Josué 21 - Bible in Tzotzil de Chamula

Steclumalic ti levitaetique

¹ Ti banquilaletic yu'un ti jujuchop totil me'iletic yu'un ti levitaetique, bat sc'oponic ti pale Eleazare, ti Josuee, xchi'uc ti banquilaletic yu'un ti jujuchop ta jujuvoc' snitilultac ti Israele.

² Xi c'ot yalic ta Silo ti oy ta Canaán banomile: “Ta sventa ti Moisese laj yal mantal ti Dios ti ac'o quich'cutic ac'bel ti jteclumetic bu xu' ta xinaquicutic xchi'uc ti osil ti oy lec jamal yaxaltic yu'une, yo' jech xu' ta xve' ti jchon jbolomcutique.”

³ Jech o xal un, ta sbanomil stuquic ti israeletique, laj yac'beic jayibuc jteclumetic ti levitaetique, xchi'uc osil ti oy lec jamal yaxaltic yu'un ta sventa sve'eb ti chon bolometic jech c'u cha'al yaloj ti Diose.

⁴ C'ot ta pasel ti ba'yel laj yich' q'uelel ta yorail ti bu ta xc'otic ti jchop ta jujuchop ti levitaetic ti liquem talel sts'unubal ta stojol ti Coate. Ti coatitaetic ti liquem talel sts'unubalic ta stojol ti pale Aarone, laj yich'ic oxlajuneb (13) jteclumetic ta sbanomilic snitilultac ti Judae, ti Simeone, xchi'uc ti Benjamine.

⁵ Ja'uc ti yan coatitaetic xtoque laj yich'ic lajuneb (10) jteclumetic ta sbanomilic snitilultac ti Efraine, ti Dane, xchi'uc ti o'lol jvoc' ti ja' snitilul ti Manasese.

⁶ C'alal laj taj une, ti jujuchop levitaetic ti liquem talel sts'unubalic ta stojol ti Gersone, c'ot yorail yu'unic ti laj yich' oxlajuneb (13) jteclumetic ti oy ta sbanomilic snitilultac ti Isacare, ti Asere, ti Neftalie, xchi'uc o'lol jvoc' snitilultac ti Manasese, ti oy ta jteclum Basane.

⁷ Ti yan jujuchop snitilultac levitaetic ti liquem talel sts'unubal ta stojol ti Merarie, laj yich'ic lajcheb (12) jteclumetic ti oy ta sbanomil snitilultac ti Rubene, ti Gade, xchi'uc ti Zabulone.

⁸ Ti israeletic une, ta yorail laj sq'uelic bu ta xich'ic snitilultac ti levitaetic ti jteclumetique, xchi'uc ti jamal osil ti oy lec ti yaxaltique. Jech laj spasic jech c'u cha'al albilic yu'un Dios ta sventa ti Moisese.

⁹ Ti jteclumetic ti xcholet ta xich' albel sc'oplale, ja' laj yaq'uic snitilultac ti Judae, xchi'uc snitilultac ti Simeone.

¹⁰ C'ot ta yu'unic ti levitaetic ti ayanemic talel ta jujuchop yu'un ti Coate, ti liquem talel sts'unubal ta stojol ti Aarone, ti ja' ba'yel loc' ti yorail yu'unique.

¹¹ Ti ta muc' ta vitstic ti oy ta yosilal ti Judae, laj yaq'uic ti Quiriat-arbae, xchi'uc ti jamal yaxaltic sventa sve'eb ti chon bolometique, ti xcaltique, ja' ti Hebrone, ja' ti muc' ta jteclum yu'unic snitilultac ti inate' vinic Anaque.

¹² Ja'uc ti sbanomilale, xchi'uc ti bic'tal lumetic ti joyol ta spat ta xocone, ja' com ta xrexto ti Caleb xnich'on ti Jefone.

^13-16 Ma'uc no'ox ac'batic Hebrón ti c'otem ta pojobbail jteclum yu'unic ti buch'u milvanique, xi s'elan xcholet ac'bat yich'ic snitilultac ti pale Aarón jech c'u cha'al li'e: ti Libnae, ti Jatire, ti Estemoae, ti Holone, ti Debire, ti Aine, ti Jutae, xchi'uc ti Bet-semese. Yu'un ti balunchop (9) jteclumetic taje, oy lec jamal yaxaltic yu'un sventa sve'eb ti chon bolometique.

¹⁷ Ja'uc snitilultac ti Benjamine, laj yac'beic yich' ti Gabaone, ti Gebae,

¹⁸ ti Anatote, xchi'uc ti Almone, ti ja' chanib (4) jteclumetic ti oy lec jamal yaxaltic sventa sve'eb ti chon bolometique.

¹⁹ Ti jteclumetic ti laj yich'ic snitilultac ti Aarone, ja' oxlajuneb (13) ta scotol, xchi'uc oy lec yaxaltic ta jujusep sventa sve'eb ti chon bolometique.

²⁰ Ti yan levitaetic ti liquem talel sts'unubalic ta stojol ti Coate, ac'bat yich'ic jteclumetic ti oy ta sbanomilic snitilultac ti Efraine.

²¹ Ti ta vitstic yu'un ti Efraine, ja' laj yaq'uic ti jteclum Siqueme yo' ta xc'ot ta pojobbail yu'unic ti mi oy buch'u milvane. Ja' jech xtoc laj yac'beic yich' ti Gezere,

²² ti Kibsaime, xchi'uc ti Bet-horone, ti ja' chanib (4) jteclumetic xchi'uc oy lec jamal yaxaltic sventa sve'eb ti chon bolometique.

