Job 35 - Bible in Tzotzil de Chamula

Yoxcojal slo'il ya'yej ti Elihue Xi lic c'opojuc ti Elihue:

^1-2 ¿Mi yu'un ja' xloc' venta ya'yel ta xava'i un, Job, ti ta xac'bot lec ana' Dios ti c'usi snopoje?

³ Yu'un laj ca'i ti xachi laj avalbe ti Diose: “¿C'usi aventa mi ta jsa' ti jmule? ¿C'usi ta xajsoques o yu'un ti jmule?”

⁴ Ta jtac'bot talel ava'i ti c'op une, xchi'uc ti achi'iltac ti lec xavil abaic xchi'uque.

⁵ Tuc'ulano avil lec ech'el c'u s'elan ti vinajele; q'uelo ti vi to staylej ti toc xvolet ta stuq'uil ajole.

⁶ Mi ta xasa' ti amule, ta j'ech'el mi jutebuc ta xasoques ti Diose; mi yepal no'ox ta xasa'olan ti amule, ta j'ech'el mi jutebuc ti oy c'usi ta xapasbe ti Diose.

⁷ Mi jelavem yutsil slequil ti c'usi ta xapase, ma'uc ti oy c'usi lec ta sta avu'une, mi ja'uc ti bal xa xa'ie.

⁸ Ti viniquetic no'ox jech c'u cha'al ti vo'ote, ta soquesat yu'un ti amule, xchi'uc oy c'usi lec ta staic yu'un ti c'usi lec ta xanope.

⁹ Ti net'bilic xa yu'un vocol ti viniquetique, x'avanic xa ta sa'el buch'u tsotsic yo' jech ta xcoltaatic yu'un.

¹⁰ Le' une, ma'uc ta sa'ic spojelic ta stojol Dios ti ac'bun xch'ulel yanimaic yu'une, ti Buch'u ta xac' yip o'ntonal ti c'alal yorail ic'uneb ti osil banomil ta xa'iique,

¹¹ ti x'ech' to ta xistojobtasotique, ti ta xischanubtasotique, ja' mu sta ti chon bolometique, ti mutetique.

¹² X'avetic xa un, mi ja'uc ta xtac'batic yu'un ti Diose, yu'un ja' jun chopol toyobba viniquetic.

¹³ Ti Dios scotol xu' yu'une, ma'uc tsacbil ta venta ta xc'ot yu'un ti yesomal jolile.

¹⁴ Manchuc mi ta xaval ti mu xavil ti Diose, ts'ijlan, mala o ava'i, ti c'usi c'otem ta atojole, oy ta yoc ta sc'ob.

¹⁵ Ta xaval ti mu sna' x'iline, ti mu stsitsvane, ti mu slaban ti mulile.

¹⁶ Ti le' une, Job, mu'yuc smelol ti c'usi ta xavalilane, ch'ayem snopbenal avu'un, mu'yuc abijil ti ep xavulvune.