Job 23 - Bible in Tzotzil de Chamula

Xi laj stac' sutel c'op ti Jobe:

^1-2 Ta xlic c'opojcun ava'iic yu'un ti tsots jvocol jtaoje, yu'un laj xa syales yoc sc'ob ti Diose ta jtojole.

³ Oc no'ox la ta alel jna'uc ti bu ta taele, ti jna'uc c'u s'elan ta xic'ot ti bu nacale.

⁴ Ta jchapbe ya'i ta stojol unbi ti vi s'elan ti jvocole, ti naca yalbel no'ox ya'i c'usi xa xac' ti jole.

⁵ Jna' xa lec stac'bel sutel ti c'usi ta xistac'bun tal jechuc unbi.

⁶ Yu'un ti stuque ma'uc jipel ta lum ta xiyac'bun, le'e, ts'etel xchiquin ta xa'ibun ti jc'ope.

⁷ Ta xa'ibe xchiquinal smelol ti jc'ope; ta xal ta jamal ti ch'abal ti jmule, ti j'ech'el mu xistijun ta c'op une.

⁸ Le' une, laj jsa' ech'el ta stuq'uil sloq'ueb c'ac'al ti Diose, mu'yuc laj jta ma' ti bu taje; laj jsa' ech'el ta stuq'uil smaleb c'ac'al, mu'yuc laj jta xtoc ti bu taje.

⁹ Laj jsa' ech'el ta stuq'uil yolon ti yolon xocon sloq'ueb c'ac'ale, mi ja'uc laj quil ti bu taje; libat ta sa'el ta yolon ti yac'ol xocon sloq'ueb c'ac'ale, mi ja'uc laj jta ti bu taje.

¹⁰ Va'i un, ti jujuteq'uel coque, ojtiquinbil yu'un; mi ta sq'uelbun ti co'nton une, ta xic'ot ta loq'uel ti sts'ayet no'ox jech c'u cha'al ti bats'i oroe.

¹¹ Ti c'u s'elan laj yac'bun quil ta stamel batele, staoj yav jt'unoj batel, mi ja'uc oy bu ta jch'ac jba.

¹² C'otem ta pasel cu'un ti smantaltaque, ti oy c'usi jbel tsots albil yu'une, ma'uc ta jpas ti c'usi xal ti co'ntone.

¹³ C'alal oy c'usi snopoj ta sliques ta spasele, ta ono'ox spas; mu'yuc buch'u xjelbun ma' ti c'usi snopoj ta spase.

¹⁴ Ti c'u s'elan c'ot ta nopel ta spas ta jtojole, jech ono'ox ta spas, jmoj xchi'uc yan ti co'ol s'elan ta spas ta jtojole.

¹⁵ Jech o xal un, ta xixi' yu'un; xinicnun xa yu'un ti c'alal ta jnopilane.

¹⁶ Ti Dios ti scotol xu' yu'une, jeche' xa much'ulun yu'un.

¹⁷ Oc no'ox la ta alel xisac-ch'ay batel yu'un ti ic'al osile, ti volibiluc c'otcun yu'un ti bu ic'uneb ta j'ech'ele.