Job 36 - Bible in Tzotzil de Chamula

Xchancojal slo'il ya'yej ti Elihue Ti Elihue xi laj stac' batel ti lo'il a'yeje:

^1-2 Ts'icuc cuchuc xa avu'un jutebuc, ta jchanubtasot ava'i, oy to jlo'il ca'yej ta spacbel sc'oplal ti Diose.

³ Ta jtunes ta yalel ava'i ti c'usitic quilojane, ta yac'belot ana' ti oy smelol c'usi ta xal ti Buch'u laj yac'bun ti jch'ulel canimae.

⁴ Jbel sc'oplal ta xcac' ana' lec ti ma'uc yesomal jolil ti c'usi ta xcale; li' oy jun ta atojol ti ac'bil sbijile.

⁵ Ti Diose jelavem ti smuc'ul stsatsale, jelavem ta j'ech'el ti sbijile, mi ja'uc ta sjip ta sten ti buch'u ch'abal smule.

⁶ Ma'uc ma' ti sq'ueloj ta xch'i xc'opoj ta banomil yu'un ti buch'u mu'yuc xch'ulel xa'i sbae, ja'uc ti me'un mu'nate, jun yutsil ta spas xtoc ta stojol.

⁷ Sva'anoj sba ta spojel ti viniquetic ti oy smelol stuq'uil ti c'usitic ta spasique. Ta stsac lec yip yu'un ti ajvaliletic ti chotolic ta spasob mantale, ti sva'an sba ta stojolic ti cajal ta xc'ot ti sc'oplalic yu'une.

⁸ Ja'uc le' une, mi yich'ic chuquel ta carina taq'uin ti mu x'ech' xjelav ta xa'iic ti yipale,

⁹ ta x'ac'bat sna'ic yu'un Dios ti bu mu lecuc bat yu'unique, ti ya'binoj xa no'ox sbaic jelav ti stoyobbailique.

¹⁰ Ta xc'oponatic yo' ta stojobtasatic. Ta x'albatic ti yictaicuc ti mu stac' alel ti c'usi ta spasique.

¹¹ Mi laj yich'beic ta muq'ue, ti biq'uit ta xac' sbaic ta stojole, mu'yuc c'usi sna'ic, xmuyubajic no'ox ti c'u to sjalil ta xch'i xc'opoj batele.

¹² Mi mu xich'beic ta muc' une, ch'ayal yuni o'nton ta xtae telel xa ono'ox ta muquinal xa'i.

¹³ Ti buch'u mu'yuc xch'ulel xa'i sbae, x'iletic no'ox ta j'ech'el, ma'uc ma' ti sc'anic xa coltael ti ochemic ta chuquele.

¹⁴ Ta squeremal no'ox ta xcham, ti q'uexlal sba c'u s'elan ta xc'ot ta stsutsel ti xcuxleje.

¹⁵ Ta sventa ti mu x'ech' xjelav ti vocole, ti Diose ta scolta ti buch'u oy svocole; ta xvulubtasbat xch'ulel ta sventa mu ts'icbaj ti yipal xc'uxul ta xc'ot ta stojole.

¹⁶ Laj spojot ec un ti c'usi xi'bal sba c'ot ta atojole. Yepal no'ox ti c'usi laj yac'bote, xchi'uc lac'ot ta pojel colel yu'un. Busul no'ox liquel yu'un ta amexa ti yutsiquil ve'lil uch'ome.

¹⁷ C'ot ta atojol ec un jech c'u cha'al chapanbil sc'oplal ti buch'u mu'yuc xch'ulel xa'i sbae, ti mu ja'uc stac' xamac ta be ti chapanele, ti ta xatoje.

¹⁸ Bijan ti mu xavac' aba ta lo'laele, ti xpich' avo'nton yu'un stsaquel ti epal taq'uine.

¹⁹ Ma'uc xa pojbilot yu'un avocol ta ilbajinel ti caj tsacal xava'i abae, manchuc mi xa'avet.

²⁰ Ma'ucuc xc'ot ta avo'nton ti vuluc ta loq'uel ti co'ol s'elan ac'ubal ti ch'ab xi ech'el ti jteclumetic ta jech yepale.

²¹ Q'uelo aba un, mu xlic apas ti c'usi chopole, yu'un laj xa avich' q'uelbel avo'nton yu'un ti vocole.

²² Tuc'ulano avil lec smuc'ul stsatsal ti Diose. Mi junuc jchanubtasvanej xco'olaj jech c'u cha'al ti stuque.

²³ Mi junuc oy buch'u x'albun yu'un ti c'usi ta spase, mi ja'uc ta xtic'bat ta sat mi oy c'usi chopol laj spase.

²⁴ Scotol banomil ta xlequil-c'opojic yu'un ti yabteltaque; vuleso ta avo'nton ec un ti licuc alequil-c'optae.

²⁵ Scotol viniquetic xu' ta xilbeic yabtel ti Diose manchuc mi nom oy ti bu va'alique.

²⁶ Ti Diose ech'em ti smuc'ul stsatsale, mu ja'uc xca'ibetic smelol ti c'u s'elan oye, mu ja'uc jna'tic c'u yepal ti sjabilale.

²⁷ Ta stsob ta jun yavil ti jujubaj vo'e; ta ts'acal to un, ta xlic joybijuc ta jun chaquilo' yu'un.

²⁸ Ti chaquilo'e xchajet no'ox ta xyal talel ta toquetic yu'un, banomilal vo' ta xvul yu'un ta stojol ti jnaclejetique.

²⁹ ¿Mi oy la buch'u sna' c'u cha'al xvolet no'ox ta xanav batel ti toque, mi ja' ti xc'avlajet no'ox ti chauc ta vinajele?

³⁰ Ti Diose xleblajet no'ox yu'un ti sac tsel ta sba ti muc' ta nabe, ta smac ta sac jamtael ti sninabil ti muc' ta nabe.

³¹ Ja' jech ta smalq'uin ti jteclumetique; yepal no'ox ti sve'el ta xac'bee.

³² Xjapluj no'ox ta sc'ob ti chauque, ti sbijil satioj bu ta xac' batel jech c'u cha'al ta xal ti smantale.

³³ Ti xc'avlajet ti chauque, ti sts'otet no'ox ti banomilal vo' xchi'uc ti yic'ale, ta xac' ta na'el ti ja' xa sc'ac'al yo'nton Dios vul ta loq'uel.