Job 19 - Bible in Tzotzil de Chamula

Va'i un, ti Jobe xi laj yal ti laj stac' sutel ti c'ope:

^1-2 ¿Bu to c'alal ta xavicta abaic ta yilel ti jvocole, ta syayijeselun xchi'uc ti ac'opique?

³ Xlic xcaj no'ox ti quilbajinel avu'unique; ¿mi mu'yuc xa q'uexlal avu'unic ti vi s'elan ta xapasbeicune?

⁴ Ac'o mi jech ono'ox ti jmul une, quich'uc jvocol jtuc yu'un ti jmule.

⁵ Atac'ojic ti xjelav to alequilalique, ti ja' mu sta ti vu'un ti stiq'ueluc no'ox ta jsat avu'unic ti jvocole.

⁶ Na'ic lec ava'iic, ti Diose laj sjipun ta lum, li'och ta pets' yu'un.

⁷ Xichi xi'avete: “Ta xismilicun”, mi junuc oy buch'u xtac'av; jc'an xa ca'i oyuc ti buch'u scoltaune, mu'yuc buch'u xischapanun.

⁸ Dios laj smac ti bee yo' jech mu xijelav batel. Ic'uneb ti osil banomil ti bu jtamoj batel ma' ti jbee.

⁹ Laj yich' ech'el ti jc'ulejal une; laj spoj loq'uel ti cutsilal jlequilal ti co'ol s'elan c'otem ta jun sronail jolile.

¹⁰ J'ech'el libat ta yoc yu'un; mu'yuc xa ma' ti oy to bu tsacal com ti spatobil co'nton yu'une.

¹¹ Laj sbusan ti sc'ac'al yo'nton ta jtojole; laj sbisun ta yajcontra.

¹² Volol vul scotol ti yajsoldadotaque; joyolic ta lamlej ta spat xocon jna, ti lic xchapan sba ta stsaquelun ta letoe.

¹³ Laj spas ti Diose ti laj sq'uej sbaic batel yu'un ti jvinquileltaque, xchi'uc ti buch'u lec xquil jba xchi'uque, ti mu xojtiquinicun spas sbaic yilele.

¹⁴ Laj sten laj sjipicun comel ti cuts' calaltaque; ti buch'utic xcojtiquinane laj xch'ayicun ta o'ntonal.

¹⁵ Ti jme'mosovtac nacalic ta jnae sbisojicun ta jyanlum ti mu xa xiyojtiquinique.

¹⁶ Mi ta xcavta junuc jmosove, mu xistac'bun, ac'o mi xivocolet ta stojol.

¹⁷ Mi ta xinopaj ta stojol ti cajnile, mu xa jtac' nopel ta xiyil, mi ja'uc jtac' q'uelel ta xiyil ti jchi'iltac ta voq'uele.

¹⁸ Bajbil tenbilun yu'un ti ololetique; naca ta xiva'i batel, xchopol c'opojic liquel.

¹⁹ Bajbil tenbilun xa yu'un ti buch'u spajeb lec xquil jba xchi'uque; ti buch'u mu tuch'baj ta o'ntonal ta xquile, joybij xa ta cajcontra.

²⁰ Ti jnuculiltaque ta spac' sba ta jbaquiltac, spajebal xa ma' ti vocol ti li' to cuxulune.

²¹ C'uxubajanic un, jchi'iltac ti lec xquil jbatique, yu'un laj xa syales yoc sc'ob ti Dios ta jtojol une.

²² ¿C'u cha'al ti vo'oxuc une ta xavilbeicun jvocol jech c'u cha'al ta spas ti Diose? ¿Mi mu yepaluc xa laj aniticun ta ti'el?

²³ Oc no'ox la buch'u sts'iba ti jc'ope, ti tsacaluc comel yu'un ta pech-pech taq'uine.

²⁴ Oc no'ox la buch'u ta junuc sni' taq'uin, xch'ojilan ta ts'ibael, ta c'unil taq'uin, mi ta jpech-pech ton, ti j'ech'el ts'ibabil xcom oe.

²⁵ Jna' lec ti cuxul ma' ti Buch'u jcaj-pac-c'ope, ti c'otem ta caj'et'esejc'op li' ta banomile.

²⁶ Manchuc mi ta jujuti' ta xt'ol loq'uel ti jnuculile, vu'un jtuc ta to ono'ox xquil ta jba ta jsat ma' ti Dios une.

²⁷ Ta xquil ta jba ta jsat un, ma'uc yan ma' ti buch'u ta xil une. Naca xa tsacal licom

²⁸ ti laj ca'i ti xachi laj avalique: “¿C'u s'elan ta lubtsanel le'e? Loc' ta sa'el yu'un stuc ti vi s'elan ti lamal ta stojol ti vocole.”

²⁹ Ja'uc le' une, xi'anic yu'un ti espadae, ti yespada Dios ta stsits ti c'usi chopole. Na'ic lec ti oy jun Buch'u ta xchapaj yu'une.