Job 42 - Bible in Tzotzil de Chamula

Ti Jobe xi laj stac'be ti Diose:

^1-2 Jna' lec ti xu' ta xapas scotole, ti mu'yuc ma' ti mu xc'ot ta pasel avu'un jtosuc ti c'usi ta xaliquese.

³ ¿Buch'uun ya'yel xina'et ti bu liquelot talele c'alal xvinaj lec ti mu'yuc ti jbijil une? Xivulvun no'ox ta yalel ti c'usi mu xca'ibe smelole, ti c'usitic ch'ayal ta xc'ot o'ntonal yu'un ti vocol ta xchiquintaele.

⁴ Xachi laj avalbune: “Ts'etano achiquin, ta jchi'inot ta lo'il; tac'bun talel ti oy c'usi ta jac'bote.”

⁵ Le' talel ta vo'ne, ta jchiquin no'ox ca'yioj ti ac'oplale, avi tana li' une, laj xa quilot ta jba ta jsat.

⁶ Jech o xal j'ech'el ta jsutes que jti' ti xivulvun no'ox ti chotolun ta pucuque, ti ta stanil c'oq'ue.

Ta sutesbat yu'un Dios slequil yutsil ti Jobe

⁷ Ti va'i s'elan laj yal ti Dios ta stojol ti Jobe, xi laj yalbe xtoc ti Elifaze: “Soquet jol avu'unic ta xca'i xchi'uc ti cha'vo' ti lec xavil abaic xchi'uque. Ma'uc jamal laj avalic jc'oplal jech c'u cha'al laj spas ti cajtunel Jobe.

⁸ Avi tana une, bat vu'lanbeicun ti cajtunel Jobe. Iq'uic batel vuc-cot tot vacax, xchi'uc vuc-cot tot chij, ti ta xachiq'uic ta yac'belun ta sventa ti vo'oxuque. Ja' ta xc'opoj xti'in ti cajtunel Job ta aventaique. Ich'bil ta muc' ta xc'ot cu'un ti sc'opojel sti'inele. Jech o xal un, mu'yuc c'usi chopol ta xc'ot ta atojolic cu'un, ac'o mi ja' xatunic o ti jechuque ta scoj ti mu jamaluc laj avalic jc'oplal jech c'u cha'al laj spas ti cajtunel Jobe.”

⁹ Ti Elifaze, ti Bildade, xchi'uc ti Zofare, bat spasic jech c'u cha'al albatic yu'un ti Diose. Ti Dios une laj stsac laj yich' ta muc' sc'opojel sti'inel ti Jobe.

¹⁰ C'alal laj yo'nton ta c'opojel ti'inel ti Job ta sventa ti buch'u lec xil sba xchi'uque, sutesbat talel yu'un Dios ti c'u s'elan staoj ta ba'yel slequil yutsil ti Jobe. Cha'coj ti x'ech' yepal laj yac'bee, ti ja' mu sta ta ba'yel to oxe.

¹¹ Va'i un, bat vu'lanatuc yu'un scotol ti xchi'iltac ta voq'uele, ta vinic, ta antsetic, xchi'uc ti buch'utic lec xil sbaic xchi'uque, xchi'uc ti buch'utic lec xojtiquin sbaic ta vo'nee, ti jech vololic xa ta vu'lanvanej une, lic yac' ve'el uch'bajel ta sna. Lic yalbeic ti mu stucuc jech c'ot ta stojole. Laj spatbeic yo'nton ti mu ech' xjelav laj ya'i vocol ti tac'bat talel yu'un ti Diose. Jujunic laj yac'beic jelavel ta sc'ob epal taq'uin xchi'uc jun ixtolal c'obil ti meltsanbil ta oroe.

¹² Mu no'ox albajuc yepal laj sta c'uxubinel yu'un Dios ti c'u xa sjalil cuxul ti Jobe, ti mu sta ta ba'yele. C'ot ta pasel ti laj sta chanlajunmil (14,000) ta cot chije, vacmil (6,000) ta cot ti camelloe, jmil (1,000) ta cot ti j'abtel vacaxe, xchi'uc jmil (1,000) ta cot me' burro.

¹³ Laj sta xtoc chanlajunvo' (14) squerem nich'on, xchi'uc oxvo' (3) yantsil nich'on.

¹⁴ Ti vixile, Jemimá laj yac'be sbi. Quesiá laj yac'be sbi ti o'lol muquile. Keren-hapuc laj yac'be sbi ti slajeb muquile.

¹⁵ Ta sbejel ti banomile, mu'yuc yan antsetic ti c'upilic sba jech c'u cha'al yantsiquil nich'nab ti Jobe. C'otic ta j'ich'-rextoil yu'un ti stotic jmoj xchi'uc ti xchi'il ta voq'uele.

¹⁶ Laj taj une, cuxi to batel vucvinic (140) jabil ti Jobe. Laj yil xnich'nab, smamubtac, xnich'nab ti smamubtaque, xchi'uc xnich'nab ti xnich'nab ti smamubtaque.

¹⁷ Jal sc'ac'alil ch'i c'opoj. Smolibel xa cham ti Job une.