Josué 24 - Bible in Tzotzil de Chamula

Slajeb patob o'ntonal ta xac' comel ti Josuee

¹ Ti Josuee laj stsob talel ta Siquem scotol ti jujuvoc' nitiluletic yu'un ti Israele. Laj staan ta iq'uel ti moletique, ti banquilaletique, ti jchapanvanejetique, ti j'opisialetic ta stojol ti Diose.

² Xi laj yal ta stojol scotol ti jteclume: —Xi s'elan ta xal ti Ajvalil Dios yu'un ti Israele: ‘Ti Tare ta vo'ne xchi'uc ti xnich'nabe, ja' ti Abrahame, ti Nacore, ti ja' amolmuc'totique, laj yich'ic ta muc' yan diosetic ti c'alal nacalic to ox ta sti'il uc'um Eufratese.

³ Ta sti'il uc'um Eufrates, laj jta talel ta iq'uel ti Abrahame, ti xjoyet talel ta xaniel cu'un sjunlej yosilal ti Canaane. Yu'un ba'yel laj cac'be jun xnich'on ti Isaac sbie, lic epajicuc un.

⁴ Ti Isaac xtoc une, laj cac'be chib xnich'on, ti Jacobe xchi'uc ti Esaue. Ti Esaue laj sbanomilin ti yosilal muc'tic vitstic yu'un ti Seire. Ja'uc ti Jacob xchi'uc ti xnich'nabe batic c'alal to Egipto.

⁵ Va'i un, laj jtac ech'el ti Moisese, xchi'uc ti Aarón ti bu taje. Laj jyayijesan ta milel ti egipcioetic ti ep chamic ta j'ech'ele, ja' to ti c'uxi laloq'uic talel cu'un teye.

⁶ C'alal loq'uic talel ta Egipto ti amolmuc'totic ta vo'nee, ta epal ca', ta epal carreta sventa pasob leto ti nutsbilic talel yu'un ti egipcioetic c'alal to Tsajal Nabe.

⁷ Ti amolmuc'totique laj staicun ta c'oponel. Laj cac' taluc jun muc' ta ic'ubel osil ta o'lol yu'unic xchi'uc ti egipcioetique. C'ot ta pasel cu'un ti laj cac' taluc ti nab ta sbaique yo' jech mut'ijic ti egipcioetique. Yu'un ti c'usi laj jpas ta Egiptoe, rexticooxuc. ‘Ts'acal to un, jal lajalijic ta sbajtical banomil,

⁸ ja' to ti c'uxi lavulic cu'un ta yosilic ti amorreoetic ti oy ta yeloval sloq'ueb c'ac'al yu'un ti Jordane. Ti stuquic une lic stsacoxuc ta leto. C'ot ta pasel cu'un ti laj cac'boxuc ta avoc ta ac'obique ti tsalbil c'ot avu'unique. Laj avu'ninbeic ti sbanomilique.

⁹ Ts'acal to un, ti Balaque, xnich'on ti Zipore, ajvalil yu'un ti moabitaetique, tal stsacoxuc ta leto. Ti Balaque laj stac mantal ta sa'el talel ti Balaame, xnich'on ti Beore yo' jech ta sc'anboxuc alajel atubelic.

¹⁰ Mi ja'uc laj cac' que jti' ti ta sc'anboxuc alajel atubelic ti Balaame. C'ajomal no'ox c'ot ta pasel ti laj sc'anboxuc ti alequilal avutsilique. C'ot ta pasel ti laj jpojoxuque.

¹¹ Va'i un, ti vo'oxuc une cuch avu'unic ta xtuch'el jelavel ti uc'um Jordane. Lac'otic c'alal to Jericó. Ti jnaclejetic ta Jericoe laj stsacoxuc ta leto, (ti amorreoetique, ti ferezeoetique, ti cananeoetique, ti hititaetique, ti gergeseoetique, ti heveoetique, xchi'uc ti jebuseoetique). C'ot ta pasel cu'un ti tsalbil c'ot avu'unique.

