Job 37 - Bible in Tzotzil de Chamula

¹ C'alal ta xquil ta xtal ti banomilal vo'e, xbitbun xa ti co'nton yu'une, ti co'ol s'elan ta xa spits loq'uel ya'luque.

² A'yio ava'iic xvo'o'et to yech'omal sc'opojel ti Diose, ti xt'inluj to ti sc'opojele.

³ Xjaplajet no'ox yu'un ti sac tsel ta sjunlej ti vinajele, ti ta xc'ot yu'un ta jujujot xchiquin ti banomile.

⁴ Tsots yabtel yich'oj un, xt'inluj liquel ti sc'opojele, ti c'alal xvo'o'et no'ox yech'omal ti sc'opojele. Ti xt'inlajet no'ox ta a'yiele, mu'yuc spajeb xjaplajet no'ox ti sac tsele.

⁵ C'alal xc'avlajet no'ox sc'opojel ti Diose, ep ch'ayal o'ntonal ta xc'ot yu'un ti mu'yuc buch'u xu' yu'un ta yalbel ti c'u cha'ale.

⁶ Ta xalbe mantal ti saquil bote, ti yaluc ta banomile. Ta xc'ot ta pasel yu'un ti xi'bal sba tsots xchajet ta xyal talel ti vo'e.

⁷ Ta xc'ot ta pasel yu'un ti tic'ajtic ta xcomic ta axinajel ta snaic ti jnaclejetique, ti yojtiquinicuc scotolic ti ja' yabtel stuc taje.

⁸ Ti c'usiticuc chanul xcotlajet ta banomile, ta x'ochic ta snail ch'enic, nac'al ta xcomic ti bu taje.

⁹ Ta stuq'uil yolon ti yac'ol xocon sloq'ueb c'ac'ale, ta xlic talel ti xi'bal sba iq'ue. Ti ta stuq'uil yolon ti yolon xocon sloq'ueb c'ac'ale, ta xlic talel ti tsots sic ta j'ech'ele.

¹⁰ Ta sventa yic'al ye ti Diose, ta xlic ayanuc talel ti taive, ta spas ta bot yu'un ti ts'anal vo'e.

¹¹ Ta slanubtas ta j'ech'el ti toquetique, ta xc'ot ta pasel yu'un ti xjaplajet no'ox ti chauque.

¹² Ti sleb ti chauc une xlucuquet no'ox ech'el ta xmuy batel ta vinajel, ti ta xc'ot ta pasel yu'un ta sbejel banomil smantal ti Dios yaloje.

¹³ Scotol taje, bal xa xa'i ti Dios ta stsitsel ti banomile, mi ja' ti ta xac' ta ilel ti yutsil slequil yo'ntone.

¹⁴ Job, oyuc smuc'ul avo'nton, a'yo lec ava'i, c'otuc ta avo'nton ti c'usitic ch'ayal ta xc'ot o'ntonal yu'un ti Dios ta spase.

¹⁵ ¿Mi xana' ya'yeluc c'u s'elan spasoj Dios scotol ti va'i s'elan taje, ti c'u s'elan xjaplajet no'ox ti sac tsel ta toque?

¹⁶ ¿Mi xana' ya'yeluc c'u s'elan tsacal ti toc xvolet ta vinajele, ti svinajeb ti ch'ayal ta xc'ot o'ntonal yu'un ti sbijil ti mu albajuc yutsile?

¹⁷ Ti tsots ic' ta xlic talel ta stuq'uil yolon ti yac'ol xocon sloq'ueb c'ac'ale, ta xtaquij yu'un ti banomile, ja' jech ec c'alal alapoj ti ac'u'e, xchic'chun xa ta xava'i.

¹⁸ ¿Mi yu'un xu' avu'un ta xatic' aba ta scoltael ti Dios ta sq'uiel ech'el ti vinajele, ti lich'il ta xcom avu'un jech c'u cha'al junuc jayal pech-pech taq'uine?

¹⁹ Chanubtasuncutic ca'icutic c'u s'elan stac' albel ti Diose, yu'un mu xa stac' a'yeluc ta xca'icutic, mu xtal ta jolcutic ti c'usi ta jchapbecutique.

²⁰ Mi ja'uc ta xcal ma' ti vu'un ta xilo'ilaj ca'i xchi'uque, loc' xa ta sa'el unbi ta xch'aybun ti jts'unubale.

²¹ Mi ja'uc xvinaj xojobal c'ac'al c'alal mi volibil ta toque; mi bec'bil ta xbat ta iq'ue, ta xloc' ti toque, sac jaman ta xcom ti vinajele.

²² C'alal ti Dios ta svol sba xchi'uc ti smuc'ul stsatsal ti xi'bal sbae, co'ol s'elan xojobal oro ta xvinaj ta stuq'uil yolon ti yac'ol xocon sloq'ueb c'ac'ale.

²³ Mu jna'tic c'u s'elan oy ma' ti Buch'u scotol xu' yu'une, yu'un jelavem xu' yu'un ta j'ech'el, oy stuq'uil yutsil; oy stuq'uil, mi junuc oy buch'u ta xac'be yich' svocol.

²⁴ Jech o xal ti viniquetique xi'taojic; mu'yuc c'usi bal o ta x'ilatic yu'un ti buch'utic oy sbijilique.