Job 27 - Bible in Tzotzil de Chamula

Ti Jobe xi laj stac' sutel ti c'ope:

^1-2 Jamal xcal ta sventa ma' ti Dios une, ta sventa ti Buch'u scotol xu' yu'un ti mu cha'bel xischapanune, ti c'ajomal no'ox ta scajan talel ta jba ti tsots jvocole,

³ ti jech to sva'anoj sba ti yac'ojbun yipal ta yich'el ti ic' yu'une,

⁴ ta j'ech'el, mu xcal ma' ti naca jutbil no'ox une, ta yalel c'opetic ti naca yesomal jolile.

⁵ Jamal xcal ti li' to cuxulune, mu'yuc jmul, mu jmac que ta yalel; mu jq'uelojuc jba yu'un ma' ti naca stiq'uel xa avu'unic ti oy jmul avalojic une.

⁶ Mu xquicta jba ta yalel ti jtuc'ulanoj jbae, mu jip jten jba unbi.

⁷ Scotol ti buch'u ta xisbisun ta yajcontrae, jech ta xc'ot ta stojol jech c'u cha'al ti buch'u mu'yuc xch'ulel xa'i sbae, ti mu'yuc yutsil stuq'uile.

⁸ ¿Bu xa ono'ox spatoj yo'nton yaloj ti buch'u mu'yuc xch'ulel xa'i sba c'alal ta xtuch'bat xcuxlejalic yu'un ti Diose?

⁹ C'alal ta xc'ot ta stojol ti ilbajinele, mi ja'uc ta x'a'yibat sc'op sti'inel yu'un Dios ti xvocolete.

¹⁰ Mu'yuc staoj xlaet yo'nton ta stojol ti Buch'u scotol xu' yu'une, yu'un mu'yuc ono'ox xc'opoj xti'in.

¹¹ Yacal ta xavilic smuc'ul stsatsal ti Dios ta jtojole, ti c'u s'elan xchapanoj ti Buch'u scotol xu' yu'une.

¹² Le' une, laj xa avilic acotolic, ¿c'u cha'al ya'yel un cha'e ti mu'yuc smelol c'usi ta xloc' ta ave'ique?

Ti Zofare xi laj stac' sutel ti c'ope:

¹³ Ti Dios ti scotol xu' yu'une, xi s'elan ta stsits ti j'ac'-vocol vinique, ti mu'yuc xch'ulel xa'i sbae:

¹⁴ Manchuc mi yepal ta j'ech'el ti xnich'nabe, ta xchamic ta leto, ta xchamic ta vi'nal ti mu'yuc xa c'usi staic ta lajesele.

¹⁵ Ti buch'u cuxul to come, c'ac'al chamel xa ta xlajic o, mu xa x'oq'uitae yu'un yajnilic ti com xa ta me'unal antse.

¹⁶ Manchuc mi co'ol s'elan lum busul no'ox plata yu'unic ti buch'u mu'yuc xch'ulel xa'i sbaique, manchuc mi yepal no'ox busul ta j'ech'el ti sc'u'ique,

¹⁷ ti c'u'il taje, ja' ta stunes ta lapel ti buch'u stuc'ulanoj sbae, xchi'uc ti platae, yan o ti buch'u ta sc'upin ta stunesele.

¹⁸ Ti sna sva'anoj ti buch'u mu'yuc xch'ulel xa'i sbae, mu'yuc c'usi sbalinbe, co'ol s'elan junuc tas-mut, jech c'u cha'al yaxibal na ti jchabiej osile.

¹⁹ C'alal laj xpuch'an sba, jc'ulej to ox, c'alal ta xvul ti xch'ulele, mu'yuc xa c'usi x'ayan yu'un.

²⁰ Tsots ta sibtasat ta c'ac'altic, xchopet no'ox ta xvul ta stojol ti banomilal vo' ti chechbil ta xbat ta ac'ubaltique.

²¹ Ta xcuche loq'uel ta sna yu'un ti sutub ic' ta xlic talel ta stuq'uil sloq'ueb c'ac'ale.

²² Mu'yuc xc'uxulil xjumet no'ox ta x'ech' majeuc, ti spoj xa sba ya'i yaloje.

²³ Xvo'o'et, xjumet no'ox ta j'ech'el, ta snutse yu'un ti iq'ue.