Josué 7 - Bible in Tzotzil de Chamula

Smul scolo' ti vinic Acane

¹ Ja'uc le' une, oy jun yu'unic snitilul ti Judae, ti sbiinoj Acane, xnich'on ti Carmie, smom ti Zabdie, syial mom xtoc ti Zarae, ti lic stam jaytos ti c'usi c'otem xa ta nopel sc'oplal ta xich' lilinele. Va'i un, c'ot ta smulic ti israeletic ti laj stamic ti yaloj ti Dios ta xich' lilinele. Jech o xal un, lic sc'ac'al yo'nton ti Dios ta stojolique.

Xi s'elan stojol ti mulile: ti tsalobbail ta yeloval Haie

² Ti Josuee, ta Jericó to, laj stac batel jun chibuc viniquetic c'alal ta jteclum Hai ti oy ta yeloval sloq'ueb c'ac'al yu'un ti Betele, ti nopol xil sba xchi'uc ti Bet-avene. Ti Josuee laj yalbe ya'iic ti ac'o xchajic ta q'uelel ti Haie. Jech ti stuquique batic ta xchajel ta q'uelel ti osile.

³ C'alal sutic talele, xi laj yalbeic ti Josuee: “Ma'uc ta sc'an ta xbat scotol viniquetic ta stsaquel ta leto ti jteclum Haie. Xu' no'ox ta cha'mil oxmil viniquetic ta yu'ninel ti jteclume. Altic ta xatac batel scotol ti viniquetique, yu'un ti jchabiej jteclume, mi ja'uc epic.”

⁴ Va'i un, oy nan oxmiluc viniquetic muyic batel ta stsaquel ta c'op ti jteclum Haie. Ja'uc le' une, tsalbil c'otic yu'un ti yajval lum Haie, ti lic ochicuc ta jatobal yu'une.

⁵ Laj van smilic vaclajuneb xcha'vinic (36) ta vo' israeletic. Ja'uc ti yane nutsbilic loq'uic ech'el ta sti'tac ti jteclume, ti c'ot c'alal to jots'ob tontic, ti laj slilinic ta milel ta yalobaltic xae. Ti va'i s'elan c'ot ta pasel une, jech o xal ti viniquetique lic tsic'uc yo'ntonic. Mi ja'uc xa oy yip ti yo'ntonique.

⁶ Ti Josuee xchi'uc ti moletic yu'un ti Israele laj xch'i'ic ta jatel ti sc'u'ique. Laj svijbe sbaic pucuc ta sjolic, svinajeb ti mu x'ech' mu xnel ta xa'iic ti vocole. Laj taj une, snupilan xa banomil c'ot spatan sbaic ta sts'el xcaxa ti Diose, ti jech yich'ojic o ic'ube,

⁷ ti xi lic yalilan ti Josuee: —¡Teque' no'ox un, Cajval! ¿c'u cha'al jelav talel avu'un ta jot uc'um Jordán ti jteclum li'e? ¿Mi yu'un tal avac'uncutic ta yoc ta sc'ob ti amorreoetique yo' jech ta xistsutsesuncutic ta j'ech'ele? ¡Ja' lec jechuc ma' ti comcuncutic ta jot uc'um Jordane!

⁸ ¡Mu xa ono'ox cha'bel tana un, Cajval! ¿C'usi ta xcal ti jatavic xa yu'un yajcontraic ti israeletique?

⁹ Ti cananeoetique xchi'uc scotol ti c'u yepal nacalic ta yosilique, ta xa'iic ti c'usi c'ot ta pasele, ti jmoj xvoletic talel ta xtal stsacuncutic ta contrae, ti ta xistsuts jcotolcutic yu'une, ti mi ja'uc xa junuc oy to buch'u ta svules ta jol o'ntonal ti jc'oplalcutique. Va'i un, ¿c'usi xu' ta xapas ti jelavem xu' avu'un une?

¹⁰ Xi tac'bat yu'un ti Diose: —¿C'usi ta xapas ti li' patalot ta lumtique? Lican.

¹¹ Ti israeletique laj sta smul scolo'ic. Yu'un mu'yuc laj yaq'uic ta venta ti jtrate laj jpas ta stojolique. Laj stamic ti c'usi tsots sc'oplal albil ta xich' lilinele, ti nac'al xa lec yu'un ta yelc'anel ti jmoj xa capal xchi'uc ti c'usi x'ayan yu'unic ti c'alal sna'ic lec ta sta svocol xchi'uquique.

¹² Jech o xal ti israeletique mu xu' yu'unic stsaquic ta c'op ti scontraique, yu'un ja' no'ox ta stambeic jatobal. Avi tana le'e, ja' xtunic o ti ac'o yich'ic tsutsesel ta j'ech'el ti israeletique. Ti mi mu xatsutsesbeic sc'oplal ta ora ti laj xa cal jmantal ti ac'o yich' tubbel sc'oplale, ta xquictaoxuc comel.

