Josué 3 - Bible in Tzotzil de Chamula

Ti israeletique ta x'ech' xtuch'ic ti uc'um Jordane

¹ Sob xa ta yoc'omal un, ti Josué xchi'uc scotol ti israeletique loq'uic batel ti ta Sitime. C'otic c'alal ta uc'um Jordán. Ti c'alal mu to ta x'ech' xtuch'ique, c'ot slaman sbaic ti bu taje.

² C'alal ech' xa ox ti yoxibal c'ac'ale, jech ti banquilaletique lic xaniic ti bu tsobolique.

³ Va'i un, xi laj yalic mantal ta stojol ti israeletique: “C'alal ta xavilic ti chechbil ta x'ech' xcaxa ti Dios yu'un ti pale levitaetique, loc'anic talel ti bu oyoxuque. Ts'acliic batel.

⁴ Ja' to jech ta xana'ic ti bu sc'an ta xatamic batele. Yu'un mi ja'uc oy buch'u junuc xanavem avu'unic ta be li'e. Ja' no'ox un, mu me loq'ueluc xanopajic ech'el ta sts'el ti caxae, ti nom nom no'ox xa ts'acliic ech'el ti nopoluc lajuneb cien (1,000) metro xavilic ech'ele.”

⁵ Ti Josuee xi laj yale: “Ac'o abaic ta mesel tusel. Yu'un ti oc'ome, ta xavil ta aba ta asatic ti ch'ayal ta xc'ot avo'ntonic yu'un ti c'usi ta spas ti Diose.”

⁶ Ja'uc ti paleetique xi albatic yu'un ti Josuee: “Chechic batel xcaxail ti tratee, ti ba'beanic ech'el yu'un ti jteclum ta xtuch'el ti uc'ume.” Jech ti paleetique jba'beic ech'el yu'un ti jteclume, ti xchechojic batel xcaxail ti tratee.

⁷ Va'i un, ti Diose xi laj yalbe ti Josuee: “Li' ta xlic ech'el avi tanae ti tsots ac'oplal ta xac'ot cu'un ta sba ta sat ti israeletique. Ti jech taj une, ja' to jech ta xilic ti oyun ta atojol jech c'u cha'al laj jchi'in ti Moisese.

⁸ Ja'uc ti vo'ot une, albo ya'i mantal ti paleetic ti ac'o xchechic batel xcaxail ti tratee. C'alal mi c'otic ta ti' uc'um une, ac'o sva'an sbaic ta yut uc'um un.”

⁹ Va'i un, ti Josuee xi laj yalbe ti israeletique: “La'ic li'e, la' a'yio ava'iic ti c'usi ta xal ti Ajvalil Dios avu'unique.

¹⁰ Ja' jech senyail ti chi'inbiloxuc yu'un ti cuxul Diose: Ti c'alal xavoletic ech'el ta xanobale, ti stuque smeset no'ox ech'el ta tsutsesel yu'un ti cananeoetique, ti hititaetique, ti heveoetique, ti ferezeoetique, ti gergeseoetique, ti amorreoetique, xchi'uc ti jebuseoetique.

¹¹ Q'uelic no'ox avilic, yu'un ti xcaxail strate ti Dios yu'un sbejel banomile, jelavem xa ech'el avu'unic ta xtuch'el ti uc'um Jordane.

¹² Jech o xal tana un, t'ujic lajcha'vo' (12) viniquetic ti jujun ta xloq'uic talel ta xlajcha'voc'al snitilultac ti Israele.

¹³ C'alal ta sts'aj yoquic ta vo' ti paleetic ti xchechojic batel xcaxa Dios yu'un ti sbejel banomile, ta spas ta cha'ch'ac ti uc'ume. Ti yoc ta xanav talel ta ac'ole, ta xpaj, ti co'ol to s'elan macbil ta xc'ot yilele.”

¹⁴ Jech ti israeletique loq'uic talel ti bu lamalic ta nacleje yo' jech ta x'ech' xtuch'ic ti uc'ume. Jba'be batel yu'unic ti paleetic ti xchechojic batel xcaxail ti tratee.

¹⁵ Ja'uc le' une, ti c'alal ochic batel ta uc'um ti paleetique, ti c'alal ts'ajal c'ot yoquic ta ti' uc'ume, ta jech no'ox yepal lic pajuc ti yoc uc'ume. (Yu'un ti c'alal ta yorail ta xich' tsobel ti sat ts'unubale, ja' o nojem yoc ti uc'um ta j'ech'ele.)

¹⁶ Ti yoc ti ta xlic talel ta ac'ole, nom to xil ti Adam ti ja' jun jteclum ti nopol xil sbaic xchi'uc ti pojobbail ti oy ta Saretane. Ti yoc taje lic pajuc, ti co'ol to s'elan macbil c'ot yilele. Ja'uc ti yoc ta xanav yalel ta stuq'uil Sts'ijlajan Nabe, x'oquin ono'ox ta xanav batel, ja' to ti c'uxi laje. Ja' jech c'ot ta pasel ti laj xch'ac sba yoc ti uc'ume. Jech ti israeletique ta yeloval jteclum Jericó ech' xtuch'ic ti uc'ume.

¹⁷ Scotol ti israeletique, taquin ti uc'um ech' xtuch'ique. Jech ti paleetique, jun yo'nton va'alic ta o'lol uc'um ta taquin banomil xchechojic xcaxail strate ti Dios ti c'alal yacal ta xjelavic ti Israele, mu'yuc ach'el, taquin lec ta j'ech'el.