Job 17 - Bible in Tzotzil de Chamula

¹ Mu xa xquich' lec ti ic' ta xca'ie; ta xnopaj xa ech'el ta tsutsel ti jcuxlejale; malabilun xa yu'un ti muquinale.

² Ti nabalic ta jts'ele, naca jna'levanej viniquetic, ti sa'sun no'ox sjolic c'ac'al ac'ubal ta sliquesel ti c'ope.

³ Ti le' une, Dios, xu' ta xava'an aba ta jtojol; ¿buch'u xa ono'ox yan mi ma'uc vo'ot stac' xapas une?

⁴ Laj xa ayanijesbe ti snopobil yu'unique, mu aq'uelojuc un ti tsalbil ta xic'ot yu'unique.

⁵ Xnich'nab ti buch'uuc no'oxe, ta xlic ya'iic vocol vi'nal, yu'un ta matanal no'ox ta xlic spaybe sc'oplal ti buch'u lec xil sbaic xchi'uque.

⁶ C'ot ta pasel avu'un ti scotol chopol ta xc'opojic ta jtojole, ti stubtaic xa ti jsate.

⁷ Yu'un ic'ubem banomil ta xca'i yu'un yipal ti jvocole; squeoval xa no'ox li' va'al ti jbec'tal jtacopale.

⁸ Ti jech ta xilic ti buch'u lequique, ch'ayal ta xc'ot yo'ntonic yu'un, xcapet xa sjolic sbisojicun ta chopol vinic.

⁹ Yac'ojbeic yipal ti xa'ibeic xchiquinale, ti sac ti yoc sc'obique.

¹⁰ Ja'uc le' une, la'ic ca'itic li'e, ti ta acotolique, mu jta junuc ma' ti oy abijilique.

¹¹ Xquechet xa batel ti jc'ac'alil coraile, ti c'u s'elan jnopoje, ti c'usi juteb ta co'ntone, macbil ta xc'ot ta be.

¹² Ja'uc le' une, ti c'ac'altique, ta xajoybinic ta ac'ubaltic; ti jech ic' ta j'ech'ele, ta xavalic ti sac jaman xa talel ti osile.

¹³ Ti c'usi jmalaoj ta j'ech'ele, chamcun no'ox xcha', ti telelucun xa ta vayel ta ic'al osile.

¹⁴ C'ot xa ta jtot, ta jme', ta jchi'iltac ta voq'uel ti xuvite, ti muquinale.

¹⁵ ¿Bu busul com ti laj jpat co'nton ta staele? ¿Bu busul com ti c'usi x'ayan cu'une?

¹⁶ ¿Mi ta xyalic batel ta xchi'inelun ti bu ta xventainvan ti lajebale, ti jun xa co'ntoncutic ta jcuxcutic ta lum ach'ele?