¹² Ja'uc ti chib ajvalil yu'un ti amorreoetique, ma'uc ta espada, ma'uc ta yolob ti laj atsalique. Yu'un c'ajomal no'ox laj jcaj-tic'be xi'el ti c'alal mu to ta xavulic ta loq'uele, ta lec no'ox caj jatavic loq'uel.

¹³ Yu'un laj cac'boxuc jun banomil ti bu ma'uc avabtelanojique, ti jteclumetic ti bu ma'uc laj ameltsanique. Avi tana une, nacaloxuc xa, yacal xa ta xatunesic ta slajesel ti aceitunae xchi'uc ti uvae, ti bu ma'uc laj ats'unique.’ Ti Josuee xi to lic yalolan batele:

¹⁴ —Ta sventa ti jech scotol le' une, xi'taic ti Diose. Ta stuq'uiluc ajol, ta sjunuluc avo'nton, ac'o abaic ta tunel ta stojol. Ma'ucuc me ti teq'uel ta xc'ot ta avo'ntonic ta yich'el ta muc' ti diosetic ti laj snijan xchiman sbaic ta yich'el ta muc' ti amolmuc'totic ti oyic to ox ta ti' uc'um Eufratese, xchi'uc ti ta Egiptoe. C'ajomaluc no'ox me, ac'o abaic ta tunel yu'un ti Dios stuque.

¹⁵ Ti mi mu xac'an xavac' abaic ta tunel yu'un ti Diose, xi nopic lec avie ti buch'u junucal ta xbat avac' abaic ta tunel ta stojole: ¿Mi ja' ta xac'an ta xavac' abaic ta tunel yu'un ti diosetic ti laj yich'ic ta muc' ti amolmuc'totic ti oyic to ox ta sti'il uc'um Eufratese? ¿Mi ja' ta xac'an ta xavich'ic ta muc' ti diosetic yu'un ti amorreoetic ti nacalic ta banomil li'e? Ja'uc ti vu'une xchi'uc ti calab jnich'nabe, ja' teq'uel ta xc'ot ta co'nton ti ta xcac' jbacutic ta tunel ta stojol ti Diose.

¹⁶ Va'i un, ti jteclume xi laj yalique: —¡Ma'uc nan xc'ot ta pasel yu'un Dios ti ta xquictacutic comel ta yich'el ta muc' ti Diose yo' jech xbat jnijan jchiman jbacutic ta yich'el ta muc' ti yan diosetique!

¹⁷ Yu'un ja' stuc ti Diose laj sloq'uesuncutic talel ta Egipto xchi'uc ti jmolmuc'totcutic ti bu to ox tiq'uiluncutic ta mosovile. Yu'un ja' stuc ti laj yac' ta ilel ta jba ta jsatcutic ti ep ta tos ti ch'ayal ta xc'ot o'ntonal yu'une. Yu'un ja' laj xchabiotic. Yu'un laj spojotic ti c'u sjalil ti bu xijoyetotic talel ta xanvile, ti c'alal lij'ech' talel ta epal jteclumetique.

¹⁸ Yu'un ti stuque ja' laj sten loq'uel ta jba ta jsatic scotol ti jteclumetic ti bu lij'ech'otic talele, ti amorreoetic ti li' to ox nacalique. Ta sventa ti jech scotol taj une, ja' ta xcac' jbacutic ta tunel yu'un ti Dios eque, yu'un ja' Dios cu'untic ti stuque.

¹⁹ Ja'uc ti Josuee xi laj stac'be ti jteclume: —Mu xu' avu'unic ta xavac' abaic ta tunel yu'un ti Diose. Yu'un ti stuque ja' jun Ch'ul Dios. Mu j'ech'eluc ts'icbaj ta xa'i ti pec'tsanbil ta xc'ot ti sc'oplal avu'unique, ti ja' xa ich'bil xa ta muc' ta xc'ot avu'unic ti yane. Mi ja'uc sts'ic yu'un ti atoyobbailique, ti amulique.

