Job 16 - Bible in Tzotzil de Chamula

Xi laj stac' sutel c'op ti Jobe:

^1-2 Ep ta coj ca'binoj ma' ti ac'op ti va'i s'elan taje. Ti avalojique, ta xapatbun ava'iic co'nton, ti c'alal c'ajomal no'ox ta xavaq'uicun ta vocole.

³ ¿Mi mu'yuc stsutseb ya'yel ti jeche' vulvul c'ope? ¿Mi j'esom-joloxuc ya'yel ta xtal acajanic ta jba ti c'opetique?

⁴ Ti c'otemuc ta atojolic ava'iic ti vi j'elane, xu' ti ta xic'opoj jech c'u cha'al ta xapasique, xu' ti jim xa jol ta na'levaneje, xu' ti xbet'bun no'ox liquel que ta sbusanel ta yalel ti c'op ti jechuque.

⁵ Xu' xtoc ti jun no'ox yutsil ti que jti'e, ti xpatet ta xc'ot o'ntonal yu'une, ti xatsijan xa aba lec yu'une.

⁶ Mi ja'uc ta xyam yipal xc'uxul jvocol ti xivulvune, mi ja'uc ti xyochoch to ech'el yavanel ti jvocol ta xca'ie.

⁷ Ch'abal xa quip yu'un ti Diose; laj xa xch'ac loq'uel ta jtojol scotol ti buch'u lec xquil jba xchi'uque.

⁸ Li'och xa ta chuquel yu'un. Oy buch'u laj sva'anan talel yo' ta scontrainun; ta jeche' no'ox ta sva'an sba ta yalel ti oy jmule.

⁹ Ti Diose mu xicta sba ta yilbajinelun, ta sesiltaelun, ta sibtaselun jech c'u cha'al junuc jti'oval chon bolom; ta xispajun ta q'uelel jech c'u cha'al junuc cajcontra.

¹⁰ Xvoletic no'ox ti jnaclejetic ta xtalic ta jtojol ti smats' xa yeic ta scontrainelicune, ti xt'axicun xa ya'iic ta majel yo' ta xiyaq'uic ta lo'il maxil.

¹¹ Ti Diose laj yac'un ta yoc ta sc'ob jnaclejetic ti mu'yuc xch'ulelic xa'i sbaic ti ja' jmilvanejetique.

¹² Mu'yuc to ox c'usi jna', mich' xutbun jnuc' ti stuc une; laj xchecholanun ti toj voch'el lic'ot yu'une. Lic'ot ta xchanob c'ob yu'un ti syolobe.

¹³ Mu'yuc ta alel yu'un bu ta xc'ot ti syolobe; mu ta syail xc'uxuluc yo'nton ta x'ech' sjom ti jbec'tal jtacopale, ti sbuset no'ox yalel ta lumtic ti sbeel jch'ut yu'une.

¹⁴ Ti xlic xcaj no'ox ta syayijesel ti bu ono'ox yayijemune, ti jun to j'ac'-leto xjipet no'ox talel ta jtojole.

¹⁵ Ta yatel xa co'nton, laj jlap lajemal c'u'il, ti jts'ucan xa ta pucuc ti jole.

¹⁶ Sitic no'ox ti jsat ta oq'uele, ti mu xa xvinaj ta q'uelel ti banomil ta xquile.

¹⁷ Ta jeche' no'ox un, mu'yuc c'usi jpasojbe mi junuc, oy stuq'uil smelol lic'opoj liti'in.

¹⁸ Ti yijil ilbajinel ta jtojole, sc'an lequil chapanel. Banomil, mu muculuc xcom avu'un ti xi'avet yu'un xc'uxul ti jvocole.

¹⁹ Oy nan buch'u ta vinajel ta sva'an sba ta spaquel ti jc'oplale,

²⁰ ta yet'esel jc'op ta stojol Dios ti c'u s'elan jnopoje, yo' jech ta xil ti xmalmun ti ya'lel jsate.

²¹ Oy nan buch'u ta sva'an sba ta sc'oponel Dios ta spaquel jc'oplal jech c'u cha'al ta xich' c'oponel jun vinic ta spacbel sc'oplal ti xchi'ile.

²² Mi cuxulun to jun chib jabile xquechet no'ox batel; mu ta sjaliluc ta jtam batel be ti j'ech'el mu xisut talele.