Job 6 - Bible in Tzotzil de Chamula

Xi laj yal ti Jobe:

^1-2 Ti tauc xich' bisel ta junuc sbisobil scotol ti at-o'ntone, ti vocol c'otem ta jtojole,

³ x'ech' to nan yalal ta j'ech'el, ja' mu sta yalal ti syi'al nabe. Jech o xal mu bisbiluc c'usi ta xloc' ta que ta yalilanel no'ox ta anil.

⁴ Ti Dios ti scotol xu' yu'une laj sts'apbun ti syolobe, ti xc'uxul sti'benal une tanij xa ta sjunul ti jbec'tale. Ti Diose laj xa yac'bun tsots xi'el ti mu ch'an xiyut ta scontrainelune.

⁵ ¿Mi yu'un jeche' no'ox xjic'junet ti burro c'alal oy lec ti xyaxale? ¿Mi yu'un jeche' no'ox xmuet ti tot vacax c'alal pulem lec ti xyaxale?

⁶ ¿Buch'u la ch'abal yats'mil ta slajes jtosuc ti jeche' sic lojane? ¿Buch'u la xmuyubaj ta slajes jtosuc ti c'usi mu'yuc smuile?

⁷ Ti c'usi mu jc'an jlajes ti caloje, avi tana une, c'ot xa ta jve'el un.

⁸ Loc'uc ayanuc ta yo'nton ti Dios un cha'e ti c'usi ta jc'anbee; c'otuc la ta pasel yu'un un cha'e ti c'usi juteb ta co'nton ta jc'anbee.

⁹ Loc'uc ayanuc ta yo'nton ti Dios un cha'e ti stsutsesucun ta j'ech'ele, ti ts'ij xi ti jc'oplal yu'une.

¹⁰ Lajcun o xchi'uc ti jvocol ti mu x'ech' xjelav ti yipal xc'uxule, xpatet to co'nton yu'un unbi, yu'un laj quich' ta muc' ti oy c'usi jbel tsots albil yu'un ti ch'ul Diose.

¹¹ Laj xa ma' ti yipal ta sts'iquel une, altic xa ti li' no'ox cuxulune.

¹² Mu jechuc jtsatsal jech c'u cha'al ti jbej tone, mi ja'uc jech stsatsal jbec'tal jech c'u cha'al ti c'anal taq'uine.

¹³ Mu'yuc c'usi xcut jba ta jtuc no'ox, mi ja'uc ta xcal ti oy buch'u xu' ta sva'an sba ta jtojole.

¹⁴ C'alal oy ta vocol ti buch'u mu tuch'baj ta o'ntonale, sc'an c'uxubinel, manchuc mi yanijem sjol yo'nton ta stojol ti Buch'u scotol xu' yu'une.

¹⁵ Ti vo'oxuc lec xquil jbatic une, mu jechuc laj apasbeicun, co'ol a'elanic lac'otic jech c'u cha'al beo' ti taquin ta xcome.

¹⁶ Ti beo'etique, tat puc'an ta xbalaq'uin yalel tal ti capal ta bote, xchi'uc ti taive.

¹⁷ Mi ul batel ti bot une, ta xlic taquijuc ti beo'etique; mi xq'uixet no'ox vulel ti c'ac'ale, ta x'ul ti vo'e.

¹⁸ Ta xc'ot ta pasel ti ta sq'uejbun sbaic ta be ti epal jxanviletique, ti xvoletic batel ta sbajtical banomil ti bu ta xchamique.

¹⁹ Ti epal jxanviletic ta xliquic talel ta Temae, xchi'uc ti ta Sabae, spatoj yo'ntonic ti oy vo' ta staic ta beo'etic taje.

²⁰ C'otic ti bu une, ch'ayal c'ot yo'ntonic yu'un, mu'yuc c'usi laj staic, xch'ay sc'oplal ti spatoj yo'ntonic yu'une.

²¹ Jech a'elanic ta jtojol ec ti xi s'elan ta xava'iique; ta xaxi'ic yu'un c'alal ta xavilic mu jtac' q'uelel xchi'uc ti c'usi c'otem ta jtojole.

²² Le' une, mu'yuc c'usi laj jc'anboxuc jset'uc, mi ja'uc laj jc'an ta xavac'beicun taq'uin yo' ta jcolta jba.

²³ Mi ja'uc ti ta xapojicun loq'uel ta yoc ta sc'ob ti cajcontrae, mi ja'uc ti ta xapojicun loq'uel ta yoc ta sc'ob ti jmilvanej j'eleq'uetique.

²⁴ Xi s'elan ta jpase, ta jts'ijan jba, chapetanic ca'itic c'u s'elan ti chanubtasele, bejanbun talel bu laj jta ti jvocole.

²⁵ Mu'yuc buch'u ta sbaj mi oy stuq'uil ti lo'il ta xich' alele, le' une, jeche' no'ox ta xasa'ic ti jmule.

²⁶ Ti vo'oxuque ta xavich' alabalic xchi'uc ti jc'ope, co'ol s'elan slo'il jun chuvaj ti cuchbil ta xbat yu'un ti iq'ue.

²⁷ Yac'oj xa ajolic ta yilbajinbel xcuxlejal ti jun me'un mu'nate, ta xchonel batel ti buch'u mu tuch'baj ta o'ntonal ta xava'iique.

²⁸ Avi tana une, toyo aba asatic, q'uelic talel ti jsate, albeicun ca'i mi ta jut un.

²⁹ Suteso ave ati' yu'un ti c'usi laj avale, altic no'ox ti mu xava'iique. Chiquintao ava'iic oy smelol ti c'usi ta xcale.

³⁰ ¿Mi yu'un ta xanopic ti jun jutc'opune, ti mu jna' jtuc'ulan jba yu'un ti c'usi ta xcale?