Job 26 - Bible in Tzotzil de Chamula

Ti Jobe xi laj stac' sutel ti c'ope:

^1-2 Va'i to no'ox s'elan ta toyel liquel ti buch'u ch'abal xa ti yipe, ta coltael ti buch'u lubtsajem xa une.

³ Toj lec xana' sbijubtasel stojobtasel ti buch'u mu'yuc sbijilique.

⁴ ¿Buch'u coltabilot yu'un ta yalel ti va'i s'elan ac'op taj une? ¿Buch'u laj yac'bot ana' ta ajol abaquil ti va'i s'elan ta xloc' ta ave ta ati' une?

Xi laj stac' sutel c'op ti Bildade:

⁵ Ti animaetic ti snainojic xa sninabil ti muc' ta nabe, xniquic xa ta xi'el ti oyic ta snatil ti nabe.

⁶ Ti muquinal sbainoj ti lajebale, mu'yuc c'usi jtosuc vocol macal ta sba ta sat ti Diose.

⁷ Ti Diose ta jech yepal laj sq'ui ech'el ti vinajele, mu'yuc yic q'uiil yu'un ti banomile.

⁸ Sbajoj ta maquel ti vo' ta vinajele, ti mu ja'uc xjav ti vinajel yu'un ti yalale.

⁹ Ta x'ic'ub yu'un xojobal ti sat u ti svoloj ta toque.

¹⁰ Ta slajeb to sti'il muc' ta nab bu ta xc'ot ta tsutsel ti banomile, ti c'ot ta sbisol bu ta xlic sacubuc ti osile, xchi'uc bu ta xlic ic'ubuc ti banomile.

¹¹ C'alal ta sibtasvan ti Diose, xnicnun ta xi'el ti vitsetic ti c'otem ta yoyal ti vinajele.

¹² Ta smuc'ul stsatsal, och ta be yu'un ti nabe; sna' c'usi ta xut sba ti laj yu'nin ti muc' ta jti'oval chon Rahab sbie.

¹³ Ta yic'al no'ox ye, xchijlajan no'ox yutsil sac jaman ti vinajel yu'une; ta sc'ob no'ox, laj smil ti sutub ic' chone.

¹⁴ Ti va'i s'elan taje, uni juteb no'ox ta svinajesbe sc'oplal ti yabtele; uni coscos c'op ma' ti va'i s'elan laj ca'itique. ¿Buch'u la ta xa'ibe xchiquinal ti xt'inluj ta a'yiel ti smuc'ul stsatsale?