Josué 19 - Bible in Tzotzil de Chamula

Ti c'u sjamlej yosil snitilultac ti Simeone

¹ Ti xcha'sepal osil ti laj yich' q'uelel ta yoraile, ja' c'ot ta stojol snitilultac ti Simeone. Ti ts'ac yu'une oy ta yut yosil snitilultac ti Judae.

^2-6 Ja' c'ot ta xrextoic ti jteclumetic Beersebae, ti Sebae, ti Moladae, ti Hazar-suale, ti Balae, ti Eseme, ti Eltolade, ti Betule, ti Hormae, ti Siclage, ti Bet-marcabote, ti Hasar-susae, ti Bet-lebaote, xchi'uc ti Saruhene. Ja' oxlajuneb (13) jteclumetic ta scotol xchi'uc ti bic'tal lumetic ti joyol ta spat ta xocontaque.

⁷ Ja' jech xtoc laj yich'ic ti jteclumetic ti oy ta En-rimone, ti Étere, ti Asane, xchi'uc ti bic'tal lumetic ti joyol ta spat ta xocontac xtoque.

⁸ Laj yich'ic xtoc ti bic'tal lumetic ti oyic ta Baalat-beere, ti ja' yu'un ti jteclum Ramat ti oy ta Négueve. Taje, ja' ti banomil laj yich'ic snitilultac ti Simeone.

⁹ Ti c'u yepal banomil laj yich'ic snitilultac ti Simeone, oy ta yutil yosilal ti Judae, yu'un mu albajuc yepal ti yosil yich'ojique. Laj yich'ic snitilultac ti Simeón ti banomil taje.

Ti c'u sjamlej yosil snitilultac ti Zabulone

¹⁰ Ti yoxsepal osil ti laj yich' q'uelel ta yoraile, ja' c'ot ta stojol snitilultac ti Zabulone. C'ot ta Sarid sts'aquilal ti yosile.

¹¹ Ti bu taje, laj stam ech'el ta stuq'uil yolon smaleb c'ac'al, ti ta x'ech' ta Maralae, xchi'uc ta Dabésete, ti c'ot ta tsutsel ta uc'um ti oy ta yeloval Jocneame.

¹² Ti lic ech'el ta Sarid ti sts'aquile, ech' ta stuq'uil sloq'ueb c'ac'al, ti c'ot ta loq'uel ta Quislot-tabore. Taje, ech' ta Daberat ti bu ta xmuy c'alal to Jafíae.

¹³ Ti bu taje, lic stam ech'el ta stuq'uil sloq'ueb c'ac'al, c'ot ta Gat-hefer. Ech' ta Itá-cazin, c'ot c'alal to ta Rimón, ech' sjoy ta Neá.

¹⁴ Ti ts'ac ti lic ta yolon ti yolon xocon sloq'ueb c'ac'ale, ech' sjoy c'alal to Hanatón, c'ot ta loq'uel ta stenlej Jefte-el.

¹⁵ Ti ta banomil taje, oy yu'un lajcheb (12) jteclumetic xchi'uc bic'tal lumetic ti nopol joyol ta spat ta xocontaque, ti xi s'elan ma' ti oy ta scotol taj une: ti Catate, ti Nahalale, ti Simrone, ti Idalae, xchi'uc ti Belene.

¹⁶ Taje, ja' jech sjamlej yosilal ti jteclumetic xchi'uc ti bic'tal lumetic ti joyol ta spat ta xocontac ti laj yich'ic snitilultac ti Zabulone.

Ti c'u yepal sbanomilic snitilultac ti Isacare

¹⁷ Ti xchansepal osil ti laj yich' q'uelel ta yoraile, ja' c'ot ta stojol snitilultac Isacare.

^18-21 Ti c'u sjamlej ti sbanomilique, och ta venta ec ti jteclumetic Jezreele, ti Quesulote, ti Suneme, ti Hafaraime, ti Sihone, ti Anaharate, ti Rabite, ti Quisione, ti Ebese, ti Rémete, ti En-ganime, ti En-hadae, xchi'uc ti Bet-pasese.

²² Ti ts'aque sts'aquinoj sbaic c'ot xchi'uc ti Tabore, ti Sahazimae, xchi'uc Bet-semese, ti c'ot ta tsutsel ta uc'um Jordane. Ja' vaclajuneb (16) jteclumetic, xchi'uc ti bic'tal lumetic ti joyol ta spat ta xocontaque.

²³ Taje, ja' jech sjamlej yosilal ti jteclumetic xchi'uc ti bic'tal lumetic ti joyol ta spat ta xocontac ti laj yich'ic snitilultac ti Isacare.

Ti c'u sjamlej yosil snitilultac ti Asere

²⁴ Ti yo'sepal osil ti laj yich' q'uelel ta yoraile, ja' c'ot ta stojol snitilultac ti Asere.

²⁵ Ti c'u sjamlej ti sbanomilique, och ta venta ec ti jteclumetic ti Helcate, ti Halie, ti Betene, ti Acsafe.

²⁶ Ma'uc no'ox taje, och ta venta xtoc ti Alaméleque, ti Amade, xchi'uc ti Misale, ti xcaltique, c'ot ta stuq'uil smaleb c'ac'al ta vits Carmelo, xchi'uc ta vits Sihor-libnat.

²⁷ Ti ts'ac ti lic ta sloq'ueb c'ac'ale, laj stam ech'el ta stuq'uil yolon ti yolon xocon sloq'ueb c'ac'ale, ti c'ot ta Bet-dagone, ti sts'aquinoj sbaic c'ot xchi'uc ti sts'ac snitilultac ti Zabulone, ti ta stselej Jefte-ele, ti Bet-émeque, ti Neiele, ti jelav to ech'el ta Cabule.

