Job 15 - Bible in Tzotzil de Chamula

Xcha'cojal lo'il maxil Xi laj stac' sutel c'op ti Elifaze:

^1-2 Ti buch'u bij xa'i sbae mu pochanuc no'ox ta stac' sutel ti c'ope, mi ja'uc cajal ta xac' sba xchi'uc ti sc'op ti c'ajomal no'ox jech c'u cha'al iq'ue.

³ Ma'uc no'ox xvulvun xchi'uc ti c'usi ta xale, mi ja'uc ta xal c'opetic ti mu'yuc stue.

⁴ Ja'uc le' une, xachi laj aval une, mu'yuc xa ta xabic'tajes aba ta stojol ti Diose; ta yut xa avo'nton laj avicta aba ta sc'oponel sti'inel.

⁵ Jech ta xac' c'opojan ti soquemal snopbenal avu'une, ti naca lo'lavanej ta xaval ti ac'ope.

⁶ Ma'uc xa vu'un ta xcal ti amule, yu'un laj avac' aba ta chapanel atuc ti xbet'bun ti avee.

⁷ ¿Mi ta xanop ti mu'yuc laj ech'uc totil me'iletic ta ba'yel c'alal ch'abalot to oxe, ti mu ja'uc meltsajem ti vitsetique?

⁸ ¿Mi atac'oj avaloj ti ochemot ta yajbijubtasvanej ti Diose, ti atuc xa no'ox jelavem abijil li' ta banomile?

⁹ ¿Mi atuc xa no'ox xana' avaloj ti c'usi mu jna'cutic eque? ¿Mi atuc xa no'ox xavojtiquin avaloj ti c'usi mu xcojtiquincutique?

¹⁰ Quere, vulem xa cuni ch'ulelcutic ti x'ech' to jna'becutic smelole, ja' mu sta sna' ma' ti atot une.

¹¹ ¿Mi mu baluc xava'i ta spatbot avo'nton stuc ti Diose, ti xlamet no'ox ti que jti'cutic ta xajc'oponcutique?

¹² ¿C'u cha'al aq'ueloj xa aba yu'un ti vocole, ti pitajtic no'ox ti asat ta xaq'uelvane?

¹³ ¿C'u cha'al avac'ojbe yipal ta scontrainel ti Diose, ti mu'yuc spajeb xatac'tun ta j'ech'ele?

¹⁴ Mu'yuc junuc ma' ti ch'ul vinic xa'i sbae, ti mu'yuc smul scolo'e.

¹⁵ Mi junuc yaj'ánjel ti co'ol sjol yo'nton ta xc'ot xchi'uque, mi ja'uc ti vinajel smeset no'ox yutsil ta xil ta sba ta sate,

¹⁶ bu la ta xba co'olajuc jech ti vinic une, ti mu'yuc ono'ox stuq'uile, ti bajbil xchi'uc ti xpochanile, ti co'ol s'elan vo' ta xuch'ilan ta spasel ti chopole.

¹⁷ Chiquintabun ava'i jbel cha'beluc ta yalel ava'i ti c'otem ta jtojol ti bejel lec ta jole,

¹⁸ ti c'u s'elan ta xchanubtasvanic ti buch'u oy sbijilique, ti laj xchanbeic comel ti stot sme'ic ta vo'nee,

¹⁹ ti ac'bat sventainic ti banomile, ti mu'yuc scapinoj sts'unubalic xchi'uc ti jyanlumetique.

²⁰ Xch'iel sc'opojel ti vinic ti mu'yuc xch'ulel xa'i sbae, ti jbel ta c'op xa'i sbae, xi no'ox snatile, yepal no'ox ti vocol ta stae.

²¹ Toj xi'el ta xc'ot xchi'uc ti oy c'usi xchajluj ta xa'ie; c'alal lec xa stsinanoj sbae, ta x'elc'ane yu'un ti j'eleq'uetique.

²² Laj to me sc'oplal ma' ti ta spat yo'nton ta xjatav loq'uel ti oy ta ic'ubel osil une, xi s'elan ta xc'ot ta stojole: malabil xa ti punyal xve' yu'une.

²³ Ta xc'ot ta sve'el xulem ti sbec'tal stacopale; sna' lec un ti mu xch'ay ta be ti c'usi q'uelel ta stojole.

²⁴ Ta xbat xch'ulel ta xi'el yu'un ti ic'uneb no'ox ti banomil ta stojole, xbitbun no'ox ti yo'nton ta xa'ie, mu no'ox x'ech' xjelav ti svocole, co'ol s'elan jun ajvalil c'alal ta stsacvan ta letoe.

²⁵ Jech ta xc'ot ta stojol ti buch'u sye' xa sc'ob ta scontrainel ti Diose, ti svul xa sba xchi'uc ti Buch'u scotol xu' yu'une,

²⁶ ti buch'u slapoj lec smacobbaile, ti xvilet no'ox batel ta sbolil ta scontrainel ti Diose,

²⁷ ti cuts'ul no'ox sjubemal ti spat xocone, ti puc'ul no'ox ti sate.

²⁸ Ja' no'ox un, lilijem ta xcom ti jteclumetic bu nacale, ti stuc xa sbusulil sicotan ta xcom ti naetic une.

²⁹ Mu jaluc c'ac'al ma' ti sc'ulejale; ti c'usitic oy yu'une ta xch'ay o sc'oplal ta banomil.

³⁰ Mu xu' ta spoj sba loq'uel ma' ti ic'uneb no'ox ti banomil ta stojole. Jech ta xc'ot ta stojol jech c'u cha'al jtec' te' ta xchiq'ue ta c'oc' ti sq'uelome, mi ja' ti xnich bec'bil ta xbat yu'un ti iq'ue.

³¹ Ti xbat xa yo'nton xchi'uc ta sbolil ti lo'lavaneje, ta xlaj ta lo'lael yu'un un.

³² Mu ta sjaliluc ta xlic nucultajuc ti sc'ob-c'obtac une, mi ja'uc xa ta xlic yaxubuc talel.

³³ Co'ol s'elan jech c'u cha'al yaq'uil uva ti mu xta'aj lec yu'un ti sate; co'ol s'elan jech c'u cha'al olivo te' ti ta xbaj ta lum ti xniche.

³⁴ Mu xilic snitilulic ti buch'u mu'yuc xch'ulel xa'i sbaique, ti sc'ulejal oy ta sna ti laj staic ta naca mich'ob c'abale, ta xc'ac' ta c'oc'.

³⁵ Nabal ta chi'inel ti c'usitic chopole, ta xlic ayanuc ta stojolic ti c'usitic mu xac' jun o'ntonale; naca lo'lael ta xlic ayanuc yu'unic.