Job 18 - Bible in Tzotzil de Chamula

Ti Bildade xi laj stac' sutel ti c'ope:

^1-2 Job, ¿bu to ono'ox c'alal ta xavicta aba ta svulel ti buch'utic li' oye? Ti xava'i'uc ti sni' xchiqunale, xu' xijc'opoj ti jechuque.

³ ¿C'u cha'al ta xabisuncutic ta chon bolom c'u j'elancutic ta xavile, ti mu'yuc jch'ulelcutic ta xaviluncutique?

⁴ Ti xajajet xa yu'un ti sc'ac'al avo'ntone, ¿mi avac'touc ta xjoybij ta sbajtical banomil ti osile, mi ta sjel yavil ti ch'en vitsetique?

⁵ Ch'ab xi sc'oplal stilemal xojobal ti buch'u mu'yuc xch'ulel xa'i sbae, mi ja'uc xa ta xac' sleb ti sc'oq'ue.

⁶ Ta xc'ot ta tubel ti lampara yu'une; laj sc'oplal ma' ti sac jaman no'ox xojobal ta snae.

⁷ Ta xlic yamuc yip ti xic'xun no'ox yacan ta yalel muyele; yacbil c'ot ta spets' ti bu laj smeltsane.

⁸ Va'al no'ox spets'al ti bu ta x'ech'e, tsacbil ta xc'ot yu'un.

⁹ Chapal xa yaq'uil ti bu ta stec' batel ti yoque, ta stsin sba lec ti ts'otbil ta xc'ot ti snuc' yacane.

¹⁰ Mucul ta be ma' ti pets'e, ja' to no'ox xa'i ma' ti tsacbil xa ox yu'une.

¹¹ Sibtasbil ta xa'i ta jujujot; q'uelbil no'ox ta xa'i ti jujuteq'uel ta xanav batele.

¹² Ta xlaj yipal yu'un ta scoj ti vi'nale, ti chapal xa ta xvul ti vocol ta stojole.

¹³ Ti chamele laj xa yu'nin, lajebal xa xna'un o, ta jujuti' ta xcoquinbat ech'el ti sbec'tal stacopal yu'une.

¹⁴ Tub xi sc'oplal ti jun yo'nton ta snae, quilbil ta xbat ta stojol ti j'ac'-xi'el ajvalile.

¹⁵ Tic' xi sc'ac'al ti snae, ta xich' vijbel asufre ta sba ti c'usitic oy yu'une.

¹⁶ Co'ol xa s'elan jpets te' ti taquijem xa ti yibele, ti nucultajem xa ti sc'ob-c'obtaque.

¹⁷ Laj sc'oplal ma' ti sc'oponel li' ta banomile, mi ja'uc xa oy buch'u ta svulesun ta o'ntonal.

¹⁸ Ten xi batel ta ic'al osil ti sac jaman to ox ti bu oye; valc'uj to ech'el ma' ti lum ach'el yu'une.

¹⁹ Mu'yuc snitilultac ta xcom ta steclumal; mi junuc oy buch'u ta xnaqui ta sna.

²⁰ Ta xbat xch'ulelic ta xi'el ti jnaclejetic ti oyic ta sloq'ueb c'ac'ale, ti oyic ta smaleb c'ac'al c'alal ta xa'iic ti sc'oplale.

²¹ Jech ta xc'ot ta tubel un ti buch'u mu'yuc xch'ulel xa'i sbae, ja' ti vinic buch'u laj sten laj svalopatin comel ti Diose.