Job 11 - Bible in Tzotzil de Chamula

Lic c'opojuc ti Zofare:

^1-2 Scotol ti c'opetic taje, sc'an ti oyuc stuq'uil c'u s'elan ta xich' taq'uel sutele, ma'uc to ti ta xvinaj ti ja' melel ta sventa ti toj ep ta xlo'ilaje.

³ ¿Mi yu'un ta xanop ti ts'ijil ta xicomcutic yu'un ti achuvaj c'op ta vulvunel taje? ¿Mi ta xanop ti mu'yuc buch'u xu' yu'un ta stac' sutel ti ana'levaneje?

⁴ Ta xanop ti jun yutsil ti c'u s'elan ach'unoje, ti ta xavalbe aba ti atuc'ulanoj abae.

⁵ Ti stac'bucot no'ox la talel ava'i Dios ti va'i s'elan ti ac'ope,

⁶ ta xchanubtasot ava'i unbi c'u s'elan chucul ta a'yiel sc'oplal ti bijilile, ti vocol ta a'yiele, ta xlic avil unbi, ti mu sta jech yepal ta stsitsot ti Diose jech c'u cha'al yacal ta xavich'e.

⁷ ¿Mi yu'un xu' avu'un avaloj ta ya'yiel ti c'usi mu na'bajuc snopoj ti Dios ti oy ta yutil yo'ntone?

⁸ ¿C'usi la stac' xapas un ti x'ech' to jelavem sc'oplale, ti mu sta staylej ti vinajele? ¿C'uxi xana' un ti x'ech' to spajebe, ti mu sta snatil ti bu spajeb ti xabe?

⁹ Jelavem sc'oplal ta j'ech'el, mu sta sc'oplal sjamalil ti banomile. xchi'uc sjamalil ti muc' ta nabe.

¹⁰ Mi ta xtal chucvanuc ti Diose, ti ta x'ic'van batel ta chapanele, ¿mi oy la buch'u ta spajesat yu'un?

¹¹ Sna'oj buch'u ti jutc'ope; yiloj ti c'usi chopol ta xc'ot ta pasele. ¿Mi atac'oj xana' ti mu xile?

¹² Ti sc'ac'alil ta spajes sba yu'un spucujil ti pochan te'tical burroe, ja' o sc'ac'alil ta xlic ochuc ta be ti buch'u mu xa'ibe xchiquinale.

¹³ Loc'uc ayanuc ta avo'nton ti oyuc stuq'uiluc ta xapas abae, vocoletan liquel ta stojol ti Diose.

¹⁴ Mi pets'elot yu'un ti mulile, ictao comel; mu aq'uelojuc no'ox aba ta xavac' ochuc ti c'usi chopol ta anae.

¹⁵ Jech mu'yuc c'usi xal avo'nton ta xatoy batel asat unbi, mu'yuc c'usi xana', mi ja'uc ta xaxi'.

¹⁶ Ja' mu xa xt'ab ta avo'nton ti avocole; yo' ta xc'ot ta pasel ti mu xa xvul ta avo'nton jech c'u cha'al x'ech' ti vo'e.

¹⁷ Ti acuxlejale x'ech' to xtixet xojobal, ja' mu sta xtixet xojobal xc'uxul ti o'lol c'ac'ale; ti ic'uneb laj ava'i ti banomile, ta xc'ot ta pasel ti xcuxet to liquel ta xava'i jech c'u cha'al xtixet xa talel sacubel ti sob ic'lumane.

¹⁸ Oy spatobil avo'nton, mu xa c'usi xana' ta xacuxi; chabibilot ta yolon yoc sc'ob ti Diose, Jun avo'nton ta xavay.

¹⁹ Mu'yuc c'usi ta xasibtasot c'alal ta xacuxe; ep buch'u ta sc'anboxuc vocol ta atojol.

²⁰ Ja'uc ti buch'u mu'yuc xch'ulel xa'i sbaique, jeche' ma' ti sa'ilan xa ti scoltaelique, mu staic ti bu xu' ta snac' sbaique, ac'o xa spat yo'nton ya'i ti ta xchamique.