Josué 14 - Bible in Tzotzil de Chamula

Ti Josuee ta xch'ac ti banomil yu'un ti Canaane

¹ Ti li'e, ja' ti banomil Canaán ti laj yich'ic ti israeletic jech c'u cha'al ac'batic yu'un ti pale Eleazare, ti Josuee, xchi'uc ti banquilaletic yu'unic jujuchop ta jujuvoc' snitilultac ti Israele.

² Ti c'u sjamleje, ta yorail ch'acbatic ti o'lol slajun-voc'al ti nitiluletique jech c'u cha'al albil mantal yu'un Dios ti Moisés ti jech ac'o spase.

³ Yu'un ta ba'yel ti Moisese laj xa ono'ox yac'be sbanomilic ta jot uc'um Jordán snitilultac ti Rubene, ti Gade, xchi'uc ti o'lol jvoc' snitilultac ti Manasese. Ja'uc ti levitaetic une, mu'yuc x'ac'bat xrexto banomilic.

⁴ Yu'un snitilultac ti Josuee spasoj sbaic ta cha'voc' totil me'il yu'unique, ja' ti Manasese, ti Efraine. Ja'uc ti levitaetique, mu'yuc x'ac'bat jutebuc xrexto osilic. Ja' no'ox ac'batic jteclumetic ti bu ta xnaquiique, xchi'uc osil ti naca jamal yaxaltic bu xu' ta sbolesic ti xvacaxique, ti xchijique.

⁵ Ti israeletique laj xch'aquic ti banomiletic jech c'u cha'al albatemic mantal yu'un ti Moisese.

Ti sjamlej yosil ti Calebe

⁶ Ti snitilultac ti Judae batic c'alal ta Gilgal yo' ta sc'oponic ti Josuee, xchi'uc ti Caleb ti quenezitae, xnich'on ti Jefone, ti xi laj yalbeic ti Josuee: “Vuleso ta avo'nton ti c'u s'elan lij'albat jc'oplaltic ta Cades-barneae, ti laj yal ti Dios ta stojol ti Moisés ti ja' yajtunele.

⁷ C'alal laj stacun batel ta xchajel ta q'uelel banomil ti Moisés ti liloc' ta Cades-barneae, quich'oj xa cha'vinic (40) jabil. C'alal lisut talele, jamal que jti' vul cal ti c'u s'elan laj quil ti banomile.

⁸ Ja'uc ti buch'utic ay jchi'inan une, c'ajomal no'ox laj yac'anbe xi'el ta yo'nton ti jteclume. Ja'uc ti vu'une mu'yuc stsic' co'nton ta stojol ti Dios ti ja' Ajvalil cu'une.

⁹ Va'i un, ti Moisese xi me laj sva'an sba ta yalbelune: ‘Ti banomil ti bu ay axanie, j'ech'el ta xc'ot ta avu'un xchi'uc ti anitilultaque, ja' ti mu'yuc laj aq'uej aba ta stojol ti Dios ti ja' Ajvalil cu'une.’

¹⁰ Ti va'i s'elan albat yu'un Dios ti Moisese, oy xa ta vo'ob yoxvinic (45) jabil ti c'alal xvoletic talel ta xanubal ti israeletic ta sbajtical banomile. Ti jech c'ot yu'un ti c'usi yaloje, cuxulun to. Yu'un un quich'oj xa vo'ob yo'vinic (85) jabil.

¹¹ Ti stsatsal yipal cu'un avi tanae, staoj yav jech c'u cha'al ti c'alal laj stacun batel ti Moisés ta xchajel ta q'uelel ti banomile. Staoj to yav ti xu' cu'un ta xitsalvan ta leto jech c'u cha'al ono'oxe.

¹² Jech o xal un, avocoluc, ac'o avac'bun yosilal ti muc'tiquil vitstique jech c'u cha'al albilun yu'un ti Diose. Yu'un ana'oj lec ti nacalic to ox snitilultac ti inate' vinic Anaque, ti muc'tic no'ox ti jteclumetic yu'unique, ti lec meltsanbil ti smocalique. C'otem ta jol ta co'nton ta xiscoltaun ta sva'an sba ti Diose, ti ta sten loq'uel jech c'u cha'al yalojbun ono'oxe.”

¹³ Va'i un, ti Josuee laj slequil c'opta ti Calebe. Laj yac'be yich' ti Hebrone yo' ta xcom ta yu'un xchi'uc ti snitilultaque.

¹⁴ Ja' jech c'ot ta pasel ti c'ot ta yu'un Hebrón ti Caleb xchi'uc ti snitilultaque, ti yich'ojic to avi tana li' une. Yu'un ti Calebe mu'yuc laj xch'ac sba ta stojol ti Ajvalil Dios yu'un ti israeletique.

¹⁵ Ti sbi ta vo'ne ti Hebrone, ja' to ox Quiriat-arba. Yu'un ti Arbae, buyuc no'ox puquem sc'oplal ti ja' jun vinic ti jelavem xu' yu'une, ti ja' jun snitilul ti inate' vinic, Anaque. Ts'acal to un, paj ti leto ta banomil ti bu taje.