Job 40 - Bible in Tzotzil de Chamula

Ti Diose xi to laj yalbe ti Jobe:

^1-2 Ti jech oy abijil ta stsaquelun ta c'op ti vu'un ti scotol xu' cu'une, ¿mi avac'ojbe to yipal ya'yel ta tac'tunel?

Ti Jobe xi laj stac'be sutel ti Diose:

^3-4 Mu xa xtac' cu'un un, jeche' li' va'alune. ¿C'usi stac' ta jtac'bot un? Ta lec no'ox ta jmac que jti'.

⁵ Mu pajesbaj que ti c'u s'elan ta xitac'ave, avie, mu xa xtal ta jol staq'uel ta j'ech'el ti c'ope.

Ti Diose ta stac'be sutel sc'op ti Jobe

⁶ Ta banomilal vo' xchi'uc yic'al c'oponat talel yu'un Dios ti Jobe.

Xi laj yal ti Diose:

⁷ Ac'bun quil mi vinic xava'i abae, tac'bun talel ti xi s'elan ti c'op ta jac'bote:

⁸ ¿Mi oy to ta ave ati' ta yalel ti mu'yuc jtuq'uile, ti mu lecuc c'usi ta jpase, ti ch'abal amul ta xac'ot ti avaloje?

⁹ ¿Mi yu'un tsots xava'i aba jech c'u cha'al ti vu'une? ¿Mi xt'inluj to yech'omal ac'opojel ta a'yiel jech c'u cha'al ti vu'une?

¹⁰ Ch'alo aba unbi ta avabtel ta amuc'ul atsatsal, ti tixetan xa yu'un ti alequil avutsile.

¹¹ Xiuc s'elan ac'o ech'el asat ta stojol ti jtoyobbaetique: busanbo ta j'ech'el ti sc'ac'al avo'nton ta stojolique, ti j'ech'el c'otuc ta j'ac'-lo'il-maxil avu'une.

¹² Jech un, c'alal ta xaq'uel batele, toj yaleluc ta lum avu'un ti buyuc no'ox oy ti buch'u mu'yuc xch'ulel xa'i sbaique, ju'o ta teq'uel un.

¹³ Scotolicuc mucul comuc ta banomil avu'un, tic'o ya'i ochel ta xchuquinab ti jlajel jtubele.

¹⁴ Va'i unbi, ta jna' ta amuc'ul atsatsal ti latsalvan yu'une.

¹⁵ Ti muc' ta Behemot chon bolom ti laj cac'be xch'ulel jech c'u cha'al ti vo'ote, q'uelo avil ti xi s'elan ti stalele: ta slo' momol jech c'u cha'al ti vacaxe.

¹⁶ Q'uelo avil ti ech'em no'ox yip ta j'ech'el ti spat snuc'taque, ech'em no'ox yip ti yoc sc'obtaque.

¹⁷ Co'ol s'elan ch'ut te' stsatsal ma' ti snee, snitojan sba ta j'ech'el ti xch'uxuvil yacane.

¹⁸ Co'ol s'elan balal c'anal taq'uin ti sbaquiltaque, jech c'u cha'al syijil balal tsatsal taq'uin.

¹⁹ Cabtel ti cajal c'ot sc'oplal ta j'ech'el yu'une; vu'un no'ox xu' ta jtsal ti jmeltsanvanejun yu'une.

²⁰ Ti sve'ele, ta x'ich'bat talel momoletic ta vitstic ti bu ta xtajinic ti jti'oval chonetique.

²¹ Ta xpuch'an sba axinajuc ta yolon yabnalil ti vo'e; ta snac' sba ochel ta pimilal pujtic ta lac-lac ach'el.

²² Ta xqueovtasat yu'un ti yabnalil vo'e, volibil ta yolon ti pimil limlim te'tic ti ch'iem ta ti' uc'ume.

²³ Mi ta xnoj talel yoc ti uc'ume, mu xi' yu'un; mu'yuc no'ox c'usi ta xal manchuc mi c'otem xa ti vo' ta sni'e.

²⁴ ¿Buch'u la xu' yu'un ta stsaquel ta spitsbel ti sbec' sate, mi ta xjoybel ch'ojon ta sni'?