Job 5 - Bible in Tzotzil de Chamula

¹ Avanan ca'itic un, Job, jq'ueltic quic buch'u ta xastac'bot talel. ¿Bu jtosucal ánjelal ta xac'anbe ti pojel ta stojole?

² Ti buch'u sq'ueloj xa sba ta xlaj yu'un ti vul o'ntone, ta sbolibel xa stuc ta xac' sba ta lum ach'el xchi'uc.

³ Quiloj ta jech yepal ti c'usiticuc ta xlic ayanuc yu'un ti buch'u pimuneb ta j'ech'ele, ta xc'ot ta pasel ti ta jliquel no'ox mesel ta xcom ti snae.

⁴ Mu'yuc buch'u stic' sba ta scoltael ti yalab xnich'nabe; mu x'aq'ueic ta venta yu'un ti jchapanvanejetic ta chapanobbaile, mu'yuc buch'u ta stic' sba ta spacbel ti sc'oplalique.

⁵ Ti ts'unubaletic yu'une, ta stsutsesbat ta ve'bel yu'un ti buch'utic oyic ta vi'nale, ti xvoletic ta stsobbel talel ti oy ta c'al ch'ixtique, ti sc'ulejalique, it'ix ta x'a'yiatic yu'un ti buch'utic ta xa'iic taqui ti'ile.

⁶ Ti vocole, mu ta jeche'uc no'ox ta xvul ta bajel li' ta banomile; ti c'usi mu lecuc ta q'uelele, mu ta jeche'uc no'ox ta xtal ta banomil, yu'un xi s'elane:

⁷ ta xac'be sba stuc svocol ti vinique jech c'u cha'al ti c'oc' ti xvilte vilte no'ox loq'uel ti xniche.

⁸ Ti vu'cunuc c'otem ta jtojol jech c'u cha'al le'e, ta jsutes jba, ta jnaban jba ta stojol ti Diose, ta xcac'be ta yoc ta sc'ob c'u cha'al ti jvocole.

⁹ Yepal no'ox ta spas ti c'usi muc'tic ch'ayal ta xc'ot o'ntonal yu'une, ti mu'yuc buch'u xa'ibe smelol ti c'usi ta spase.

¹⁰ Ta xac' yaluc talel vo' ta banomil, ti ta smalta ti osil banomile.

¹¹ Ta stoybe sc'oplal ti buch'u biq'uit ta xac' sbae; ta stsinanbe lec yo'nton ti buch'u oy ta vocole.

¹² Ti buch'u sna' c'usi xut sbae ta slilinbe yabtel, mu xa xc'ot ta pasel yu'un un.

¹³ Ta syac ta tsaquel stuc ti buch'utic sna' c'usi xut sbae, ti xi s'elan ta xch'aybe yabtel c'u s'elan snopoj ti buch'u mu'yuc xch'ulel xa'i sbae:

¹⁴ sac jaman lec ti osil banomile, ta chav-chav picbil ta xanavic batel, ti volibilic ta jun ic'al osil co'ol s'elan ti ac'ubaltique.

¹⁵ Ti me'un mu'natetic ilbajinbilic yu'un ti buch'utic mu'yuc xch'ulel xa'i sbaique, ta xpojatic yu'un ti Diose.

¹⁶ C'otem ta spatobil yo'ntonic ti buch'utic abol sbaique; mu xa stoy ye sti' yu'un ti buch'utic mu'yuc xch'ulel xa'i sbaique.

¹⁷ Xmuyubaj no'ox ti buch'u ta xtojobtasat yu'un ti Diose; mu xabaj ti tojobtasel yu'un Dios ti scotol xu' yu'une.

¹⁸ Mi ta syayijesvane, ta xpix no'ox xtoc; mi ta xmajvane, ta xpoxtavan xtoc.

¹⁹ Xlic xcaj no'ox ta spojot c'alal ta xc'ot ta atojol ti c'usi xi'bal sbae; mu sq'ueloj no'ox lamal ta xvul ta aba ti c'usi chopole.

²⁰ Mu sq'uelojuc ta xacham c'alal yorail vi'nale; ti yorail xyaquet ti letoe, ta spojot yo' mu xalaj ta milel ta espada.

²¹ Ta stic' sba ta apojel ti oy buch'u xbet'bun ye ta xchopol c'optaelote, mi ja'uc xaxi' c'alal yorail oy c'usi xi'bal sba ta xc'ot ta pasele.

²² Tse'ej no'ox ta xava'i c'alal xyaquet ti vi'nale, c'alal xyaquet xi'bal sba c'usitic ta xc'ot ta pasele, mi ja'uc xaxi' yu'un ti te'tical jti'oval chonetique.

²³ Ti tonetic oy ta avosiltaque, mu xasmac ta be; lec xavil abaic liquel xchi'uc ti pucujil chon bolometique.

²⁴ Oy no'ox c'usi x'ayan avu'un ta ana ac'uleb; chapal ta xata ti chon bolometic avu'un ti ta xlic achape.

²⁵ Yepal no'ox liquel anitilultac co'ol s'elan jech c'u cha'al yepal ti momoletic ta xch'i ta yaxaltique.

²⁶ Oy to lec avipal avu'un c'alal ta xata amolibele, co'ol s'elan jech c'u cha'al jchuc trigo staoj lec syijubele.

²⁷ Ti c'u s'elan quilojtic talele, jech ono'ox ta xac' jna'tic ti va'i s'elan taje, chiquintao ava'i, tuc'ulano avil lec un.