Josué 17 - Bible in Tzotzil de Chamula

Sbanomilic snitilultac ti Manasese

¹ Ti li'e, ja' jech sjamlej yosil laj yich' snitilultac ti Manasese, sbanquilal nich'on ti Josee. Yan ti Maquire, ti ja' sba xnich'on ti Manasese, ti ja' jun vinic ti xtojob lec ta ac'-letoe, ti ja' totil yu'un ti Galaade, laj yich' ti yosilal jteclum Galaade, xchi'uc ti yosilal Basán ti oy ta yeloval sloq'ueb c'ac'al yu'un ti Jordane.

² Ja' no'ox jech xtoc, ta yorail laj yich'ic q'uelbel ti ta xich' ti yosile, ja' ti c'u yepalic ta jujuchop ti xnich'nabtac ti Manasese, xi s'elan jech c'u cha'al li'e: ti Abiezere, ti Heleque, ti Asriele, ti Siqueme, ti Hefere, xchi'uc ti Semidae, xnich'nabtac ti Manasese, smom xtoc ti Josee.

³ Ja'uc un, ti Zelofehade, xnich'on ti Hefere, xnich'on ti Galaade, xnich'on ti Maquire, xnich'on ti Manasese, mu'yuc laj yil junuc squerem nich'on. C'ajomal no'ox laj yil vo'ob stsebtac, ja' ti Maalae, ti Noae, ti Hoglae, ti Milcae, xchi'uc ti Tirsae.

⁴ Taje, xi bat yalic ti c'alal bat sc'oponic ti pale Eleazare, ti Josuee, xchi'uc ti banquilaletic yu'un ti jteclume: “Ti Moisese albat mantal yu'un ti Diose ti xu' ta xquich' cosilcutic jech c'u cha'al laj yich'ic ti yan cuts' calalcutique.” Jech ti Josuee laj yac'be sbanomilic co'ol jech c'u cha'al laj yich' yuts' yalaltac ti stote, jech c'u cha'al yaloj mantal ti Diose.

⁵ Ja' yu'un un, snitilultac ti Manasese lajunch'ac laj yich'ic ti sbanomilique, xchi'uc laj yich'ic yosilal ti jteclum Galaade, xchi'uc yosilal ti Basán ti oy ta yeloval sloq'ueb c'ac'al yu'un ti Jordane.

⁶ Yu'un ti tsebetic snitilultac ti Manasese, co'ol yepal laj yich' yosilic jech c'u cha'al laj yich' ti viniquetique. Ja'uc ti yosilal Galaade, ja' laj yich' ti yan snitilultac ti Manasese.

⁷ Ti sjamlej yosilic snitilultac ti Manasese, ta xlic stam ech'el ta Aser, ti c'ot c'alal to Micmetat ti oy ta yeloval Siqueme. Tey laj stam ech'el ta stuq'uil yolon ti yac'ol xocon sloq'ueb c'ac'ale, ti c'ot c'alal to ta sat vo' yu'un Tapúae.

⁸ Ac'o mi ja' ono'ox yu'un snitilultac Manasés ti yosilal Tapúae, yan ti jteclum Tapúae, ti bu xa nopol ta x'ech' sts'aquil sbanomil ti Manasese, ja' xa c'otem ta yu'un snitilultac ti Efraine.

⁹ Laj taj une, ti ts'aque laj stam yalel ta stuq'uil yolon ti yac'ol xocon sloq'ueb c'ac'ale, ti c'ot c'alal to uc'um Canae. Ti jteclumetic yu'un ti Efraín xcaltic une, jmoj oy xchi'uc ti steclumaltac ti Manasese, ac'o mi ja' yu'un Manasés ti ts'ac ti ta stam batel ta stuq'uil uc'um ti oy ta yolon ti yolon xocon sloq'ueb c'ac'al ti ta xc'ot snup sba xchi'uc ti muc' ta nabe.

¹⁰ Ti bu com yosil ti Efraine, oy ta stuq'uil yolon ti yac'ol xocon sloq'ueb c'ac'al yu'un ti uc'ume. Ja'uc ti yosil Manasese, ja' oy ta stuq'uil yolon ti yolon xocon sloq'ueb c'ac'al yu'un ti uc'ume, ja' c'ot ta ts'ac yu'unic ti muc' ta nab Mediterráneoe, ti sts'aquinoj sba c'ot xchi'uc yosil ti snitilultac ti Aser ti oy ta yolon ti yolon xocon ti sloq'ueb c'ac'ale, xchi'uc yosil ti snitilultac ti Isacar ti oy ta stuq'uil sloq'ueb c'ac'ale.

¹¹ Ja' jech xtoc ti Manasese xi s'elan xcholet laj to yich' jayibuc jteclumetic xchi'uc bic'tal lumetic ti joyol ta spat ta xocontac ti smacoj ti Isacare xchi'uc ti Asere: ja' ti Bet-seane, ti Ibleame, ti Dore, ti Endore, ti Taanaque, ti Meguidoe, xchi'uc ti oxib stselej sbie.

¹² Ja'uc ti snitilultac ti Manasese, mu'yuc xu' yu'unic ta yu'ninel ti jteclumetic taje, yu'un ti cananeoetique tsots laj sva'an sbaic ti com nacliicuque.

¹³ Ts'acal to un, ti c'alal oy xa lec yipal yu'unic ti israeletique, lic sujic ta stojel patan ti cananeoetique. Mu'yuc laj stenic loq'uel.

Ti snitilultac ti Josee ta xu'ninic ti pimilal te'tique

¹⁴ Ti snitilultac ti Josee xi bat yalbeic ti Josuee: —¿C'u cha'al jsep no'ox laj avac'buncutic ti jbanomilcutic ti bu c'ot yorail cu'uncutic ti c'alal bolemuncutic ta j'ech'ele, ti jech sva'anoj sba ti Dios ta jtojolcutique?

¹⁵ Ti Josuee xi laj staq'ue: —Ti jech bolemoxuc ta j'ech'ele, mu xa'ochic ta osil ti oy ta vitstic yu'un ti Efraine. Batanic ta te'tic, jamic ech'el ti te'tic ti oy ta yosilalic ti ferezeoetique, xchi'uc ti refaítaetique.

¹⁶ Xi laj yalic une: —Ti ta vitstique, melel mi ja'uc xi'ochcutic oe. Ti cananeoetic ti nacalic ta stenlejaltique, naca taq'uin ti scarretaique, xchi'uc oy yu'unic ec ti nacalic ta Bet-seane, xchi'uc ti c'u yepal joyolic ta spat ta xocontaque, xchi'uc ti c'u yepal nacalic ta stenlejal Jezreele.

¹⁷ Ti Josuee xi laj stac'be ti snitilultac ti Josee, ti xcaltique, ja' ti snitilultac ti Efraine xchi'uc ti Manasese: —Tsots xu' avu'unic, yu'un toj epoxuc. Yu'un mu ja'uc no'ox juteb ta xavich'ic ti osile.

¹⁸ Ti muc'tiquil vits ti q'uiil ta muc'tiquil te'tique, ta xc'ot ta avu'unic xchi'uc ta xatunesic ti ste'ticale. Jech ti vo'oxuc une ta xatenic loq'uel ti cananeoetic teye, manchuc mi tsots xu' yu'unic, ac'o mi meltsanbil ta taq'uin ti scarretaique.