Job 3 - Bible in Tzotzil de Chamula

Ti Jobe ta xme'inal oc' yu'un ti tsots vocole

¹ Ta jech yepal un, ti Jobe xvulvun liquel ta sbisel ta cotol chaval ti sc'ac'alil ti voc' talele.

² Xi tsots laj yal une:

³ Mu'yuc c'usi jmaquibe ta j'ech'el ti ac'ubal c'alal linabi ta olole. Mu'yuc c'usi jmaquibe ta j'ech'el ti c'ac'al c'alal livoq'ue.

⁴ Toj lec ti ja'uc o joybijemuc ta ic'al osil ti c'ac'al taje, ti manchucuc sacub talel osil banomile, ti sq'ueluc no'ox ti Diose.

⁵ Toj lec ti ja'uc o ic'unebuc ta jun pimil queovale, ti volibiluc ta jun ic'lumal toque, ti ja'uc o macal sat c'ac'al ti jun xi'elal ta xaq'ue.

⁶ Toj lec la jechuc ti ja'uc o mu'yuc c'usi xvinaj ta yic'ubel ti ac'ubal taje, ti mu'yucuc xchapluj yual, sc'ac'alil, sjabilal ti c'ac'al taje.

⁷ Toj lec ti ma'ucuc yorail nabi ti ac'ubal taje, ti mu'yucuc xvinaj ti xmuyubajic ta avanele.

⁸ Toj lec ti ja'uc o biseuc ta cotol chaval yu'un ti j'ac'-chamel ti oy stsatsalic ta stsalel ti Leviatane.

⁹ Toj lec ti mu'yucuc xchijlajan vulel ti c'usitic ta xojobin yu'un ti sob ic'luman taje, ti mu'yucuc vuluc ta loq'uel ti xmuyubajic batem yo'ntonic ta smalael ta yilel ti osile, ti manchuc smatsmun jsat ta sq'uel ti saquilal osile.

¹⁰ Biseuc ta cotol chaval ti ac'ubal ti ja' o livul ta voq'uele, mi ja'uc ta xquil ta jba ta jsat ti vi s'elan ti vocolajele.

¹¹ ¿C'u no'ox cha'al mu licham ta xch'ut ti jme'e, mi ja' o ti c'alal livul ta bajele?

¹² ¿C'u cha'al ja' o oy buch'u quejel laj stamun, xchi'uc ti oy buch'u laj sts'itesun yu'un ti xchu'e?

¹³ Ti chamcun ono'ox va'i taje, jun xa co'nton telelun, mu'yuc c'usi jna' ta jcux ti jechuque,

¹⁴ jmoj xchi'uc ti ajvaliletique, ti jbijubtasvanejetique, ti stuc busul com ti c'usitic muc'tic laj sva'anique.

¹⁵ Mi mo'oje, jmoj xa oyun xchi'uc ti its'inal ajvaliletic ti laj snojesic ta oro ta plata ti snaique.

¹⁶ ¿C'u ono'ox cha'al mu jechuc laj smuquicun jech c'u cha'al ti yalemal olole, mi mo'oje, jech c'u cha'al ti olol ti chamem ta xvoq'ue?

¹⁷ Ti ta muquinale, stsutseb vul o'nton yu'unic ti buch'u mu'yuc xch'ulelique, c'ot xa ta xcuxobil yo'nton ti buch'u lubtsajemic xae.

¹⁸ Mu'yuc xa c'usi sna'ic ti jchuqueletic ma' ti bu taje, ta xlaj sc'oplal ta xchiquintael ti xjajet no'ox ta xjajantavan ti jq'uel-abtele.

¹⁹ Yalel toyol vololic ti bu taje; laj xa sc'oplal ti pasbil ta mantal yu'un yajval ti mosovile.

²⁰ Ti Diose, ¿c'u cha'al ya'yel ta xac'be sq'uel saquil osil ti buch'u ta xlic yich' ti svocole? ¿C'u cha'al ya'yel ta xch'i xc'opoj yu'un ti buch'u ta xlic oc' avanuc yu'un ti svocole?

²¹ Ti buch'u ta xcham ya'ie mu xvul ta stojol ti lajele, ac'o mi batem yo'nton stael ya'i jech c'u cha'al ti c'usi toyol stojol nac'ale.

²² Xmuyubaj ti vinic taje c'alal mi c'ot sc'ac'alil palch'uj ech'ele.

²³ Ma'sat ta x'aq'ue xanavuc yu'un ti Diose, macbil ta be ta jujujot.

²⁴ Jve'elinoj c'ot ti xi'ijet yu'un ti vocole; ca'alinoj c'ot ti xi'ayet ta oq'uel yu'un ti yipal xc'uxule.

²⁵ Scotol ti c'usi ta xbat jch'ulel yu'un ti xi'elale, tenel c'ot ta jba.

²⁶ Mu jta ti cux o'ntonale, mi ja'uc x'ech' ti vulvunele, mi ja'uc jta ti mu'yuc c'usi jna'e, c'ajomal no'ox oy ta jtojol ti mu'yuc jchi'uc jch'ulel ta xca'ie.