²³ Ti jteclumetic ti oy ta sbanomil snitilultac ti Dane, ja' laj yac'beic yich' ti jteclum Eltequee, ti Gibetone,

²⁴ ti Ajalone, xchi'uc ti Gat-rimone, ti ja' chanib (4) jteclumetic xchi'uc oy lec jamal yaxaltic sventa sve'eb ti chon bolometique.

²⁵ Ja'uc ti yan jteclumetic ti oy ta sbanomilic ti o'lol jvoc' snitilultac ti Manasese, laj yac'beic yich' chib (2) jteclumetic, ja' ti Taanaque, xchi'uc ti Gaat-rimone, xchi'uc oy lec jamal yaxaltic sventa sve'eb ti chon bolometique.

²⁶ Ti jteclumetic ti laj yich'ic ti coatitaetique, ja' lajuneb (10) jteclumetic ta scotol, xchi'uc oy lec yaxaltic jujusep sventa sve'eb ti chon bolometique.

²⁷ Ti yan levitaetic snitilultac ti Gersone, ac'bat yich' chib jteclum, xchi'uc ti oy lec jamal yaxaltic sventa sve'eb ti chon bolometique. Ti jteclum taje, ja' yu'unic ti o'lol jvoc' snitilultac ti Manasese. Ti chib jteclum taje, ja' ti Golán ti oy ta Basane, xchi'uc Beesterae yo' jech ta xtun yu'unic ta pojobbail ti jteclume.

²⁸ Ti ta sbanomil snitilultac ti Isacare, laj yaq'uic ti jteclum Cisone, ti Daberate,

²⁹ ti Jarmute, xchi'uc ti En-ganime, ti ja' chanib (4) jteclumetic xchi'uc oy lec jamal yaxaltic sventa sve'eb ti chon bolometique.

³⁰ Ti ta sbanomil snitilultac ti Asere, ja' laj yaq'uic ti jteclum Misaele, ti Abdone,

³¹ ti Helcate, xchi'uc ti Rohobe, ti ja' chanib (4) jteclumetic xchi'uc oy lec jamal yaxaltic sventa sve'eb ti chon bolometique.

³² Ti ta sbanomil snitilultac ti Neftalie, laj yaq'uic oxib (3) jteclumetic xchi'uc oy lec jamal yaxaltic sventa sve'eb ti chon bolometique. Ti oxib jteclume, ja' ti Cedes ti oy ta Galileae, ti Hamot-dore, xchi'uc ti Cartane, ti ta xtun ta pojobbail jteclumetic yu'unique.

³³ Ja' yu'un un, ti gersonitaetique laj yich'ic oxlajuneb (13) jteclumetic ta scotol, xchi'uc jujusep ti oy lec yaxaltic sventa sve'eb ti chon bolometique.

³⁴ Ja'uc ti jujuchop levitaetic ti mu'yuc to c'usi yich'ojique, ti ja' snitilultac Merari xcaltique, xi s'elan laj yac'beic yich' ti jteclumetic ti oy ta sbanomil snitilultac ti Zabulone: ti jteclum Jocneame, ti Cartae,

³⁵ ti Dimnae, xchi'uc ti Nahalale. Ja' oy chanib (4) jteclumetic xchi'uc oy lec jamal yaxaltic sventa sve'eb ti chon bolometique.

³⁶ Ti ta sbanomil snitilultac ti Rubene, laj yaq'uic ti jteclum Besere, ti Jahase,

³⁷ ti Cademote, xchi'uc ti Mefáate. Ja' oy chanib (4) jteclumetic xchi'uc oy lec jamal yaxaltic sventa sve'eb ti chon bolometique.

³⁸ Ti ta sbanomil snitilultac ti Gade, ja' laj yaq'uic ti jteclum Ramot ti oy ta Galaade, ti Mahanaime yo' jech ta xtun yu'unic ta pojobbail ti jteclumetique.

³⁹ Ma'uc no'ox taje, laj yaq'uic xtoc ti Hesbone, xchi'uc ti Jazere. Ja' oy chanib (4) jteclumetic xchi'uc oy lec jamal yaxaltic sventa sve'eb ti chon bolometique.

⁴⁰ Lajcheb (12) jteclumetic laj yich'ic ta scotol ti jlom snitilultac ti levitaetic ti mu'yuc to ox c'usi yich'ojique, ti ja' snitilultac ti Merari xcaltique.

⁴¹ Vaxaquib yoxvinic (48) jteclumetic xchi'uc jujusep jamal yaxaltic sventa sve'eb ti chon bolometic laj yich'ic ti levitaetic ti oy ta yosilic ti israeletique

⁴² Ti jujun jteclumetic taje, slec-lecoj ti joyobtabil ta yaxaltic ti jujusepe. Ja' jech oy scotol ta jujun ti jteclumetique.

Xc'ot xc'opoj ti Diose

⁴³ Ja' jech c'ot ta pasel ti ac'batic sbanomilic ti israeletic yu'un Dios ti laj sva'an sba ta yalel ta stojol ti smolmuc'totique, ti c'ot ta yu'unique, ti lic nacliicuque.

⁴⁴ Yu'un ti Diose c'ot ta pasel yu'un ti c'usi yaloje. Yu'un ta sbejel banomil laj yac' jun o'ntonal. Mu'yuc stsalatic yu'un ti yajcontrae. Yu'un c'ot ta jtsalvanej yu'unic ti Dios ti jech tsalvanic ti israeletique.

⁴⁵ Mi ja'uc jbeluc sc'op ti Dios ti mu'yuc xc'ot ta pasel yu'un scotol ti c'usi loc' ta ye ta sti' ti laj yal ta spas ta stojol ti israeletique.