banquilal yu'un ti paleetique, bat stsob sbaic xchi'uc ti banquilal jchapanvanejetic ti xi laj yalique: —¿C'usi ta xcutic ti vinic taje, ti ep ta xac' iluc ti oy c'usi ch'ayal ta xc'ot o'ntonal yu'une?

⁴⁸ Mi ch'an no'ox xcutique, scotolic ta xlic yich'ic ta muc'. Ti ajvalil ta Romae ta xtal slilinic ti jlumaltique xchi'uc ti ch'ulna cu'untique.

⁴⁹ Ja'uc le'e, oy jun yu'unic ta scotolic ti ja' Caifás sbie, ti ja' o sjabilal tiq'uil ta banquilal pale ti xi laj yale: —Mu xana'beic smelol ti vo'oxuque.

⁵⁰ Mi mu xa ono'ox xava'ibeic xchiquinal ti ja' xloc' venta ti chamuc jun vinic yu'un ti jteclumaltique. Toj vocol mi scotol jteclumaltic ta xlaje.

⁵¹ Ti va'i s'elan laj yale, yu'un ja' o tiq'uil ta banquilal pale ti Caifás ti jech jabil taje. Mu ta sjoluc stuc ti jech laj yale, ja' ac'bat sna' yu'un Dios ti chamuc ti Jesús ta sventa ti israeletique.

⁵² Yu'un ma'uc no'ox ta xcham ta sventa ti israeletique, yu'un ja' ta xc'ot ta sventa stsobel scotol xnich'nab ti Dios ti buyuc no'ox tanijemic batele.

⁵³ Ti jech c'ac'al taje, ti j'opisialetic yu'un ti israeletique laj snopic ti jbel sc'oplal ta smilic ti Jesuse.

⁵⁴ Jech o xal ti Jesuse mu xa xac' sba iluc ta stojol ti israeletique. Loc' batel ta Judea, bat ta sts'el xocol banomil ta jun jteclum ti sbiinoj Efraine. Ti bu taje, com xchi'uc ti yajchanc'optaque.

⁵⁵ Jutuc xa sc'an xlic ti q'uin Colel yu'un ti israeletique. Yepal no'ox ti jnaclejetic ta banomile ta xbatic ta Jerusalén yo' ta xchapan sbaic ta smesel stusel sbaic jech c'u cha'al liquem yu'unic c'alal mu'yuc to xlic ti q'uine.

⁵⁶ Ta sa'olanic ti Jesuse, ti xi ta sjac'olanbe sbaic c'alal oyic ta ch'ulnae: —¿C'u xachi xana'? ¿Mi ta xtal ta q'uin xana'ic, mi mo'oj?

⁵⁷ Ti fariseoetique xchi'uc ti banquilal paleetique, yalojic ono'ox mantal mi oy bu ta xilic ti Jesuse, ac'o yalic yo' xu' ta stsaquic talel.