Job 39 - Bible in Tzotzil de Chamula

¹ ¿Mi xana' c'usi ora ta svoq'ues yol ti me' te'tical tentsunetique? ¿Mi oy bu aviloj c'u s'elan ta svoq'ues yol ti me' te'tical chije?

² ¿Mi xana' jayib u ta xchi'in yol yo' ta xc'ot ta voq'uel yu'un?

³ C'alal ta svoq'ues ti yolique, ta svuts'an sbaic, va'i un, ta xvoc' ti yolic une.

⁴ Le' une, ta xlic tsatsubicuc, ta xmuq'uibic ta abnaltic; j'ech'el ta xnamajic batel ti mu xa sutic talele.

⁵ ¿Buch'u ta sventa ti c'ot ta colemal chon yu'un ti te'tical burroe? ¿Buch'u ta sventa ti colem ti buyuc no'ox ta xanavique?

⁶ Vu'un laj cac'be sna'ic ti comuc cuxiicuc ta sbajtical banomile, ti ta stenlejal ti bu ma'uc ve'ebal banomile.

⁷ Mu xnopajic bu xvochvun ti jteclume, mi ja'uc x'och ta be ta xchiquintabel sc'op ti jxanvil jcuch-icatsiletique.

⁸ Xanavic no'ox ta jujun stselej ta sa'el ti xyaxale, ta sa'el ti c'usitic yaxal momoletic ta slajesele.

⁹ ¿Mi xavac'touc la xu' ta xatunes ti te'tical pucujil vacaxe, ti ch'an xi cotol ta x'ech' yu'un ac'ubal ta yavil sve'eb avacaxe?

¹⁰ ¿Mi xavac'touc ti ch'an xi ts'ijil ta xachucbe stsacleb yabtejeb ta chabajele, ti xcotcun xa batel ta apat ti xjochoj batel ti chav-chav taq'uin ta stusel ti avosile?

¹¹ Ti tsots xu' yu'un ta xavile, ¿mi xu' la xapat avo'nton ta stojol ta yabtelanel ti avabtele?

¹² ¿Mi tac'al ta xc'ot avu'un xana' ta xcuch batel ti c'usi ta xloc' avu'une, ti ta xcuch batel ta sq'uejleb ti sat ats'unube?

¹³ Q'uelo avil, xi s'elan oy ma' ti j'anilajel-mut une: cajal no'ox xa'i sba xchi'uc ti sc'uc'umale, co'ol to s'elan xic muc' ta sac ichin yich'oj ta xa'i.

¹⁴ Bejel ta xicta comel ta yi' ti stone, ti ta xq'uixnal no'ox c'ac'al ta xlic voc'uc ti yole.

¹⁵ Mi jutebuc ta snop ti oy buch'u ta x'ech' st'us ta teq'uele, mi c'usiuc no'ox chon bolomal ti ta x'ech' st'us ta teq'uele.

¹⁶ J'ech'el mu xc'uxubin ti yole, co'ol s'elan ti ma'uc yu'un yilele, mu sventauc mi mu xtojolin ti svocole.

¹⁷ Yu'un vu'un mu'yuc laj cac'be ti sbijile, mi ja'uc laj cac'be ta ya'ibel smelol ti lec snopbenale.

¹⁸ Ja'uc le' une, c'alal ta xlic anilajuque, xlabaj no'ox yu'un c'alal ta xil tsalbil ta xc'ot ti ca' xchi'uc ti yajvale.

¹⁹ ¿Mi vo'ot laj avac'be yip ti ca'e, ti laj sbal ta ch'alel ti c'upil sba xc'ot xchi'uc ti sbonoq'ue?

²⁰ ¿Mi vo'ot ta xavac' bituc jech c'u cha'al ti c'ulube, ti xjoquet no'ox sni' ta xac' xi'el ta j'ech'el xchi'uque?

²¹ Stoyoj xa sba, sjots'ilan xa banomil ta spas ta stenlejtic, ti mu sna' xi' xjipet no'ox ta jujujot bu xyaquet ti letoe.

²² Mu sna' slaban ti bu ta xac' xi'ele, mi ja'uc stsic'tsun ta xa'i yu'un ti espadae

²³ manchuc mi xchac'chun no'ox yavil yabtejeb ti yajvale, mi xch'itlajan sc'ac'al ti lanzae, xchi'uc ti macobbaile.

²⁴ Ta sjunul yip xjipet no'ox batel ta anil ta xnamaj ech'el, ti mu xa ts'ijiluc ta x'oc' ti oq'uese.

²⁵ Xjiq'uiq'uet xa ta stac' sutel ti ta x'oc' ti oq'uese; ta nom no'ox ta xa'ibe yic'al ti letovajele, ta xa'i ti mantal xchi'uc ti avlajetele.

²⁶ ¿Mi toj ech'em abijil ti avaloj une ti ta xachanubtas ta vilel ti jti'oval cuj'e mute, ti xlich'lun xa batel xic' ta stuq'uil yolon ti yac'ol xocon sloq'ueb c'ac'ale?

²⁷ ¿Mi yu'un vo'ot ta xavalbe ya'i ti muc' ta xic ta toyol sna' xac' ti stase?

²⁸ Le'e, c'ac'al ac'ubal snainoj ti toyol lican ch'entique, ta spas svayeb ti bu jomole.

²⁹ Ti ta toyol taje, ta sq'uel ta spa'iel ti c'usi sta ta loc'obinele.

³⁰ Ti yalabe naca ch'ich' ta stunes; ta sts'uts' loq'uel ta stojol ti c'usi chamem ta stae.