Job 33 - Bible in Tzotzil de Chamula

¹ Avi tana une, Job, a'yio ava'i ti jc'ope; ts'etano lec ani' achiquin yu'un ti c'usi ta xcalbote.

² Xi s'elan oy xa ta que ta jti' ti c'u s'elan ta jtac'bot sutele:

³ ta jamal ta xcalbot ava'i, xchi'uc oy stuq'uil ta xcal ava'i ti c'u s'elan jnopoje.

⁴ Ti Dios ti scotol xu' yu'une, laj yac'bun quich' jch'ulel canima, laj xvuch'taun ti lic quich' ic' yu'une.

⁵ Tac'bun talel ca'itic un mi xu' avu'une; chapano aba ta spaquel sutel talel ti c'ope.

⁶ Ti vo'ot xchi'uc ti vu'une, co'olotic ta sba ta sat ti Diose, yu'un laj quich' meltsanel xtoc ta lum ach'el.

⁷ Ja' yu'un un, altic no'ox ta xaxi' ta jtojol, yu'un mu'yuc quich'oj cabtel.

⁸ Xachi la me laj aval laj ca'i ma' ti c'op taje:

⁹ “Lequil tuq'uil vinicun ta j'ech'el, mi ja'uc ti oy bu jelavemune, mi ja'uc oy jmul.

¹⁰ Le' une, ta sa'ilan bu ta sta jmul ti Diose, laj sbisun ta yajcontra.

¹¹ Laj xa xchuc ta carina taq'uin ti cacane, yac'oj ech'el sat bu ta jtec' ech'el jujuteq'uel ti coque.”

¹² Mu'yuc jset'uc smelol ma' ti va'i s'elan laj aval taje, yu'un ti vinique mu xco'olaj smuc'ul stsatsal jech c'u cha'al ti Diose.

¹³ ¿C'u cha'al ta xatic'be ta sat ti mu xastac'bot talel jbeluc ti c'usi jaytos anopoj ta xavalbee?

¹⁴ Ep ta tos ti c'u s'elan xu' ta xc'opoj ti Diose ti mu ja'uc jna'tique.

¹⁵ Oy bu ta xc'ot ta pasel yu'un ta ac'ubaltic, ta vaichil, mi ta sjamel ba satil ta yilel ti oy c'usi ta xac' iluque, mi c'alal ta xlic vayicuc ti viniquetique, mi c'alal batem xch'ulelic ta vayele.

¹⁶ Ti Diose ta xc'opoj ta xchiquin ti viniquetique; ta svul, mu no'ox albajuc ta xac'be xi'el,

¹⁷ yo' jech ta xch'ac loq'uel ti bu tiq'uil ta spasel ti c'usi chopole, yo' jech ta scaj'ac'be sna' ti stoyobbaile.

¹⁸ Jech ta spoj loq'uel ti mu xbat ta muquinale; ta spoj loq'uel ti mu xbat o ta lajebale.

¹⁹ Oy bu ta xc'ot ta pasel yu'un ti Dios ti ta stuq'uibtas ti viniquetic ta sventa ti chamele, ti ta xti'van x'avan sjunul ti sbec'tal stacopalique.

²⁰ Scotol ti ve'lil une, ti bu jun xa yutsil ta lajesel ta j'ech'ele, ma'uc xa ta yo'nton ta slajesel.

²¹ Yantic xa stsul ech'el ti sbec'tal stacopale, ti xvinaj xa ta q'uelel ti sbaquiltaque.

²² Ta xa stsulbij ech'el ta muquinal yo' ta xtub ti sc'oplale, ti nopol xa batel ta sti' ti lajebale.

²³ Le' une, mi nopol va'al ta sts'el jun ta smilal ti ánjeletic ta spacbel ti sc'oplale, ta yalel ti tuc' laj spas sbae,

²⁴ ti yich'uc to c'uxubinele, ti xi ta xalbe ya'i ti Diose: “Mu to xavac' chamuc, laj jta ta q'uelel ti tojbil manbile”,

²⁵ va'i un, ta xlic stam sba ti sbec'tal stacopale, ta xcha'ta yav jech c'u cha'al ta squeremal to oxe.

²⁶ Xvocolet liquel ta stojol ti Diose, ta x'ich'bat ta muc' ti sc'op une; xmuyubaj xa ta sq'uelbe sba satic xchi'uc ti Diose, xq'uejin no'ox ta sba sat ti viniquetic ta sventa slequil yutsil yo'nton ti Diose.

²⁷ Xi ta xale: “Laj jta jmul, mu'yuc stuq'uil ti c'usi laj jpase, ti le' une, mu'yuc laj yac'bun jtoj jmul ti Diose.

²⁸ Laj ono'ox scoltaun ti jutuc xa mu lichame, laj to quil ti saquilal osil banomile.”

²⁹ Xlic xcaj no'ox ti jech ta spasilan ti Dios ta stojol ti viniquetique.

³⁰ Ta spoj ti ta xa xchame, ta xlic sq'uel ech'el yu'un ti saquilal osile.

³¹ Ts'etanbun ava'i achiquin, Job, ts'ijano to aba yu'un yacal to ta xic'opoj.

³² Mi oy c'usi ta xavale, xu' ta xatac'bun talel; mi oy smelol ti avuni c'ope, jun co'nton ta xca'i.

³³ Mi mu jechuc une, ts'ijlan no'ox ava'i, ta xcac'bot ana' c'u s'elan ta tael ti bijilile.