Job 24 - Bible in Tzotzil de Chamula

¹ Ti Buch'u scotol xu' yu'une, ¿c'u no'ox cha'al mu xalbe sc'ac'alil ti c'usi ta spase yo' jech ta xilic ti buch'u lec xil sbaic xchi'uque?

² Ti buch'u mu'yuc xch'ulel xa'i sbaique, ta snet' sts'aquil ti osile, ta xelc'anic chij yo' ta x'epaj ti xchijique.

³ Ta j'ech'el ta stsatsal-pojbeic xchon sbolom ti buch'utic mu'yuc buch'u x'ayan yu'unique, ti me'unal antsetique.

⁴ Ta xch'ac sbaic ta stamel ech'el lequil be yu'unic ti buch'u me'un mu'natetique, xi'elic xa ta snac' sbaic yu'un scotol ti buch'u biq'uit yac'oj sbaique.

⁵ Ti me'un mu'nate, ti co'ol s'elan jech c'u cha'al te'tical burro ta sbajtical banomile, naca xa stamoj sba ta xloc' ta sa'el ti sve'elique. Ti ta sbajtical banomile, ta stabeic talel sve'el ti yalab xnich'nabique.

⁶ Xvujetic ta xc'uxc'ultael trigo ta yan banomil, mi mo'oje, xbat ta xc'uxc'ultael uva ta yosilic ti buch'u chopol yo'ntonique.

⁷ Mu'yuc c'usi jutebuc ta slaman ta sbaic ti ta x'ech' yu'unic ti ac'ubale, mi jutebuc c'usi ta xpix sbaic yu'un ti sique.

⁸ Ta xlosijic yu'un ti chaquilo' ta xlic talel ta vitstique, ti quiquilic ta yibel ch'en ta x'ech' yu'unic ti vo'e.

⁹ Naca stsatsal pojbeic no'ox ti ach' jvoq'uel ololetic yu'un ti me'unal antsetique, ti naca sc'anbel comel ta rental ti c'usi oy yu'un ti me'un mu'natetique.

¹⁰ Mu'yuc spoc' sc'u'ic ta xanavic ti buch'utic abol sbaique, xvujetic ta xcuchel ti trigoe, ti ya'binoj xa no'ox sbaic ta xchamic ta vi'nale.

¹¹ Xjoyibaj no'ox yu'unic ta sjoyibtael stanal ti mulino ta spits'el ti aceitee; spits'ic no'ox ta yacanic ti uva yo' ta xmeltsaj ti vinoe, ti ya'binoj xa no'ox sbaic ta xchamic ta taqui ti'ile.

¹² Nom to xil jteclum ti buch'u ta xa xlaj ta xa'ie, ti x'oc' x'avan xa ti mu stac' pajesel ti x'ijet xchi'uc ti svocole, mi ja'uc x'a'yibat sc'opojel sti'inel yu'un ti Diose.

¹³ Oy jlom jtoyobbaetic xti'et xcapet sjolic yu'un ti saquil osile; ta xicta sbaic ta stamel ech'el scotol ti lequil tuq'uil be yu'une.

¹⁴ Sob ta xlic ti jmilvaneje yo' ta smil ti me'un mu'nate, ti ta ac'ubal une, ta sjoybin sba ta j'elec'.

¹⁵ Ti jsa'antse smalaoj xa ta x'och ti ac'ubale, svol xa ta xpixel ti sate, ti xi ta snope: “Ti jech le'e, mu'yuc buch'u xiyojtiquinun.”

¹⁶ Ti j'eleq'ue, ta ac'ubaltic ta x'och ta naetic. Scotolic ta sbaj sbaic ta na ta c'ac'altic; scontra ta xa'iic mi ta x'ilatique.

¹⁷ Ti xtixlajan xojobal ti c'ac'ale c'otem ta ic'al osil ta xa'iic, yu'un toj c'upil xa'iic ti xi'bal sba ta q'uelel ti ac'ubaltique.

Ti Zofare xi laj stac' sutel ti c'ope:

¹⁸ Ti buch'u mu'yuc xch'ulel xa'i sbae, bec'bil ta xbat ta vo'. Bisbil ta cotol chaval ta xc'ot sc'oplal ti yosil sbanomile; mu'yuc xa buch'u ta x'abtelanbat yavil ti uvaetic yu'unique.

¹⁹ Ta xq'uixnaj ti corixmae, ta xlic uluc yu'un ti bote; ti ta muquinale, ta sac ch'ay sc'oplal ti jun jsa'mulile.

²⁰ Ch'aye ta o'ntonal yu'un ti sme'e; c'ot xa ta sve'el xuvit, mi junuc xa oy buch'u ta svulesun ta o'ntonal. Ti buch'u mu'yuc xch'ulel xa'i sbae, co'ol s'elan jpets te' ta xich' bojel loq'uel.

²¹ Laj yilbe svocol ti antsetic ti buch'u ch'abal ti yalabique; ti me'un antsetique, mu'yuc laj stic' sba ta scoltael mi jutebuc.

²² Ja'uc le' une, ti jech caj tsacal xa'i sbae, ta xjipat ta lum ta sventa smuc'ul stsatsal ti Diose; c'alal ta sliques yabtel ti Diose, ch'ab xi sc'oplal ma' ti cuxlejal une.

²³ Jun yo'ntonic ta x'aq'ueic cuxiicuc yu'un ti Diose, le' une, q'uelbilic jujuteq'uel yoquic ti bu ta xanavique.

²⁴ Jliquel no'ox cajal xa xa'i sbaic ti buch'u mu'yuc xch'ulel xa'i sbaique, ta jech yepal un, ch'ab xi ech'el sc'oplal. Ta xlic nucultajuc jech c'u cha'al momol ti bulbil xae, jech c'u cha'al junuc jol trigo ta xlic nijbujuc ta lum.

²⁵ Mi mu jechuc taje, ¿mi oy buch'u ta sva'an sba ta yalel ta svinajesel ta jamal ti ch'ayemun ta be xchi'uc ti jc'ope?