Job 21 - Bible in Tzotzil de Chamula

Xi laj stac' sutel c'op ti Jobe:

^1-2 Ti lequil patob o'ntonal xu' xavac'beicune, ja' ti ts'eteluc ani' achiquinic ta ya'yiel ti jc'ope.

³ Ts'icuc cuchuc avu'unic ti yacal ta xilo'ilaje; mi laj une, tse'inanic mi xac'anique.

⁴ Ti yacalun ta letoe, ma'uc xchi'uc jun vinic; jech o xal mu x'ech' ta xca'i.

⁵ Ti tauc xava'ibeic xchiquinal ti c'u ya'yel ta xca'ie, macal ta xc'ot aveic yu'un ti xi'ele.

⁶ Ta xixi' yu'un ec mi ta jnopilane, ti stsililet xa ti jbec'tal jtacopal yu'une.

⁷ ¿C'u cha'al cuxulic to ti buch'u mu'yuc xch'ulel xa'i sbaique, ti ta sta lec smolibelic ti caj tsacal xa'i sbaique?

⁸ Yiloj to ta satic ta xch'i ti yalab xnich'nabique, ti smamobtaquique, ti stsinanoj yo'ntonic ti joyol ta spat ta xoconique.

⁹ Staojic ti lamajem o'ntonal ta snaique, mu'yuc c'usi ta xmacun ta be; mu'yuc ta stsitseic yu'un ti Diose.

¹⁰ Naca xnab no'ox yol ta j'ech'el ti xchon sbolomique; mi ja'uc oy bu ta syales ti yolique.

¹¹ Ti xnich'nabique xbitetic no'ox ta anil ta tajimol ta j'ech'el co'ol s'elanic jech c'u cha'al ti ch'iom mimi'etique.

¹² Bats'i telom no'ox xa'i sbaic, ti stsun-tsun no'ox ta ac'ot ti xlomet no'ox ta xich' tijel ti arpae, ti tampoletique, xchi'uc ta yoq'uisanel ti amae.

¹³ Oy no'ox c'usi x'ayan yu'un ti c'u sjalil cuxule; jun xa yo'nton ta xbat ta muquel yu'un ti lum ach'ele.

¹⁴ Xi ta xalbeic ti Diose: “¡Ch'an utuncutic, mu jc'an jch'uncutic ma' ti oy c'usi jbel tsots albil avu'une!

¹⁵ ¿Buch'u ya'yel ti scotol xu' yu'une yo' jech ta xcac' jbatic ta tunel ta stojol? ¿C'usi ta jtatic yu'un ti xijc'opoj xijti'in ta stojole?”

¹⁶ (Ti buch'utic mu'yuc xch'ulel xa'i sbaique, mu laj yac'be sba stuquic ti c'usitic x'ayan yu'unique. Mu jtabe snopbenal jech c'u cha'al ta snop ti stuquic une.)

¹⁷ ¿Mi oy la bu xavil ta stselbuj ta xtub yutsilal xojobal ti buch'u mu'yuc xch'ulel xa'i sbaique? ¿Mi oy la bu xavil ta sta ti svocolique? ¿Mi oy la bu xavil ti iltabilic yu'un Dios ti ta x'ac'bat svocolic yu'une?

¹⁸ ¿Mi oy la bu xavil ti tan puc ta xbatic yu'une, ti co'ol s'elan c'a' jobel ta svilesatic batel yu'un ti sutub iq'ue?

¹⁹ Ti vo'oxuque ta xavalic ti nich'nabiletic ta x'ac'bat stojic yu'un Dios ti c'usi chopol laj spas ti stot sme'ique. Le'e, ta xcal ja' ti buch'u mu'yuc xch'ulel xa'i sbae, ta stoj stuc, ta sta ya'i ti sibtasele.

²⁰ Tsots sc'oplal ti yich'uc tsitsel ta sventa sc'ac'al yo'nton ti Buch'u scotol xu' yu'une.

²¹ ¿Mi yu'un la oy buch'u ta sventain xana' mi oy c'usi ta xc'ot ta stojol ti yalab xnich'nab mi cham xa ti stuque?

²² (Le' une, ¿mi oy la buch'u ta xchanubtasat ti Dios ti sbainoj ta xchapanel xtoc ti nacalic ta vinajele?)

²³ Oy buch'u ta xchamic ti tsots to yipal yu'une, ti xlaet no'ox ta xa'iique, ti mu'yuc c'usi sna'ique,

²⁴ ti caj tsacal no'ox xa'i sba ta j'ech'ele, ti telom no'ox xa'i ti sbec'tal stacopalique.

²⁵ Ti yan une, naca vocol staoj x'ech'ic ta banomil, ti mu'yuc laj sc'upin yutsilal ti xch'iel sc'opojel xcham laje.

²⁶ Manchuc mi jech un, ti ta muquinale mu jeltosuc, scotolic ta xve' yu'unic ti xuvite.

²⁷ Jna' lec ti c'usi ta xanopic ta jtojole, c'u s'elan xnopnun ti ajolic ta jtojole.

²⁸ Xachi ta xajac'be abaique: “¿Bu oy sna xana' ti jti'o'nton ti tsots sva'anoj sba ta stojol ti yane?”

²⁹ ¿Mi mu'yuc xalo'ilajic xchi'uc ti jxanvil viniquetic ti yalel muyelique? ¿Mi mu'yuc ava'binojic ti xi ta xal ti slo'il xmaxile:

³⁰ ti c'alal mi ta xcap ti Diose, ta stac talel tsots vocol, ti mu'yuc c'usi ta xc'ot ta stojol ti buch'u mu'yuc xch'ulel xa'i sbae?

³¹ Mu'yuc buch'u ta xtic'bun ta sat c'u s'elan ti stalele, mi ja'uc ta x'ac'bat stoj ti loc' ta sa'el yu'une.

³² C'alal ta xc'ot yoraile, ta xpoyat batel, ta xich' muquel ti xvolet no'ox batel ti yajvale,

³³ jlom xa ta jba'be, jlom xa ta patil. Mi c'otic ta muquinale, vololic xa ta xac'beic sventain ti muquinale.

³⁴ Xocon be atamojic ti ta xapatbeicun ti co'nton avalojic une. Naca jutbil scotol ma' ti c'usi ta xavalic une.