Job 9 - Bible in Tzotzil de Chamula

Xi laj stac' sutel c'op ti Jobe:

^1-2 Jna' lec ti jech ono'ox ma' taj une, ti mu xu' yu'un ti vinic ta spaquel sc'oplal ta stojol Dios ti mu'yuc smule.

³ Mi oy buch'u ta svul sba ya'i ta c'op xchi'uque, ti xtal no'ox ta sjol ti c'uc no'ox xi ta yalele, jbel mu xtac' yu'un.

⁴ Ti Diose, jelavem smuc'ul stsatsal, jelavem sbijil, ¿mi oy la buch'u xu' xtac'tun xa ta stsacolan ta c'op, mi ch'an no'ox la x'ute?

⁵ Ta sc'ac'al yo'nton ti Diose, ta sq'uej sba batel yu'un ti vitsetique, ta sjinesan ti mu ja'uc buch'u sna'e.

⁶ Ta spas ti ta sc'uyilan ti banomile, ti ta xnic yu'un ti yoyaltaque.

⁷ Ta xalbe mantal ti c'ac'ale ti mu xloc' talele, ti mu xac' xojobal ti c'analetique.

⁸ Mi junuc yajcoltaobba laj sjam ta q'uiel ech'el ti vinajele, ti laj xpuch' ta teq'uel ti muc' ta ayin ta muc' ta nabe.

⁹ Yu'un laj smeltsanan ti c'usitic jujuvoc' ta xvinaj ti xi s'elan ti sbie: ti muc' ta c'anal ti sbiinoj Osa Mayore, ti xolom ti sbiinoj Orione, ti tseque ti sbiinoj Pleyadese, xchi'uc ti epal voletel c'analetic ti svoloj sbaic ta stuq'uil yac'ol ti yac'ol xocon sloq'ueb c'ac'ale.

¹⁰ ¡Yepal no'ox ta spas ti c'usitic muc'tic ti ch'ayal ta xc'ot o'ntonal yu'une, ti mu'yuc xa buch'u ta xa'ibe ti smelole!

¹¹ Mi ta x'ech' ta jts'el ti Diose, mi ja'uc ta xquil, mi ta x'ech' ti bu oyune mi ja'uc jna'.

¹² Mi oy c'usi ta xu'nin ya'ie, ¿buch'u xa la no'ox ta xvulun un? ¿Buch'u xa ono'ox la ta xvulun yu'un ti c'usi ta spase?

¹³ Mi ilin ti Diose, mu ta jliqueluc ta xlamaj ti sc'ac'al yo'ntone, yu'un nijil chimilic ta xcom ta yoc ta sc'ob svinictac ti Rahabe.

¹⁴ ¿Mi oy to ono'ox la bu ta jta talel c'op ta tac'obil ta xich' tac'bel ti Diose?

¹⁵ Ac'o mi mu'yuc xa ono'ox ti jmul ta j'ech'el unbi, mi ja'uc xtoy que ta stac'bel ti Diose; c'otem ta cajchapanvanej, c'ajomal no'ox ta jc'anbe ti c'uxubajuc cu'une.

¹⁶ Mi ta jta ta iquel ta xchapel ti jc'op xchi'uque, mi ta xtal un, mu jch'un ma' ti ta xich' ta muc' ti jc'op une.

¹⁷ Nax to ti lamal ta xvul ta jba yu'un ti banomilal vo'e, ti ta jech yepal ta xlic epajuc ti jyayijemal ti ma'uc loq'uem ta sa'el cu'une.

¹⁸ Mu xa ono'ox cha'bel x'ech' xjelav liquel ma' ti jvocol yu'un unbi, ti mu xa xquich' liquel ti ic' yu'une.

¹⁹ ¿Mi xu' ono'ox la xana' ta jtsatsal-c'opon c'alal jelavem ti smuc'ul stsatsale? ¿Mi ta xich' tael ta iq'uel ta xchapel ti c'ope? ¿Buch'u xa ono'ox la ta x'ic' yu'un talel un?

²⁰ Ac'o mi x'ech' to ti lec jtuc'ulanoj jbae, ti cajal ta j'ech'el ti jc'oplale, jamal ta xal ti jsa'mulilune, ti chopolune.

²¹ Le' une, mu'yuc jmul, ja' no'ox un, ma'uc tsots sc'oplal le'e, yu'un xtaet xa ti vi s'elan ti jcuxlejale.

²² Jmojel o scotol xi s'elan ta jnope: ta stsutses scotol ti buch'u oy smule, xchi'uc ti buch'u mu'yuc smule.

²³ Mi oy c'usi tsots ta xc'ot ta pasele yepal no'ox ta xcham ti buch'u mu'yuc smule, tse'ej no'ox ta xa'i ti Dios ti mu xa sna' c'usi ta xut sbaique.

²⁴ Ti banomile, ta xac'be comel ta yoc ta sc'ob ti buch'u ch'abal xch'ulel xa'i sbaique; ta smacbe sat ti jchapanvanejetic yu'unique. Mi ma'uc ta spas ti Diose, ¿buch'u xa van un cha'e?

²⁵ Ti jch'iel jc'opojele xquechet no'ox batel ta anil, ti ma'uc laj jta ti mu'yuc c'usi jna'e.

²⁶ Xjipet no'ox batel jech c'u cha'al ti barcoetique, co'ol s'elan jcot xic xjipet no'ox batel ta stsaquel ti sve'ele.

²⁷ Mi ta jc'an ta jch'ay ta co'nton ti jvocole, ti vinajuc ti ximuyubaje,

²⁸ ta xlic xi'cun yu'un scotol ti yipal xc'uxul ta xca'ie, yu'un jna' lec ti Dios un cha'e ti oy jmul ta xiyile.

²⁹ Mi oy jmul jcolo' ta xiyile, mu'yuc c'usi bal o unbi ti ta xcac'be yipal ti oy to c'usi ta jsa'e.

³⁰ Manchuc mi ta jpoc lec ta xabon ti jc'obe, mi ta jux lec loq'uel ta xjuxobil ti ic'obale,

³¹ ta ono'ox xismut'iun ochel ta lac-lac ach'el ti Diose, ti mu xa stac' nopel ta xa'i ti jc'u'e.

³² Mu stac' ta jtsaquilan ta vulel ti Dios jech c'u cha'al ta jpas ta stojol ti viniquetique, ta yalbel ya'i ti jchibalcutic batcuncutic ta chapanobbaile.

³³ Oyuc la jchapanvanej cu'uncutic ti yich'ojuc tsots yabtele,

³⁴ ti spacuc to c'op ta yictael sba ta stsitselun ti Diose, ti yictauc sba ta sibtaselune

³⁵ Va'i unbi, tsots xa jtsinanoj jba ta xic'opoj ta stojol, xca'i to jba ma' ti mu'yuc jelavemun ta stojol une.