²⁸ Ti xcaltic une, ech' stsac ta yu'ninel ti Abdone, ti Rehobe, ti Hamone, xchi'uc ti Canae, ti c'ot c'alal to jteclum Sidone.

²⁹ Ts'acal to un, ti ts'ac une ech' sjoy ta Ramá, c'ot ta loq'uel ta jteclum ti oy ta Tiro ti pim lec ti smocale. Laj stam liquel ta jteclum Hosa, ti c'ot ta loq'uel ta muc' ta nab Mediterráneoe, ti Mahalebe, ti Aczibe,

³⁰ ti Umae, ti Afeque, xchi'uc ti Rehobe. Ja' chib xcha'vinic (22) jteclumetic loc' ta chapel, xchi'uc ti bic'tal lumetic ti nopol joyol ta spat ta xocontaque.

³¹ Taje, ja' jech sjamlej sbanomilic laj yich'ic ti jujuchop yu'un ti jvoc' snitilultac ti Asere.

Ti c'u sjamlej yosil snitilultac ti Neftalie

³² Ti svac-sepal osil ti laj yich' q'uelel ta yoraile, ja' c'ot ta stojol snitilultac ti Neftalie.

³³ Ti sts'aquil yosil taje, lic ta jteclum Élef, ti ech' batel ti Alón-saananime, ti Adami-necebe, ti Jabneele, ti Lacume, ti c'ot ta loq'uel ta uc'um Jordane.

³⁴ Ti sts'aquil ti lic ta stuq'uil smaleb c'ac'ale, ech' batel ti Aznot-tabore, xchi'uc ti Hucoque, ti xcaltique, ti ta stuq'uil yolon ti yac'ol xocon sloq'ueb c'ac'ale, ti sts'aquinoj sbaic c'ot xchi'uc sts'aquil yosilic snitilultac ti Zabulone. Ja'uc ti ta stuq'uil smaleb c'ac'ale, sts'aquinoj sbaic c'ot xchi'uc sts'aquic snitilultac ti Asere. Yan ti ta stuq'uil sloq'ueb c'ac'ale, sts'aquinoj sbaic c'ot xchi'uc sts'aquic ti snitilultac ti Neftalie, ti c'ot c'alal ta uc'um Jordane.

^35-38 Ti laj yich'ic ti jteclumetic ti pim lec ti smocale, xi s'elan jech c'u cha'al li'e: ti Sidime, ti Zere, ti Hamate, ti Racate, ti Quinérete, ti Adamae, ti Ramae, ti Hazore, ti Cedese, ti Edreie, ti En-hasore, ti Irone, ti Migdal-ele, ti Horeme, ti Bet-anate, xchi'uc ti Bet-semese. Ja' balunlajuneb (19) jteclumetic ta scotol xchi'uc ti bic'tal lumetic ti joyol ta spat ta xocontaque.

³⁹ Taje, ja' jech sjamlej yosilal ti jteclumetic xchi'uc ti bic'tal lumetic ti joyol ta spat ta xocontac ti laj yich'ic ti snitilultac ti Neftalie.

Ti c'u sjamlej yosilic snitilultac ti Dane

⁴⁰ Ti yuc-sepal osil ti laj yich' q'uelel ta yoraile, ja' c'ot ta stojol ta jujuchop yu'un ti jvoc' snitilultac ti Dane.

^41-46 Ti ta yutil ti banomil taje, tiq'uil ti jteclum Sorae, ti Estaole, ti Ir-semese, ti Saalbime, ti Ajalone, ti Jetlae, ti Elone, ti Timnate, ti Ecrone, ti Eltequee, ti Guibetone, ti Baalate, ti Jehude, ti Bené-beraque, ti Gat-rimone, ti Mejarcone, ti Racone, xchi'uc ti banomil ti oy ta yeloval Jopee.

⁴⁷ Ti jech mu xloq'uic o ta banomil taje, jech o xal snitilultac ti Dane, bat stsaquic ta leto ti yajval lumetic Léseme. Laj yu'ninic, lic smilbeic scotol ti yajvale. Va'i un, comic ta naclej ti jteclum taje. Lic sjelbeic ti sbie, Dan laj yac'beic yo' jech mu xch'ay sc'oplal sbi ti smolmuc'totique.

⁴⁸ Taje, ja' jech sjamlej ti jteclumetique xchi'uc ti bic'tal lumetic ti joyol ta spat ta xocontac ti laj yich' snitilultac ti Dane.

Ti sjamlej yosil ti Josuee

⁴⁹ Ti israeletique, c'alal laj xa yo'ntonic ta xch'aquel banomil ta jujusep ti ta xich'ic ti jujuvoc' nitiluletique, laj yac'beic yich' xrexto osil ti Josué ta yut sbanomilic ti c'u yepal laj staic ta maquel ti yane.

⁵⁰ Jech c'u ch'al yaloj mantal ti Diose, laj yac'beic yich' ti jteclum Timnat-serae, ti oy ta yosilal vitstic yu'un ti Efraine, ti laj sc'an ti Josuee. Jech o xal ti Josuee lic xcha'meltsan ti jteclume, lic naquiuc taje.

⁵¹ Scotol ti banomil taje, laj sbain ta xch'aquel ti pale Eleazare, ti Josuee, ti banquilaletic yu'un ti jteclum ta stojol ti jujuvoc' nitiluletique, ti laj sq'uelic ta yorail ta sba ta sat Dios ta Axibalna ti bu nupel ta be ti oy ta Siloe. Ja' yu'un un, jech c'ot ta pasel ti laj yich' ch'aquel ti banomile, lec loc' o yu'unic.