Job 34 - Bible in Tzotzil de Chamula

Slo'il ya'yej ti Elihú laj xcha'ale Xi laj yal no'ox xtoc ti Elihue:

^1-2 A'yio ava'iic jc'op, vo'oxuc ti bijubemoxuque, ti chanubtasbiloxuque.

³ Ti chiquinile xa'ibe lec sbejleb-bejleb ti c'ope jech c'u cha'al ti eil xa'ibe ti smuile.

⁴ Jech ti vo'otic xtoque ta jtuc'ulantic ti c'usi ta xc'ot ta pasele, ta jnoptic ta yalel ti c'usi lec ta xca'itique.

⁵ Ti Jobe xi ta xale: “Ch'abal ma' ti jmul ta j'ech'el une, ja'uc ti Dios une mu sc'an stic' sba ta jpojel.

⁶ Jutbil ta j'ech'el mi ta xcal ti oy jmule; c'alal j'ech'el mu'yuc jsa'oj ti jmule, mu xcol ti jyayijemale.”

⁷ Mu'yuc xa buch'u yan xco'olaj xchi'uc ma' ti Job une. Mu vocoluc xvulvun ta slabanel ti Diose, co'ol s'elan ti mu vocoluc ta uch'ilanel ti vo'e.

⁸ Lec xa'i ti jmoj xvoletic xchi'uc ti viniquetic mu'yuc xch'ulel xa'i sbaique.

⁹ Ta xalilan ti mu'yuc c'usi bal o ta j'ech'el ti ta xac'be yipal ti vinic ta spasel ti c'usi lec ta xil ti Diose.

¹⁰ Ti le' une, bijil viniquetic, ts'etanbun ani' achiquinic ta ya'yiel. Ti Dios ti scotol xu' yu'un une, mu xanop ti oy c'usi chopol ta spase, ti mu'yuc stuq'uil yutsil ti c'usi ta spase.

¹¹ Ta xac'be stoj ta jujun ti c'u s'elan laj spase; ta jujun ta xac'be yich' ti c'u s'elan loc' ta sa'el yu'une.

¹² Melel un, ti Dios ti scotol xu' yu'une, mi jutebuc ma' ti oy c'usi chopol ta spase, ti c'usi mu'yuc stuq'uile.

¹³ Mi junuc oy buch'u ac'bat yabtel yu'un ta sventainel sbejel ti banomile.

¹⁴ Mi ts'ij xi sc'oplal yu'un ta yich'el ic' ti viniquetic ti cuxulic o xchi'uque,

¹⁵ ta jliquel no'ox ta xcham scotolic, ta xjoybijic ta lum ach'el.

¹⁶ Mi oy abijil xava'i abae, ts'ijano aba; ts'etano achiquin ta xchiquintael ava'i ta ya'yiel ti jc'ope.

¹⁷ Ti yu'unuc mu lecuc ta xil Dios ti tuc' snopbenale, mi ja'uc xc'ot o ta Ajvalilal. ¿C'usi la xavut xasa'be smul ti Buch'u stalel jelavem ti yutsil slequil ta j'ech'ele?

¹⁸ Ti ajvaliletique, xchi'uc ti buch'utic ich'bil ye sti'ic ti mu'yuc xch'ulel xa'i sbaique, mi ja'uc xna'et ti Dios ta xalbe ta sat ti c'usi chopol ta spasique.

¹⁹ Ti stuque mi ja'uc ta sco'oltas sba xchi'uc ti jpas-mantaletique, mi ja'uc ech'em ta spacbe sc'oplal ti jc'uleje, mi ja'uc mu sventauc ti me'un mu'nate, yu'un laj yac'be xch'ulel yanima scotolic.

²⁰ Ta jliquel no'ox, ta syijil ac'ubal, xu' xcham ti viniquetique; xvochvun ti jnaclejetique, ta jliquel no'ox, ch'ab xi ech'el; mu tsotsuc sc'oplal oy buch'u ta x'abolaj ti ch'ab xi sc'oplal yu'un ti tsatsal vinique.

²¹ Ti Diose yac'oj ech'el sat jujuteq'uel yoc ti vinique, xojtiquin lec ti bu c'alal yalel muyelique.

²² Mu'yuc xa bu xtal yic'ubel osil ti ic' ta j'ech'el ti xu' ta snac' sba ti chopol vinique.

²³ Mu yu'unuc ta xal Dios ti xchapanoj sc'ac'alil ta sta ta iq'uel ta xchapanel ti vinique.

²⁴ Mi ja'uc st'unilan xa ta sa'el ya'yejal buch'u ta sjip ta lum ti cajal xa'i sbaique yo' ta stic'be xq'uexol.

²⁵ Ti Diose xojtiquin lec ti c'usi ta spasique, ta xvul ta ac'ubaltic ta slilinel.

²⁶ Ta stsits ta sba ta sat scotolic jech c'u cha'al jmilvanejetic.

²⁷ Yu'un mu'yuc laj xch'unic ta spasel ti c'u s'elan ta xale, mi ja'uc laj yac'beic ta venta ti smantaltac c'u s'elan snopoj ti stuque.

²⁸ C'ot ta stojol Dios yu'unic ti x'oc' x'avan ti me'unetique, xchi'uc ti buch'u ilbil ti svocolique, a'yibat ti sc'opic une.

²⁹ Mi sq'uel no'ox ti Diose, ¿buch'u xa ono'ox ta x'ac'bat stoj ti smulique? Mi mu xa xac' ti sat une, ¿buch'u xa ono'ox ta xil ti c'usi ta xc'ot ta pasele? Ti stuque stuc'ulanoj ti jteclumetique, xchi'uc ti jujun viniquetique,

³⁰ yo' mu xc'ot ta pasel ta x'och ta ajvalil jun vinic ti mu'yuc xch'ulel xa'i sba ta slo'lael ti jteclume.

³¹ ¿Mi yu'un oy bu ti xi laj avalbe ti Diose? “Yu'un ca'binoj xa jba lilaj ta lo'lael, avi tana une, mu xa jsa' jmul.

³² Ac'bun quil ti bu lijelave, yu'un mu xquil. Ti mi chopol bat cu'une, mu xa jcha'pas.”

³³ ¿Mi yu'un ta xac'an matantasel yu'un Dios ti c'u s'elan lec ta xava'ie manchuc mi laj xa aten comel? Oy ta atojol ta snopel, ma'uc ma' ti vu'un une, alo ta jtojolcutic ti c'usi xana' une.

³⁴ Ti bijil viniquetic ti ta xa'ibeicun ti jc'ope, xchi'uc ti buch'u xa'ibeic ti xchiquinale, xi nan ta xiyalbeicune:

³⁵ “Mu stac' a'yeluc ta xa'i c'usi ta xalilan ti Jobe, yu'un mu'yuc smelol ma' ti sc'op ya'yele.

³⁶ Ya'iuc sba ti Jobe; ti c'u s'elan ta staq'uilan ti c'ope, co'ol s'elan jech c'u cha'al jun vinic ti mu'yuc xch'ulel xa'i sbae.

³⁷ Ma'uc no'ox jun jsa'mulil ti Jobe, toyobba xa'i sba; ta jba ta jsatic, xvulvun ta sa'bel smul ti Diose, ta stsaquilan ta c'op.”