Josué 9 - Bible in Tzotzil de Chamula

Ti trate laj spasic xchi'uc ti gabaonitaetique

¹ Ti ajvaliletic yu'un ti hititaetique, ti amorreoetique, ti cananeoetique, ti ferezeoetique, ti heveoetique, xchi'uc ti jebuseoetique, laj ya'iic ti c'usitic c'ot ta pasele. (Ti ajvaliletic taje nacalic ta yeloval smaleb c'ac'al yu'un ti uc'um Jordane, ti ta vitstique, ti ta sjunul stenlejale, ti ta sti'il ti muc' ta nab yu'un ti Mediterráneo sbie, c'alal to sjunlej ti Líbanoe.)

² Va'i un, scotolic laj snupultas sjolic laj sco'oltas sc'opic yo' ta stsaquic ta leto ti Josuee xchi'uc ti israeletique.

³ Ac'o mi jech un, ti heveoetic ti nacalic ta Gabaone laj ya'iic ti c'usi laj spas ti Josué ta stojol ti jteclum Jericoe, xchi'uc ti ta Haie.

⁴ Laj snopic ti xu' ta xlo'lavanique. Laj stam batel sbeic, naca lajemal coxtaletic, xchi'uc pac'bil jatemal yavil pasem vino, laj scajanic batel ti ta sburroique.

⁵ Ja' jech xtoc lajem xa laj slap ech'el sc'u'ic, xchi'uc xonobic ti ts'isbil xae. Ti laj yich'ic batel ta sventa ta sve'ic ta bee, c'ajomal taqui pechan cux pan.

⁶ Xi laj yalic c'alal c'otic ta Gilgal ti bu lamalic ta naclej ti Josuee xchi'uc ti israeletique: —Ta namal banomil liliccutic talel. La' jnupin jbatic ta c'op, jpastic lec junuc jtratetic.

⁷ Ti israeletique xi laj stac'beic ti heveoetique: —Ati mi li' no'ox nacaloxuc une, ti mi nopol xquil jbatic une, ¿mi yu'un xavac'touc ta stac' ta jpascutic trate xchi'uc ti vo'oxuque?

⁸ Ti stuquique xi laj stac'beic ti Josuee: —Ta xcac' jbacutic ta tunel ta atojol un. Xi jac'batic yu'un ti Josuee: —¿Buch'uoxuc un cha'e? ¿Bu liquemoxuc talel le' xcaltic une?

⁹ Ti stuquique xi laj staq'uique: —Ta namal banomil liliccutic talel ta sventa ti vinajem sc'oplal ti Ajvalil Dios avu'unique. Yu'un ca'binojcutic scotol ti c'usitic laj spas ta Egiptoe.

¹⁰ Yu'un ca'binojcutic xtoc ti c'usi laj spas ta stojol ti chib ajvalil yu'un ti amorreoetic ti nacalic ta jot uc'um Jordane, ti xcaltique, ja' ti Sehón ti sventainoj ti Hesbone, xchi'uc ti Og ti sventainoj ti Basán ti nacal ta Astarote.

¹¹ Jech o xal ti banquilal cu'uncutique, xchi'uc ti jvinquilelcutique xi laj yalbuncutique: ‘Quere, cuchic batel ca'itic ti c'usi ta xtun avu'unic ta bee. Batanic ti bu oyique. Albeic ya'iic ti ta xcac' jbatic ta tunel ta stojole, ti ta jc'an ta jpascutic jun trate xchi'uque.’

¹² Calal liloc'cutic talel ta sa'eloxuque, lec to ox q'uixin ma' ti pan li'e. Avi tana li' une, c'ajomal xa no'ox jun taqui pech cux pan.

¹³ Ja' jech xtoc c'alal laj jnojescutic ta vino ti tsuil nucul li'e, ach' to ox ta j'ech'el. Avi tana une, jomem xa un. Ja' jech xtoc ti jc'u'cutique, ti jxonobcutique, jomantic xa, yu'un nom ta j'ech'el ti sbelele.