¹³ Lican, va'lan, tsobo ta sc'oponel ti jteclume. Albo ya'iic ti ac'o xchapan sbaic ti taluc sva'an sbaic ta jtojol ti oc'ome. Yu'un xichi ta xcalbe ya'iic ti vu'un Ajvalil Diosun yu'un ti israeletique: ‘Ti vo'ote, Israel, laj atam ti c'usi albil sc'oplal ti ta xich' lilinel ta j'ech'ele. Ti mi jech mu xaten loq'uel ta atojole, mi mu xaliline, mu xu' avu'unic xatsac ta c'op ti avajcontrae.’

¹⁴ Ti oc'ome, ta jujuvoc' yu'un ti jujuchop nitiluliletique, taluc ava'an abaic. Ti jvoc' nitilulil ta xcac' iluque, ta xtal sva'an sba ta jujun ti totil me'il yu'une. Ti totil me'il ta xcac' iluque, ta xtal sva'an sba ti jujuchop yuts' yalale. Ti uts' alalil ta xcac' iluque, ta xtal sva'an ta jujun ti viniquetic yu'une.

¹⁵ Ti buch'u vinaj ti ja' yich'oj ti c'usi albil sc'oplal ta xich' lilinele, ta xich' chiq'uel ta c'oc' xchi'uc ti yalab xnich'nabe, xchi'uc scotol ti c'usi x'ayan yu'une, ta scoj ti mu'yuc lec ti c'usi laj spas ta stojol ti israeletique, ti mu'yuc laj yac' ta venta ti strate Diose.

Laj yac'be sba svocol ta milel ti Acane

¹⁶ Ta yoc'omal un, sob xa lic ti Josuee. Laj yalbe mantal ti jteclume ti ta jujuvoc' yu'un nitiluletique, jelavuc sva'an sbaic. Jech ti Diose laj yac' iluc ti ja' snitilul ti Judae.

¹⁷ Va'i un, ti Josuee xcholet jelavuc ech'el yu'un ti jujuchop totil me'il yu'un snitilul ti Judae, vinaj snitilul ti Zarae. Ti ta snitilul ti Zarae, vinaj xnich'nab ti Zabdie.

¹⁸ Ti viniquetic ti ja' snitilultac ti Zabdie, ta jujun tal xcholetic ech' sva'an sbaic, vinaj ti Acane xnich'on ti Carmie, smom ti Zabdie, syial mom xtoc ti Zarae, ti ja' snitilultac ti Judae.

¹⁹ Va'i un, ti Josuee xi laj yalbe ti Acane: —Nich'on, lequil c'optabiluc, ich'biluc ta muc' c'otuc avu'un ti Ajvalil Dios yu'un ti israeletique, ti chapetan albun ca'i ta jamal ti c'usi laj apase. ¡Mu co'ntonuc no'ox xmacmun avu'un!

²⁰ Ti Acane xi laj staq'ue: —Melel, jamal xcal ava'i unbi oy jmul ta stojol ti Ajvalil Dios yu'un ti israeletique. Yu'un xi s'elan ti laj jpase:

²¹ Laj quil ta scotol ti c'usi laj jtamcutic ta Jericoe, ja' jlic poc' ti c'upil sba ti liquem talel ta Babiloniae, lajunvinic (200) ta sep plata taq'uin, xchi'uc jtel oro ti x'ech' jutuc ta o'lol kilo ti yalale. C'upij co'nton yu'un ti jaytos taje. Laj quich' comel. Laj jombe xch'enal ta yut caxibal na, laj jmuc ti taq'uine.

²² Ti Josuee, ta ora no'ox, laj stac batel jun chib viniquetic ta yaxibal na ti Acane. Tey laj staic talel scotol ti c'usitic nac'bile, xchi'uc ti plata taq'uin ti mucbile.

²³ Laj stsaquic loq'uel. Laj yich'ic batel ta stojol ti Josuee, ta stojol ti israeletique, xchi'uc ta stojol ti Diose.

²⁴ Ts'acal to un, laj yiq'uic batel ta stenlej Acor ti vinic Acane jmoj xchi'uc ti plata taq'uine, ti c'u'ile, ti jtel oroe, ti squeremtaque, ti stsebtaque, ti xvacaxtaque, ti sburrotaque, ti xchijtaque, ti yaxibal nae, xchi'uc scotol xtoc ti c'usitic x'ayan yu'une.

²⁵ Xi albat yu'un ti Josuee: —¿C'u cha'al vul ta jbacutic avu'un ti vocole? Avi tana une, c'otuc ta aba yu'un Dios ti vocol ti vul ta jtojolcutic avu'une. C'alal jech laj yal taje, scotol ti israeletique lic spujbeic ton ti Acane, xchi'uc ti c'u yepal oyique. Ts'acal to un, lic xchiq'uic ta c'oc'.

²⁶ Laj taj une, lic sbusanbeic epal ton ta sba, ti busul to avi tana le'e. Jech o xal un, ti bu taj une, sbiinoj o yu'unic stenlejal Acor avi tana le' une. Yu'un ja' to jech lamaj sc'ac'al yo'nton ti Dios ta stojol ti Israele.