Job 32 - Bible in Tzotzil de Chamula

Ta spac sutel c'op ti Elihue

¹ Ti oxvo' viniquetique laj yilic ti j'ech'el sva'anoj sba ti Job ta yalel ti ch'abal smule. Jech o xal laj yicta sbaic ta svulel.

² Va'i un, ti Elihue, xnich'on ti Baraquel jun buzita vinique, snitilul ti Rame, mu xa ts'icbaj laj ya'i sc'ac'al yo'nton ta stojol ti Jobe, ti laj yil ti xvulvun no'ox xchi'uc ti ch'abal smule, ti naca smul no'ox Dios ta stic'bee.

³ Ti Elihue laj yilta xtoc un ti oxvo' viniquetic ti lec xil sbaic xchi'uc ti Jobe, yu'un mu sna'ic staq'uel sutel ti c'ope, c'ajomal no'ox ta soquesbeic sc'oplal ti Diose.

⁴ Ti jech uni jch'iel jc'opojel to ti Elihú yu'un ti yane, laj smala ti ech'uc yo'ntonic ta c'opojel xchi'uc Job ti yane.

⁵ Le' une, c'alal laj yil ti mu xa sna'ic c'u s'elan ta stac'beic sutele, mu xa ts'ic yu'un.

⁶ Lic c'opojuc un. Ti jech uni jch'iel jc'opojelun to xca'i jbae, mu stac' ma' ti cajal xa que jti' ta yalel ta jech yepal ti c'usi oy ta co'nton ta atojolic ti vo'oxuc vulem xa ach'ulelique.

Ti slo'il ya'yej laj sliques ti Elihue Ti Eliue xi laj stac' ti c'ope:

⁷ Xichi laj jnop une: “C'opojicuc ca'itic ti buch'utic yilojic xa c'usi sc'an pasele. Svinajesicuc ti oy xa yuni bijilic ti le' xa sjabilal talel ti xch'iel sc'opojelique.”

⁸ Scotol ono'ox viniquetic xtoc un, xa'ibeic ti sni' xchiquinale, yu'un ti Buch'u scotol xu' yu'une, laj xoj ochel xcuxlejal ta stojolic.

⁹ Ma'uc ta yepal jabil ch'iel c'opojel ta tael ti bijilile; ma'uc xa oy xchiquinal yu'un ma' ti buch'u sac butsan xa ta isimale.

¹⁰ Jech o xal xichi ta xcale: “Avi tana une, ts'etanic ani' achiquinic ta ya'yiel ec jset'uc cuni lo'il ti ta xcalboxuc ava'iique.”

¹¹ Ts'etel cuni chiquin ta ya'yiel ti c'usitic xlic ta lum ti alo'il ava'yejic ti laj avalique; laj quil ti laj at'unic ta sa'el ti c'usi xa lec ta alele.

¹² Laj quil xtoc ti mu'yuc buch'u junucal tac' avu'unic sutel sc'op ti Jobe.

¹³ Ti jech mu cajaluc xava'i abaic xchi'uc ti abijilique, Dios ta stac' sutel, ma'uc jun vinic.

¹⁴ Ti jech ma'uc xvulvun ta jtojol ti Jobe, mu jechuc ta jtac'be sutel jech c'u cha'al ta xapasique.

¹⁵ A'yio ava'i, Job, ti oxibic le'e, xch'ayet no'ox xa'i sbaic, mu xa xtal ta sjolic c'u s'elan ta staq'uic sutel ti ac'ope.

¹⁶ Ti jech le'e, mu xanop ti ts'ijil ta xicom c'alal ts'ijilic xa ti stuquique, ti mu xa sna'ic c'u s'elan ta taq'uel ti c'ope.

¹⁷ Ta jtac' talel ava'iic ma' ti c'op une, ta yalel ti c'usi sc'an xcale.

¹⁸ Chapal xa ta que ta jti' ti c'usi sc'an alele, ti mu xa stac' pajesel ta xca'ie.

¹⁹ Ta xa xt'om ya'yel ma' ti co'nton yu'une, co'ol s'elan jech c'u cha'al vino ch'amal ta ach' yavil ti meltsanbil ta nucule.

²⁰ Tsots sc'oplal ta xic'opoj yo' ta x'ech' ti c'usi oy ta co'ntone, ti tsots sc'oplal ta jtac'bot sutel ti ac'ope.

²¹ Mi ja'uc ta jpas ti oy buch'u cajal xa ta xcac' jba ta stojole, ta jbis jba ti co'olotique.

²² Mi cajal xa xca'i jba ta stojole, ta jech yepal unbi, ta stsitsun ti J'ac'-ch'ulel animaile.