Job 7 - Bible in Tzotzil de Chamula

¹ Xcuxlejal ti vinic li' ta banomile, co'ol s'elan jun soldado ti c'otuc no'ox ta spasel ti yabtel sbainoje,

² co'ol s'elan jun mosovil ti sjic' xa yo'nton ta xcux ya'i ta queove, co'ol s'elan jun jsa'tojel ti batem xa yo'nton smalaoj ti stojole.

³ Jech c'otem ta jtojol ti sjunuquil u lamal ta jba ti c'usi jnuptanoje, ti jujun ac'ubal mu x'ech' xjelav ti jvocole.

⁴ Mu x'ech' xjelav ac'ubal ta xca'i ti c'alal puch'ulune; xilub xa, xivalc'uj xisutbij c'alal ta sacub talel ti osile, ti xichi ta jnope: ¿C'usi to ora ta jtam jba liquel li' une?

⁵ Sjunul jbec'tal xti'lajan ti xchanule, xlilet no'ox ti solile, mu'yuc xa smelol ta q'uelel ti jyayijemale.

⁶ Jutuc xa sc'an xc'ot ta stsutsel ti corail ti mu'yuc c'usi stac' pasele, xquechet no'ox batel ta anil jech c'u cha'al snaul ti ch'alom-buq'ue.

⁷ Vuleso ta avo'nton, Ch'ul Dios, ti jcuxlejale co'ol s'elan jech c'u cha'al junuc jic'-o'ntonal, ti j'ech'el mu xa jta ti xpatet co'ntone.

⁸ Laj sc'oplal ta xiyilbeicun ti jba jsate; ch'ab xi ti jba jsat ta atojol une.

⁹ Xi s'elan ta xc'ot ta stojol ti buch'u mucbil pixbil xa come, co'ol s'elan jech c'u cha'al junuc lumal toc ti xbeq'uet no'ox ech'ele, ti ta sac ch'ay batele:

¹⁰ J'ech'el mu xa sut batel ta sna, mu xa x'ile yu'un ti yuts' yalale.

¹¹ Jech o xal un, mu stac' ma' ti ts'ijilun no'ox ta xicom une. Xivuet no'ox ta me'inal oq'uel yu'un ma' ti mu albajuc yipal xc'uxul ti jvocole.

¹² ¿Mi yu'un chanul-nab ta xavilun ti avac'oj talel asat ta jtojole?

¹³ C'alal ta jnop ta jta xcuxobil co'nton ta jteme, ti ta xyochbun jvocol mi och ti jvayele,

¹⁴ ta xavac'bun xi'el ti ta jvaiche, ta xasibtasun ti jovil c'opun yu'un ti c'usi ta xquile.

¹⁵ Xloc' venta ti tauc xamich'bun ti jnuq'ue, ti chamcun ta j'ech'el ti li' to cuxulune.

¹⁶ Mu xa sts'icbaj ta xca'i. Altic xa ti li' no'ox cuxulune. Ch'an xa utun, ti jcuxlejale co'ol s'elan jech c'u cha'al junuc jic'-o'ntonal.

¹⁷ ¿C'usi xtun o ti vinic ti tsots sc'oplal ta xava'ie? ¿C'u cha'al mu tenbaj ta avo'nton?

¹⁸ ¿C'u cha'al ava'anoj aba ta sq'uelel jujun c'ac'al, ti xlic xcaj no'ox ta xalajeltsabe ti yo'ntone?

¹⁹ ¿C'u cha'al mu xajoybin batel asat ti avac'oj talel ta jtojole yo' jech ta jbic' ti jtube?

²⁰ Mi laj jta jmule, ¿mi oy la c'usi ta jsoquesot ti vo'ot jchabivanejot yu'un viniquetique? ¿C'u cha'al ta xachanun o ac'ob xchi'uc ti ayolobe? ¿Mi yu'un xavac'touc avicatsun ti acuchojun xa batele?

²¹ ¿Mi mu xu' avu'un xach'aybun ti jmule? ¿Mi mu xu' avu'un xach'aybun ti bu chopol bat cu'une? Mu xa jaluc sc'an ta xipaq'ui ta lum ach'el ti xi s'elan ta xapas une: xasa'un xa liquel un, j'ech'el mu xa xavil ti jsat une.