¹⁴ Ti israeletique laj xch'unic ti c'u s'elan ac'bat yilic ti c'usitic yich'ojic batel ti gabaonitaetique. C'u stu un, mu'yuc laj sjac'beic ti Diose.

¹⁵ Va'i un, ti Josuee laj yac' ye sti' ta spasel jun trate ta sventa ti ch'abal ti c'op yu'unique, ti jun yo'nton ta xcom xchi'uquique, ti mu xmilatique. Jech laj sva'an sbaic ta yalel ec ti banquilaletic yu'un ti israeletique.

¹⁶ Ech' xa ox yoxibal c'ac'al un, c'alal laj ya'iic ti israeletique ti nopol no'ox xil sbaic ta naclej xchi'uc ti gabaonitaetique.

¹⁷ Va'i un, loq'uic batel ta sa'el ti gabaonitaetique. Ta yoxibal to c'ac'al, c'otic ta steclumalic ti sbiinoj Gabaone, ti Cafirae, ti Beerote, xchi'uc ti Quiriat-jearime.

¹⁸ Ja' no'ox un, mu'yuc xmilatic yu'un ti israeletique, yu'un ti banquilaletic yu'un ti israeletique laj xa sva'an sbaic ta yalel ta stojol Dios ti mu smilic ti gabaonitaetique. Jech o xal un, ti jteclume xvochlajetic xa liquel ta stojol ti banquilaletic yu'unique.

¹⁹ Ja' no'ox un, xi albatic yu'un ti banquilaletique: —Ti vu'uncutique laj jva'an jbacutic ta yalel ta stojol ti Ajvalil Dios yu'un ti israeletique ti mu jmiltique. Jech o xal un, mu'yuc c'usi xu' ta jpasbetic jutebuc.

²⁰ Ch'ancutic, tsots sc'oplal ti ch'i c'opojicuque. Yu'un mi ta xlic jsutes quecutic ti laj jva'an jbacutic ta yalel ti tratee, ta xlic ilinuc ti Dios ta jtojoltique.

²¹ Ja' yu'un un, ti banquilaletic yu'un ti israeletique laj yalic mantal ti ch'an yutique, ti tsots sc'oplal comicuc ta jcuch-si'e, xchi'uc ta jcuch-vo' ta sventa scotol ti jteclume. Ti jech taje, mu'yuc xch'ay ta be yu'unic ti laj sva'an sbaic ta yalel strate ti banquilaletique.

²² Ja'uc ti Josuee laj sta ta iq'uel ti gabaonitaetique, ti xi laj yalbe ya'iique: —¿C'u cha'al laj alo'launcutic ti laj avalic ti nom liqueloxuc talele, ti c'alal li' no'ox nacaloxuc ta melele?

²³ Jech o xal un, bisbiloxuc ta cotol chaval xa'ech'ic ta banomil. Sbatel osil mosovinbiloxuc. Ja' avabtelic o ti sa' si'e, ta slupel talel ti vo' ti ta xtun ta sna ti Dios cu'une.

²⁴ Ti stuquique xi laj stac'beic ti Josuee: —Ti jech laj jpascutique, yu'un lixi'cutic avu'un ti xu' xamiluncutique. Yu'un laj ca'ibecutic sc'oplal ti Dios avu'unique, ti laj yalbe ti yajtunel Moisés ti ta xac'boxuc avich'ic scotol ti banomil li'e, ti ta stubbe sts'unubal scotol ti c'u yepal nacalic li'e.

²⁵ Avie, oyuncutic ta avoc ta ac'ob ta spasel ta jtojolcutic ti c'usi lec ta xava'ie.

²⁶ Ja'uc ti Josue une, mu'yuc laj yac' ye ti ta smilic gabaonitaetic ti israeletique.

²⁷ Ja' laj yabtelan o yu'un, ti cuch si'e, ta slupel talel ti vo' ti ta xtun yu'un ti jteclume, xchi'uc ti ta xtun ta sventa yaltar ti Diose, xchi'uc ti yavil bu ta sc'an ti Diose. Ja' to jech avi tana le' une ti sbainojic ta yabtelanel ti gabaonitaetique.