²⁰ Mi ta xavicta abaic ta tunel yu'un ti Diose, ti ja' xa ta xlic avac' abaic ta tunel yu'un ti diosetique, ja' no'ox jech ta spac sutel ti Dios ta yac'beloxuc ep ta tos avocolique, ti ta xch'ay o ti ats'unubalic yu'une.

²¹ Xi tac'bat yu'un ti jteclume: —Mi ja'uc jech ta xc'ot ta pasel taj une, yu'un ta j'ech'el ta xcac' jbacutic ta tunel yu'un ti Diose.

²² Va'i un, xi tac'batic yu'un ti Josuee: —Rexticoxuc atuquic ti jech laj at'ujic ti ta xavac' abaic ta tunel yu'un ti Diose. —Rexticouncutic —xi laj stac' ti stuquique.

²³ Xi tac'batic yu'un ti Josuee: —Lec un cha'e, tenic loq'uel ti yan diosetic ti oy ta atojolique. Sutanic talel ta sjunuluc avo'ntonic ta stojol ti Ajvalil Dios yu'un ti Israele.

²⁴ Xi tac'bat yu'un ti jteclume: —Ta jbel sc'oplal ta xcac' jbacutic ta tunel yu'un ti Ajvalil Dios cu'untique. Ta jch'uncutic ta spasel scotol ti c'usi ta xiyalbuncutique.

²⁵ Ta yorail no'ox ti jech c'ac'al taje, ti Josuee laj spas jun trate xchi'uc ti jteclum tey ta Siqueme; laj yac'be lec sna' ti oy c'usi jbel tsots albile, xchi'uc ti c'usi nopbile,

²⁶ ti laj sts'iba ta jpoc svunal ti oy c'usi jbel tsots albil yu'un ti Diose, Laj taj une, lic stam jun muc' ta ton. Laj sva'an ta yolon tulan ti bu oy Axibalna yu'un ti Diose.

²⁷ Xi laj yalbe scotol ti jteclume: —Ti ton li'e, ja' sna'obil cu'untic. Ta xc'ot ta rextico ti ta svules ta joltic scotol ti c'usi laj yalbotic ti Diose. Ja' ta svinajes ac'oplalic ti mu jeche'uc no'ox ta xapac'ta abaic ta stojol ti Dios avu'unique.

²⁸ Ts'acal to un, ti Josuee laj stac batel ta jujuvoc' ti bu ac'bil ti sbanomilique.

Ta xcham ti Josuee

²⁹ Ts'acal to un, mu xa sjaliluc bat, cham ti Josué yajtunel ti Diose, xnich'on ti Nune. Yich'oj xa lajuneb svacvinic (110) jabil.

³⁰ Laj smuquic ta sbanomil stuc ta Timnat-sera ta vitstic yu'un ti Efraín ta stuq'uil yolon ti yolon xocon sloq'ueb c'ac'al yu'un ti vits Gaase.

³¹ C'alal jech cuxul to ox ti Josuee, ti israeletique yac'oj sbaic ta tunel ta stojol ti Diose, xchi'uc ti c'alal cuxulic to ox ti moletic ti buch'utic sna'ojic lec scotol ti c'usi laj spas ti Dios ta stojol ti israeletique.

Ti israeletique ta smucbeic sbaquil ti Josee

³² Sbaquiltac ti José ti laj yich'ic loq'uel talel ta Egipto ti israeletique, bat smuquic ta Siquem ta yosil Jacob ti laj sman ta vo'vinic (100) ta sep plata taq'uin ti ja' yu'unic xnich'nabtac ti Hamore, ti ja' stot ti Siqueme. Ts'acal to xtoc un, c'ot ta xrextoic xnich'nabtac ti Josee.

Ta xcham ti Eleazare

³³ C'alal cham ti Eleazar xnich'on ti Aarone, laj smuquic ta stenlej stselej yu'un ti Finees ti ja' xnich'one, ti ac'bil yosilal yu'un ti Efraín ta vitstique.